Intes
elezions pal Parlament de Catalogne che si son tignudis in forme
anticipade ai 14 di Fevrâr par vie dai intervents de magjistrature
spagnole, l’indipendentisim nol à otignût la maiorance assolude
dome sul plan dai elets ma ancje su chel dai vôts. La pandemie e à
condizionât a fuart la partecipazion ma no avonde par invalidâlis.
Intal front indipendentist la fuarce plui votade e je stade ERC che
cul 21,3% des preferencis e à vût 33 deputâts (un di plui dal
2017), i vegnin daûr Junts per
Catalunya cul 20,04% dai consens e 32
elets (2 in mancul de volte stade), la CUP cul 6,67% dai vôts e 9
parlamentârs (a front dai 4 dal 2017) e il PDeCAT che cul 2,72% des
preferencis al è restât fûr dal Parlament. Pe prime volte, duncje,
i partîts a pro de indipendence a àn vude la maiorance assolude
ancje tes percentuâls di vôt (54%).
I gnûfs ecuilibris jessûts
dal vôt a oblein ERC a vuidâ lis tratativis par formâ il gnûf
guvier catalan. La strade primarie e je chê di une coalizion formade
di ERC, JxCat e CUP ma lis diferencis strategjichis e politichis
mostradis intai ultins agns no facilitin il percors. La CUP –
espression de çampe radicâl indipendentiste – che e à plui che
dopleât la sô rapresentance in Parlament e torne decisive pe
formazion dal gnûf guvier. En Comú
Podem, che e je pal dirit ae
autodeterminazion ma no pe indipendence unilaterâl, cul 6,87% e à
pierdût cualchi consens ma e à mantignût i siei 8 deputâts. Intal
front spagnolist i ecuilibris a son cambiâts une vore rispiet aes
elezions stadis. I socialiscj, che a zuiavin il caric presentant come
candidât ae presidence in plene pandemie il ministri spagnûl pe
salût Salvador Illa, a àn recuperât consens deventant, ancje se di
pôc, il partît plui votât cul 23,04% dai vôts e 33 elets. La
diestre spagnoliste e à viodût la colade verticâl di Ciudadanos
che dal 25,9% a son passâts al 5,57% cjapant a pene 6 deputâts (30
in mancul de volte stade) e la jentrade di fuarce di Vox,
partît de estreme diestre, che cul 7,69% di preferencis e 11 elets
al jentre pe prime volte te Assemblee catalane, intant che il PP cul
3,85% dai vôts e 3 parlamentârs (un di mancul dal 2017) al devente
simpri plui margjinâl.
Font:
VilaWeb,
15/02/21;
Naiz:, 15/02/21
Nessun commento:
Posta un commento