Il Dipartiment talian pai afârs regjonâi
al à dât fûr une circolâr su la assegnazion dai fonts dal 2012 pe leç statâl che
e garantìs formis di tutele pes lenghis di dodis des comunitâts minorizadis che
a vivin intal stât talian (albanês, catalans, cravuats, francês,
francoprovençâi, furlans, grêcs, ladins, ocitans, sarts, slovens, todescs). Lis
risorsis metudis a disposizion a son in dut 1.768.792 euros, la cifre plui
basse mai metude di un guvier talian di cuant che la leç e je stade fate buine
intal 1999.
Pes dôs comunitâts plui gruessis, o sei sarts (sù par jù 1 milion
di personis) e furlans (passe 600 mil personis), a son stâts metûts sì e no 350
mil euros pai prins e 240 mil euros pai seconts. “O sin ae frase – a àn dite i
rapresentants dal Comitât 482 che al met adun passe 30 associazions furlanis,
slovenis e todescjis dal Friûl – cun chestis risorsis al è impussibil fâ ce che
e previôt la leç.”
Dut câs il tai des risorsis pes
comunitâts minorizadis nol interesse dome il guvier centrâl, ma ancje diviersis
aministrazions regjonâls. E je une situazion che e met a risi diviersis
realtâts impuartantis impegnadis intal promovi chestis lenghis, tant che il
mensîl ocitan Ousitanio Vivo che si è ricjatât cul tai totâl des risorsis de
bande de Regjon Piemont e che, se la situazion no ves di cambiâ, al riscje di
vê di sierâ la sô esperience.
Font: Comitât 482,
04/02/12; Ousitanio Vivo, 27/01/12
Nessun commento:
Posta un commento