01/03/12

Paîs Catalans: presentâts i ultins dâts su la lenghe

Il catalan nol è une lenghe minoritarie, ma al à la stesse impuartance di lenghis tant che l’olandês o l’ongjarês. Lu à dite Josep-Anton Fernández, de segretarie de Plataforma per la Llengua, intant di un incuintri public là che a son stâts comunicâts i dâts inzornâts su la lenghe catalane. Cun cuasi 10 milions di personis che lu fevelin, il catalan al è in diesime cuarte posizion tra lis lenghis plui dopradis de Union Europeane. Daûr dai parametris di rilevance economiche di une lenghe al è invezit al vincjesietesim puest, denant di lenghis tant che il serp e il rumen. Il dât plui penç al è però chel de presince su internet, dulà che il catalan al è in otave posizion tra lis lenghis plui ativis.
Dâts positîfs a rivin po ancje sul front de penetrazion de lenghe inte societât, cun di fat intal ultin an si à viodût un salt indenant dal 29% intai letôrs di cuotidians par catalan, intant che tra i imigrâts rivâts a Barcelone si à il 30% di personis che a frecuentin cors di catalan cuintri dal 7% di pôcs agns indaûr. Intes scuelis primariis il catalan al è lenghe veicolâr tal 89% dai istitûts e in dutis lis universitâts publichis plui de metât des lezions a son fatis inte lenghe proprie de Catalogne. Il catalan nol è duncje une lenghe minoritarie, ma – e zonte la Plataforma per la Llengua – al reste minorizât in diviers setôrs. Intal cjamp de justizie, par esempli, lis sentencis par catalan si son sbassadis dal 14% al 6%; invezit, par chel che al rivuarde lis etichetis dai prodots, intal stât spagnûl a esistin 199 leçs che a oblein a fâlu par castilian, ma dome dôs che a previodin che si lu fasi par catalan. Di chi, duncje, la dibisugne di lâ indenant cu lis azions par judâ la lenghe a deventâ un patrimoni comun.
Font: El Mundo, 17/02/12

Nessun commento: