Dopo che par agns al jere lât dilunc a sbassâsi
il numar des personis che a fevelavin par galês, tra il 1991 e il 2001 si à vût
un cambiament di direzion. Un tant al è stât pussibil in gracie des politichis
linguistichis metudis in vore e massime par vie dal insegnament dal e par galês
intes scuelis. In spiete di cognossi i dâts dal ultin censiment, une ricercje
comissionade de sezion galese de radiotelevision publiche BBC e à palesât une
lenghe che e mostre ancjemò segnâi di dificoltât.
Tal 2001 582 mil personis a
jerin in stât di fevelâ par galês, ven a dî il 20,8% de popolazion residente ta
cheste nazion celtiche e il 2,1% in plui di dîs agns prime. A menaçâ chescj
risultâts però a son lis cifris de mortalitât e de emigrazion. Cun di fat, tra
chei che a àn il galês tant che lenghe native, si stime che ogni an 6.500 a
muerin e 5.200 a ledin a vivi fûr dal Gales. Si trate di cifris che i fruts che
a imparin la lenghe a fasin fature a sostituî, massime se si calcole ancje i
dâts su la imigrazion. Ancje par chest, daûr de inchieste de BBC Radio Cymru,
trê galês su cinc a disin che si à di incressi il status de lenghe. Pal 72% dai
intervistâts la strade miôr e je chê di sigurâ ator par dut il Gales la
pussibilitât di davuelzi il percors scolastic par galês.
Font: BBC, 13-14/02/12
Nessun commento:
Posta un commento