La ultime novitât sul referendum su la indipendence
de Scozie e je chê publicade inte edizion dai 26 di Fevrâr di “The Scottish
Sun” là che si fevele dai 18 di Otubar dal 2014 tant che date pal so
davuelziment. La gnove e somearès sbrissade fûr dai uficis dal guvier scozês,
che si è limitât a dî che e je dome une des datis pussibilis viodût che la
intenzion dal esecutîf vuidât dal prin ministri Alex Salmond (Scottish National
Party) e je propite chê di lâ al vôt intal Autun dal 2014.
Propit chel de date
sul davuelziment dal referendum al reste però un dai ponts di contrast jenfri
guvier scozês e guvier britanic. Cun di fat, nancje i incuintris des zornadis
stadis tra Salmond, il segretari di stât pe Scozie Michael Moore e il prin
ministri britanic David Cameron a àn permetût di fâ dai pas indenant
significatîfs intes tratativis su lis modalitâts par votâ. Dongje de date, di
fat, al reste ancjemò di sclarî il percors legjislatîf par rivâ al referendum,
se al vôt a podaran partecipâ ancje i fantats di 16 e 17 agns come che al
volarès il SNP, e fintremai se ae fin inte schede si metarà dentri ancje une
alternative su la incressite dai nivei di autoguvier. L’incuintri cun Salmond
al è stât costrutîf, al à dite Cameron, ma i progrès a son stâts pôcs. Pal prin
ministri britanic une forme plui fuarte di devoluzion e je pussibile, ma la
cuistion e varès di jessi lassade fûr dal referendum. Dongje de promesse di
plui autoguvier, Cameron al à però metût su la taule ancje lis consecuencis che
la Scozie e varès in câs di indipendence. Il prin ministri britanic al à dite
che no si pues pensâ a dividi tra i doi paîs sogjets tant che la BBC,
l’esercit, la marine o i armaments nucleârs che a son te base di Faslane, e
nancje a di une partecipazion condividude te Union Europeane e te NATO.
Font: BBC, 13, 16 e
26/02/12
Nessun commento:
Posta un commento