Esan Erran Irratia, radio che di cuasi cuindis
agns e trasmet in lenghe basche intune part de Navare, e à vût di sierâ lis sôs
trasmissions par vie dal azerament dai finanziaments che a rivavin de Comunitât
de Navare e dal Comun di Ultzama. Si trate – a disin i responsabii de
associazion Ametza, che e gjestìs la emitente – dal efiet di une politiche
metude in at za di un pôcs di agns par scjafoiâ ducj i progjets che a doprin
l’euskara.
In struc si pues dî che la linie metude in at dal guvier de Navare –
a zontin chei di Ametza – e je che ce che al è par spagnûl al è di ducj e ducj
a àn di paiâlu e ce che al è par basc a àn di paiâsal dut chei che a fevelin
par basc. I tais dai finanziaments a jerin tacâts za di agns, prime che si
fasès sintî la crisi, e cumò cun chê scuse si è rivâts al azerament. La
associazion e je impegnade a cirî di cjatâ fûr altris risorsis par viodi se si
rive a tornâ a tacâ e, intal framieç, e va indenant a publicâ la riviste par
basc Pulunpe.
Intant, intal Parlament de Navare, i
partîts spagnoliscj (PSN, PP e UPN) a àn boçât une propueste fate indenant di
Bildu e poiade di chei altris grups nazionaliscj e progressiscj (NaBai e I – E)
là che si domandave un impegn par un aument progressîf de lenghe basche intai
mieçs di comunicazion publics e privâts.
Font: Noticias de
Navarra, 29/01/12; Gara, 09/02/12
Nessun commento:
Posta un commento