24/01/15

Paîs Catalans: acuardi sul percors sovranist jenfri CiU e ERC

Dopo une dade di contrascj ancje avonde marcâts, i rapresentants dai doi principâi partîts sovraniscj catalans – Artur Mas di CiU e Oriol Junqueras di ERC – a àn cjatât un acuardi sui prossims pas di fâ par lâ indenant cul percors par rivâ a di une Catalogne indipendente. In mert aes diferencis di partence su la date e su la presentazion des listis pes prossimis elezions catalanis, si à decidût che si larà a votâ ai 27 di Setembar e che i doi partîts si presentaran cun listis separadis, viertis ancje a rapresentants de societât civîl e cun ponts in comun sul percors sovranist.
Si à po metût jù ancje un prin stampon di chei altris passaçs di svilupâ che tes prossimis setemanis si larà a meti a puest cun chê di cjatâ une convergjence ancje cun altris sogjets politics. Prime des elezions si metarà in vore un procès partecipatîf par meti jù un stampon di Costituzion catalane e si lavorarà par che lis struturis che a dan i servizis di fonde ai citadins (servizis sociosanitaris, sigurece sociâl, infrastruturis energjetichis, e v.i.) a vedin la capacitât di funzionâ ancje cuant che il procès di indipendence al sarà in vore. Dopo dal vôt, intal câs di une clare maiorance a pro de indipendence, si proponarà al stât spagnûl un percors di separazion consensuâl, ma si inviarà ancje lis negoziazions pal ricognossiment internazionâl. Dome une volte rivât insom chest procès, si sometarà a referendum la gnove Costituzion e si tornarà a votâ pes primis istituzions catalanis indipendentis.
Font: VilaWeb, 09-16/01/15; El Punt Avui, 10-16/01/15

Nessun commento: