Galizie: par Madrid il galizian nol è penalizât inte scuele

Pal guvier spagnûl il model di insegnament des lenghis in vore tes scuelis de Galizie al garantìs un sisteme ad in plen bilengâl che nol limite in nissune maniere il galizian e nol à bisugne di jessi sostituît cuntun a imersion. Al è scrit sul rapuart che al rispuint aes critichis rivadis dal comitât dal Consei de Europe che al viôt dal rispiet des misuris previodudis de Cjarte des lenghis regjonâls o minoritariis. La posizion dal esecutîf di Madrid e à lassât scaturidis lis realtâts impegnadis pal galizian, a partî de Mesa pola Normalización Lingüistica, che a ricuardin che la cussì clamade leç sul plurilinguisim volude dal guvier locâl e impedìs l’ûs dal galizian par diviersis materiis e e met la lenghe proprie tune posizion di subordenazion rispiet al castilian. Un cuart dai fruts sot dai 15 agns nol è in stât di fevelâ par galizian: un dât che – a disin – si pues spiegâ dome cu lis politichis agressivis metudis in at intai ultins agns cuintri dal galizian inte scuele e te radiotelevision. Pal moviment nazionalitari BNG no si capìs cemût che un guvier formât dal PSOE e di Unidas Podemos, che si definìs progressist, al puedi sostignî la politiche linguistiche reazionarie metude in at dal PP in Galizie.

Font: Galicia Confidencial, 16/02/21

Corsiche: proteste cuintri de riforme dai Capes

Ai 15 di Fevrâr lis realtâts sindacâls e associativis impegnadis pal insegnament dal cors (STC Éducation, AILCC, APC, SNALC e Parlemu corsu) a àn inmaneât un presidi denant de sede dal ufici scolastic regjonâl par protestâ cuintri de ordenance dade fûr sul finî di Zenâr dal ministeri francês pe educazion che cul 2022 e larà a modificâ i criteris di valutazion pai certificâts di abilitazion al insegnament intai istitûts di secont grât (Capes) de Corsiche dopleant il pês des competencis par francês (di 4 a 8 ponts) e sbassant il valôr di chês par cors (di 7 a 4 ponts). Pes associazions dai professôrs di lenghe corse cheste misure si insuaze tune politiche di agression aes lenghis minorizadis e dai spazis che a vevin rivât a concuistâ tai ultins agns in plui di penalizâ cui che al à plui competencis par cors. La denuncie e je stade puartade ancje tal Parlament francês dal deputât di Pè a Corsica Paul-André Colombani ma il ministri pe educazion Jean-Michel Blanquer al à refudât ogni acuse e al à rivât fintremai a dî che il probleme nol diven des misuris dal guvier ma dal lâ al mancul dal interès de int pes lenghis locâls: une afermazion che si scuintre però cul aument continuatîf de domande di insegnament des lenghis propriis.

Font: Corse Net Infos, 15-16/02/21

Paîs Catalans: maiorance assolude pai indipendentiscj

Intes elezions pal Parlament de Catalogne che si son tignudis in forme anticipade ai 14 di Fevrâr par vie dai intervents de magjistrature spagnole, l’indipendentisim nol à otignût la maiorance assolude dome sul plan dai elets ma ancje su chel dai vôts. La pandemie e à condizionât a fuart la partecipazion ma no avonde par invalidâlis. Intal front indipendentist la fuarce plui votade e je stade ERC che cul 21,3% des preferencis e à vût 33 deputâts (un di plui dal 2017), i vegnin daûr Junts per Catalunya cul 20,04% dai consens e 32 elets (2 in mancul de volte stade), la CUP cul 6,67% dai vôts e 9 parlamentârs (a front dai 4 dal 2017) e il PDeCAT che cul 2,72% des preferencis al è restât fûr dal Parlament. Pe prime volte, duncje, i partîts a pro de indipendence a àn vude la maiorance assolude ancje tes percentuâls di vôt (54%).

Cossovo: minorancis decisivis pe gnove maiorance

Tes elezions politichis cossovanis dai 14 di Fevrâr il moviment Vetevendosje al à cjapât plui dal 48% dai consens e 56 parlamentârs e al larà a vuidâ il paîs balcanic intai prossims agns. Il sucès al nas in primis de disilusion di une gruesse part de popolazion pes politichis e pai compuartaments di chei altris partîts che si vevin alternâts al guvier. Il Partît Democratic dal Cossovo (PDK) al à vût pôc plui dal 17% dai vôts e 20 elets, la Leghe Democratiche dal Cossovo (LDK) e je colade al 13% dai consens otignint juste 15 deputâts e la Aleance pal Avignî dal Cossovo (AAK) e à cjapât sù par jù il 7% des preferencis e 9 parlamentârs. La Srpska Lista, partît leât ad in dopli cul guvier di Belgrât, e à otignût ducj i 10 puescj risiervâts ae minorance serbe cul 5,54% dai vôts. A front di une maiorance parlamentâr di 61 elets e devente decisive la posizion dai rapresentants des comunitâts plui piçulis che si dividin chei altris 10 puescj garantîts aes minorancis. Cheste prospetive, pronosticade bielzà ae vilie dal vôt, e veve sburtât i partîts plui grues a lavorâ sot vie par indreçâ il vôt su chei candidâts des minorancis che ur jerin plui favorevui.

Font: Balkan Insight, 15/02/21

Gales: servizi gnûf par judâ l’ûs dal galês intes impresis

Par mieç di un gnûf ufici operatîf (Prosiect 2050), il guvier galês al à lançât il servizi Helo Blod che si propon di judâ lis impresis che a vuelin doprâ la lenghe proprie tes lôr ativitâts. Plui tal detai Helo Blod al ufrìs la pussibilitât di vê traduzions e revisions di tescj par galês (gratuitis fin a di une cierte cuantitât), jutoris e conseis su lis modalitâts miôr par doprâ la lenghe proprie tune ativitât economiche e materiâi par judâ a identificâ sul puest di vore lis personis in stât di fevelâ par galês o che a son daûr a imparâlu.

Font: Business Wales, 15/02/21

Galizie / León: passe mil students di galizian tal Bierzo

Intant de ultime riunion de comission di supervision dal protocol di colaborazion tra il guvier de Galizie e la zonte pe promozion de lenghe galiziane si à fat il pont sul insegnament de lenghe proprie ancje tes regjons di Bierzo e Sanabria che si cjatin inte comunitât di Castilie e León. Intal an scolastic 2020 – 2021 il galego al è materie o lenghe di insegnament in tredis centris di educazion infantîl e primarie par 904 arlêfs, in cuatri istitûts di educazion secondarie par 141 students e tal liceu linguistic di Ponferrada par 38 fantats. Al è il risultât di un acuardi tra lis dôs comunitâts che al previôt che la Galizie e meti a disposizion percors di formazion pai professôrs, materiâi didatics e linguistics. L’insegnament dal galizian tal Bierzo e in Sanabria al reste dut câs di nature volontarie.

Font: Galicia Confidencial, 14/02/21

Paîs Basc: acuardi EiTB - Euskaltzaindia su la cualitât de lenghe

Ai 12 di Fevrâr la radiotelevision publiche basche Euskal Irrati Telebista (EiTB) e la academie de lenghe basche Euskaltzaindia a àn sotscrit un acuardi trienâl che si propon di sburtâ e di slargjâ un model linguistic di cualitât. L’impegn al è duncje di rispietâ dutis lis normis e i criteris definîts de academie, ancje par mieç di percors di formazion dal personâl e dal disvilup di manuâi e glossaris di pueste pai professioniscj dal setôr. Tal stes timp si cirarà di valorizâ la ricjece des varietâts doprant i regjistris linguistics che si adatin miôr ai diferents contescj e moments de comunicazion. Euskaltzaindia e varà invezit a disposizion il corpus di tescj di EiTB pal so osservatori su la lenghe e par incressi il so materiâl di vore.

Font: Deia, 13/02/21

Paîs Catalans: proteste a Perpignan pal catalan a scuele

Ai 10 di Fevrâr i sindacâts CGT, SNES-FSU, Solidaris e FCPE a àn tignût un presidi di proteste denant dal ispetorât scolastic di Perpinyà / Perpignan par rivendicâ la normalizazion dal insegnament dal catalan inte Catalogne Nord sot aministrazion francese. Vuê come vuê tes scuelis dal teritori a son disponibilis dome dôs oris di lenghe e culture catalane par setemane e un numar cussì scjars di oris intes materiis tecnichis e sientifichis che si à di formâ classis mistis cun students monolengâi e bilengâi. I sindacâts a domandin aes autoritâts scolastichis francesis che a sedin garantidis sei lis oris che lis risorsis umanis e economichis suficientis a ufrî un insegnament di cualitât de lenghe proprie. Te Catalogne Nord a operin ancje lis bressolas, scuelis parificadis catalanis a imersion, che però no son avonde par dâi rispueste a dute la domande che e rive des fameis. In dì di vuê si àn siet scuelis primariis e une secondarie ma nissun istitût secondari di secont grât. Un tant al oblee i students, rivâts a di un ciert moment, a vê di bandonâ il percors scolastic par catalan, par passâ a chel francês. In 45 agns di esistence lis bressolas a son passadis di siet a di un miâr di students par an.

Font: France3 Regions, 10/02/21; Jornalet, 12/02/21

Galizie: partît il progjet pal ricognossiment vocâl par galizian

Il grup Trasno al à inviât il progjet “Common Voice en galego” cun chê di meti a disposizion la tecnologjie di ricognossiment vocâl ancje par galizian. Si trate di un servizi che al permetarà ai dispositîfs di telefonie mobile di “capî” e di “fevelâ” ta cheste lenghe ma ancje di garantî assistents vocâi, letôrs di tescj par personis cun disabilitât e altris imprescj par galizian. La prime fase dal progjet e previôt di tirâ dongje almancul 5 mil frasis curtis di ûs cuotidian (cumò a ‘nd è za stadis cjapadis sù 1.700) par vê une base suficiente par che la inteligjence artificiâl DeepSpeech e puedi elaborâ un model linguistic specific. Il progjet al larà po indenant cu la revision dai tescj, in maniere che a sedin ducj in galizian coret, e po cu la regjistrazion de lôr leture. Si trate di un lavôr une vore grues e par chest e je stade domandade la colaborazion ative des personis che a puedin contribuî mandant tra lis cinc e lis cincuante frasis ognidun.

Font: Galicia Confidencial, 09/02/21

Irlande: e torne a montâ la tension intal Nord

Un dai elements di fonde dai acuardis di pâs pe Irlande dal Nord al jere di eliminâ i controi dilunc dal confin che al divît in doi la isule. La jessude dal Ream Unît de Union Europeane e meteve risi il rispiet di cheste cundizion e par chest al è stât metût jù il cussì clamât protocol pe Irlande dal Nord che, in buine sostance, al previôt che i controi doganâi de Union no vegnin fats dilunc dal confin tra la Republiche di Irlande e lis Sîs Conteis dal Nord ma tai puarts nordirlandês dulà che a rivin lis marcjanziis de Grande Bretagne.

Paîs Basc: distintîfs di pueste pe polizie locâl euskaldun

Inte capitâl de Comunitât Autonome Basche, Vitoria Gasteiz, i agjents de polizie locâl che a son in stât di fevelâ par basc (euskaldun) a varan su la divise une spile cu la scrite euskaraz. Inta cheste maniere al sarà plui facil pai citadins savê cun cuâi membris dal cuarp che a puedin doprâ la lenghe proprie. Ancje tai locâi de polizie a saran specificadis lis postazions là che si à personâl in stât di fevelâ par euskara.

Font: EiTB, 05/02/21

France: dirits plui a risi cul “delit di separatisim”

Lis organizazions pai dirits civîi e diviers juriscj si mostrin preocupâts pal vie libare che la Assemblee francese e à dât al cussì clamât “delit di separatisim” che al previôt penis fin a cinc agns di preson e 75 mil euros di multe. La normative e je stade pensade par difindi la laicitât e i valôrs republicans dal stât e des sôs emanazions cuintri des menacis dal radicalisim islamic. La gnove leç però e lasse spazis di interpretazion che a podaressin puartâle a menaçâ dirits di fonde come chel di associazion o di espression.

Galizie: sburt par une planificazion linguistiche pai imigrâts

A son cumò disponibii ancje in rêt i risultâts de edizion XXII dai incuintris pe normalizazion linguistiche de Galizie. Chest an l’apontament al à vût come argoment centrâl chel de imigrazion. In Galizie si à sì e no il 2% dai migrants che a vivin intal stât spagnûl e, in tancj câs, a àn un leam dret cu la diaspore galiziane dal secul stât. Il document finâl dai incuintris al met in evidence che in Galizie no si aplichin lis politichis che a coventaressin par che la popolazion imigrade e puedi cjapâ sù competencis linguistichis par galizian. A mancjâ a son sei la planificazion gjenerâl che misuris specifichis intal cjamp educatîf. Si sugjerìs duncje di meti in cjamp un model operatîf che al à za mostrât di funzionâ ben come chel in vore te Comunitât Autonome Basche.

Font: Consello da Cultura Galega, 02/02/21

Europe: lis propuestis de ELEN ae Comission Europeane

Intant di un incuintri cu la direzion gjenerâl pe educazion e pe culture de Comission Europeane, i rapresentants de ELEN (European Language Equality Network), la Rêt Europeane pe Avualiance Linguistiche, a àn domandât che l’organisim di guvier de UE al meti in cjamp une rie di azions par garantî i dirits des comunitâts minorizadis. Dongje di ativâ un canâl di comunicazion continuatîf e diret jenfri Comission e ELEN, i delegâts de Rêt a àn domandât di meti sù un font european pes lenghis in pericul, di disegnâ une strategjie di suaze pes lenghis minorizadis, e di creâ un osservatori e un difensôr des lenghis. ELEN e à po domandât ae Comission che e fasi bon un mecanisim par garantî che i stâts membris a rispietin i dirits previodûts de Cjarte des lenghis regjonâls o minoritariis, che e promovi la avualiance linguistiche e che e combati i atacs e lis manifestazions di odi cuintri dai membris des comunitâts minorizadis.

Font: Galicia Confidencial, 02/02/21

Asturiis: tacâts su la RTPA i programs gnûfs in lenghe

Il prin di Fevrâr al è scomençât il prin dai siet progjets, doi radiofonics e cinc televisîfs, che la RTPA – la Radio Television dal Principât des Asturiis – e à selezionât par mieç di un bant straordenari finanziât dal guvier asturian cun 138 mil euros. I doi programs radiofonics a previodin une cuindisine di pontadis parom e a van in onde te fasse orarie tra 11 e mieze di gnot e miezegnot e mieze. Il prin program televisîf, invezit, al larà in onde cui 24 dal mês. Si trate di trê progjets documentaris, de riduzion di un spetacul teatrâl e di un program pai fruts. La programazion e ven judicade dal dut insuficiente de Xunta pola Defensa de la Llingua Asturiana (XDLA) che e à calcolât che vie pal 2021 lis trasmissions par asturian no rivaran nancje al un par cent des emissions complessivis de RTPA cundut che la emitente publiche e ricêf za 23 milions di euros ad an pes sôs ativitâts radiotelevisivis.

Font: Asturies.com, 01/02/21

Corsiche: fuarte mobilitazion pai presonîrs politics

Cundut des limitazions in at par fâi cuintri ae pandemie, a jerin uns 2 mil lis personis che si son dadis adun ai 30 di Zenâr a Corti par domandâ il rispiet dai dirits dai presonîrs politics cors. A convocâ la mobilitazion a son stadis la organizazion Ora di u Ritornu e la sezion locâl de Leghe pai Dirits dal om cun riferiment al câs di Pierre Alessandri e Alain Ferrandi che a son daûr a scontâ une condane al ergastul a Poissy, te regjon parigjine, in regjim di DPS (détenu particulièrement signalé) o sei chel di massime sigurece.

Cossovo: crepaduris intal model eletorâl “etnic”

20 dai 120 puescj dal Parlament dal Cossovo a son risiervâts aes minorancis etnichis. Di chescj, par solit, 10 a van a rapresentants de comunitât serbe e 3 a chei de minorance bosgnache. Tes elezions che si tignaran ai 14 di Fevrâr il moviment Vetevendosje al ven dât tor dal 48% dai consens, un risultât che i permetarès di guviernâ ancje dome cu la poie di cualchidun tra i deputâts des minorancis. Une prospetive che e preocupe e no pôc la part de comunitât serbe plui leade al guvier di Belgrât. Il vôt des minorancis al devente cussì centrâl intal scuintri politic. Ve che alore la Union Democratiche Sociâl e à acusât la Srpska Lista, partît leât ad in dopli cul guvier di Belgrât e che tes ultimis elezions al à simpri otignût ducj i dîs puescj risiervâts ae minorance serbe, di zuiâ sporc. Si stime che il partît al puedi fâ stât su almancul 10 mil vôts in plui di chei che i coventin par sigurâsi i dîs deputâts e che ju implearà par mandâ in Parlament candidâts “amîs” che si presentin intes listis di altris minorancis. Sot de lint a son in particolâr il partît bosgnac de Comunitât Unide (Ujedijnena Zajednica) e il moviment Iniziative Rom. Dut câs, a movisi ta cheste direzion, no saressin dome i serps. Di fat al è stât segnalât ancje il câs di un candidât albanês che si presente cul Gnûf Partît Democratic, che al varès invezit di rapresentâ i bosgnacs.

Font: Balkan Insight, 28-29/01/21

Estonie: nissun plan par sierâ lis scuelis di lenghe russe

Il ministri pe aministrazion publiche Jaak Aab al à comunicât che il gnûf guvier de Estonie nol à in program di sierâ lis scuelis che a doprin il rus come lenghe veicolâr. Intant de formazion dal esecutîf e de scriture dal program di guvier a jerin stadis vôs che a fevelavin de sierade dai istitûts rus e de modifiche de normative in vore su la istruzion. Vôs che il ministri al à smentît spiegant i contignûts dal acuardi di guvier. In dì di vuê, al à dite, a son za tancj i fruts che a rivin di fameis russofonis che a frecuentin scuelis cul eston veicolâr e ancje tai istitûts là che il rus al è la lenghe principâl, il 40% des materiis a son insegnadis par eston. Ce che il guvier al fasarà – al à dite Aab – al è dome dâ rispueste ae scjarsetât di personâl che al vedi l’eston come prime lenghe cu la assunzion di 50 insegnants che tal 2021 a jentraran in servizi tes scuelis de infanzie de minorance russe.

Font: News ERR, 28/01/21

Ocitanie: proteste dai professôrs di ocitan

Ai 26 di Zenâr i professôrs di ocitan a àn manifestât a Montpelhièr / Montpellier, Tolosa / Toulouse, Nimes / Nîmes e in altris citâts de Ocitanie cuintri des politichis metudis in at dal guvier francês par limitâ e precarizâ simpri di plui l’insegnament de lenghe proprie, a partî de riforme de educazion secondarie volude dal ministri Blanquer. Lis iniziativis di proteste a son stadis clamadis adun dal sindacât FÈLCO inte suaze di une zornade di mobilitazion dal sisteme educatîf francês cuintri de gjestion de crisi sanitarie e dei nivei pe formazion des classis, e par une revision dal tratament salariâl.

Font: Jornalet, 27/01/21

Paîs Basc: fat bon il plan strategjic 2021-2023 di PuntuEUS

Il diretîf de fondazion PuntuEUS al à valutât cun sodisfazion lis ativitâts davueltis inte dade 2016-2020 e al à fat bon il plan strategjic 2021-2023. Il program che si à a pene sierât al veve tant che obietîf di fonde di slargjâ l’ûs dal domini .eus framieç de societât basche. La fondazion e stime di vê otignût i risultâts che si proponeve dal moment che i sîts internet che a doprin chest domini a son passâts di 4.903 a 11.927 cuntune incressite dal 242%. L’obietîf dal plan gnûf al è di fâ deventâ .eus il domini principâl intal mont digjitâl di lenghe basche, ancje par mieç di un aument de cualitât e de sigurece dal servizi, e di sburtâ la trasformazion digjitâl de societât par mieç dal euskara.

Font: Domeinuak, 26/01/21