Europe centrâl: mobilitazion des minorancis ongjaresis

Lis problematichis che a tocjin lis comunitâts ongjaresis presintis in diviers stâts europeans a son stadis al centri di un incuintri tra il comissari pes minorancis nazionâls de OSCE, Knut Vollebaek, e la segretarie di stât vicjarie ongjarese, Zsuzsanna Repas. Par chel che al rivuarde la Romanie, une des cuistions plui cjaldis e reste chê dal ûs dal ongjarês inte facoltât di medisine de universitât di Marosvásárhely / Târgu Mureş. Pe Serbie, invezit, la atenzion si è centrade su la riduzion dal nivel di autonomie de Voivodine e dal Consei Nazionâl dai Ongjarês di cheste provincie. In Ucraine si cjale massime ae metude in vore de gnove leç su lis lenghis. I emendaments su la leç sui dirits des minorancis e su chê pe citadinance, intune cul declassament de universitât di Komárom / Komárno, a son invezit i temis che a preocupin di plui pe comunitât ongjarese de Slovachie.
Juste cualchi zornade prime di chest incuintri il Parlament ongjarês al veve ricevût e dât la sô poie a di une declarazion unitarie metude jù des organizazions principâls de minorance magjare de Slovachie, in particolâr de Conference dai Ongjarês de Slovachie e dai partîts MKP e Most – Hid. Intal document i firmataris si declarin citadins slovacs di nazionalitât ongjarese, a manifestin la volontât di svilupâ une clime di comprension e di tolerance tra i doi popui, e a domandin la avualiance tra lis dôs lenghis e un sisteme di autoguvier regjonâl plui fuart.

Font: Politics.hu, 03 e 09/10/12