Diviersis manifestazions di solidarietât
cu la lote dai imazighen (tuareg) dal Azawad a son rivadis dai moviments
nazionaliscj intal stât francês, a tacâ di Corsica Libera e de UDB de Bretagne.
Rapresentants di chescj moviments a àn ancje partecipât al presidi inmaneât ai
4 di Fevrâr denant dal palaç de Assemblee francese a Parîs. Sul finî di Zenâr,
di fat, la situazion intal Azawad, regjon dal Mali là che i imazighen a son
maiorance, e je deventade simpri plui penze cun scuintris violents tra il
Moviment Nazionâl di Liberazion dal Azawad e lis trupis statâls.
Lis autoritâts
dal stât african a vuelin cidinâ ogni forme di resistence e, par discreditâ il
MNLA, a acusin i militants imazighen di jessi aleâts de organizazion teroriste
al-Qaeda dal Maghreb Islamic (AQMI): une acuse cence fondis che e ven
contestade ancje di altris guviers africans. Dopo de fin de colonizazion
francese, l’Azawad al voleve la indipendence, ma al jere stât cjapât dentri tal
Mali. Cumò il stât francês, che al à ancjemò diviers interès inte regjon, al
podarès jessi clamât a fâ di mediatôr. I ultins scuintris a àn obleât passe 3
mil civîi a scjampâ in Mauritanie dopo che i lôr paîs a jerin stâts atacâts dai
soldâts. Lis ONG che a lavorin in Mauritanie a àn denunciât la mancjance di
jutori internazionâl pai dispatriâts.
Font: Galdu, 06/02/12;
Jeunes UDB, 06/02/12; Corsica Libera, 31/01/12
Nessun commento:
Posta un commento