Vot tra i plui impuartants centris educatîfs valenzians a àn publicât un document unitari là che a critichin la cussì clamade leç sul plurilinguisim che cul prossim an scolastic e jentrarà in vore ancje te educazion secondarie e professionâl. La leç e previôt un minim dal 25% di oris di insegnament par castilian, dal 25% par catalan e dal 15% par inglês. Tratâ lis lenghis come se a fossin compagnis – a disin i firmataris dal document – al vûl dî fâ fente di no savê che il catalan si cjate a vivi in dut il Paîs Valenzian une situazion di minorizazion che, par jessi ribaltade, e domande intervents legjislatîfs che a favorissin la lenghe proprie. Di là dai discors di principi, in realtât cheste leç e va a ridusi in maniere significative lis oris di insegnament par catalan in diviers istitûts dal teritori. Une revision profonde de leç e jere za stade domandade ancje de organizazion Escola Valenciana e di altris realtâts associativis e sindacâls tant che Plataforma per la Llengua, Decidim, Bloc d’Estudiants Agermanats, SEPC e A Contra Corrent.
Nessun commento:
Posta un commento