12/06/21

Ocitanie: campagne par promovi la lenghe proprie

I viazadôrs che dai 24 di Mai indenant a son passâts pe stazion di Bordèu / Bordeaux a àn vût sot dai voi i prins manifescj di une campagne par promovi la lenghe ocitane e sensibilizâ la citadinance sul so ûs. La iniziative e interessarà pai prossims sîs mês 52 stazions des regjons aministrativis de Ocitanie e de Gnove Aquitanie. Dongje dai placâts, si previôt ancje une campagne su la Rêt che e varès di rivâ a tocjâ almancul 800 mil personis e il lanç di un sît Internet di pueste (jemejettealoc.com). Daûr di chestis azions al è l’Ufici Public pe Lenghe Ocitane (ÒPLO) che lis à presentadis intant di une conference stampe che si à tignude ai 26 di Mai. Ta chê ocasion si à fat ancje savê che dentri de fin dal an i avîs sui trens des liniis Tolosa / Toulouse - Aush / Auch e Pòrt Bou / Port-Bou - Salsas / Salses a saran dâts fûr in forme bilengâl, par francês e par ocitan.

Font: Jornalet, 28/05/21

Nessun commento: