Bretagne: acès cence precedents par Brezhoweb

Ta chest periodi là che cetantis personis e massime i fruts a son obleâts a restâ a cjase, l’acès ai contignûts di Brezhoweb al à fat un grues salt indenant. Dome te setemane dai 23 ai 29 di Març i materiâi viodûts a son stâts plui di 60 mil. Brezhoweb e je une plateforme televisive digjitâl gratuite che e propon contignûts audiovisîfs zirâts, dopleâts o sottitulâts par breton. Par vignî incuintri a cheste incressite te domande, i lavoradôrs de television a son cumò impegnâts a incressi ancjemò di plui il materiâl disponibil in rêt, cuntune atenzion particolâr ai prodots utii ancje sul plan de didatiche. Il progjet al è poiât de regjon aministrative de Bretagne e dai dipartiments di Penn-ar-Bed / Finistère, Mor Bihan / Morbihan e Aodoù-an-Arvor / Côtes d’Armor.

Font: Agence Bretagne Presse, 01/04/20

Paîs Basc: intese par promovi l’euskara in Ipar Euskal Herria

Ai 31 di Març il guvier de Comunitât Autonome Basche e l’Ufici public de lenghe basche (Euskararen Erakunde Publikoa) che al opere tal Paîs Basc setentrionâl sot aministrazion francese (Ipar Euskal Herria) a àn rinovât l’acuardi par promovi in maniere unitarie l’euskara. Ancje pal 2020 la intese e previôt un impegn finanziari di un milion e 930 mil euros, 400 mil metûts de Comunitât Autonome Basche. Tra lis ativitâts là che si larà a colaborâ dilunc vie dal an si à une certificazion linguistiche uniche pal nivel B2 e il disvilup des versions euskara – francês e francês – euskara dal tradutôr neuronâl Itzuli.

Font: Diario Vasco, 31/03/20

Paîs Catalans: campagne par vê il catalan su Disney+

La ultime setemane di Març e je stade screade tal stât spagnûl Disney+, la plateforme digjitâl che e ufrìs lis produzions dal colòs american e di altris compagniis che i son leadis. Cundut che tancj dai titui proponûts a àn za une version par catalan, dispès fate cun jutoris publics, e che i catalans a rapresentin un marcjât potenziâl di dîs milions di personis, la plateforme e propon lis sôs produzions e si presente cuntun implant di navigazion dome par castilian. Cheste decision discriminatorie e à sburtât la organizazion Plataforma per la Llengua a inviâ une campagne là che par mieç dal sît canvia.cat si stice i catalans a inviâ letaris di proteste ae sede centrâl, a chê europeane e a chê iberiche de Disney. La situazion e veve bielzà jevât la proteste uficiâl dal guvier catalan.

Font: PFPLL, 31/03/20

Ocitanie: la riviste digjitâl Jornalet e finìs vot agns

Ai 31 di Març dal 2012, in contemporanie cu la grande manifestazion pe lenghe ocitane a Tolosa / Toulouse, al saltave fûr Jornalet, riviste digjitâl che e ufrìs informazions cuotidianis par ocitan. Passâts che a son vot agns, la plateforme informative e à vût cuasi 2 milions di visitadôrs e cuasi 5 milions di pagjinis letis. Vie pal an passât, i articui lets a son stâts plui di 41 mil, o sei passe un miâr in dì: cifre pardabon impuartante par une comunitât come chê ocitane che te plui part e je ancjemò analfabete te sô lenghe proprie.

Europe: la crisi in at e cres la discriminazion linguistiche

La crisi sanitarie e economiche leade ae pandemie no pues deventâ une scuse par dineâ i dirits linguistics pai citadins che a fevelin une lenghe divierse di chê dal stât. A marcâlu al è il Consei de Europe che al segnale cun preocupazion che diviers dai stâts membris a àn ufiert diretivis, racomandazions e informazions dome tes lenghis statâls cence tignî cont des comunitâts minorizadis. Un tant, al ricuarde l’organisim internazionâl, al rapresente un compuartament discriminatori e contrari ae Cjarte europeane des lenghis regjonâls o minoritariis e ae Convenzion cuadri pe protezion des minorancis nazionâls che la plui part di chei stes stâts si son impegnâts a rispietâ. Chest nol vâl dome pes diretivis e pes informazions leadis ae salût publiche, ma ancje pal insegnament a distance o pai programs des televisions publichis cun fins didatics che par solit a son dome tes lenghis statâls. Un tant al sucêt sei tai stâts come chel talian là che la discriminazion linguistiche e je certificade zaromai di timp ma ancje ta chei, come chel spagnûl, là che il nivel di tutele par solit al è miôr. Ancje il comissari pes minorancis nazionâls de OSCE, Lamberto Zannier, al è intervignût par domandâ che i stâts a garantissin “servizis di fonde tes lenghis des diviersis comunitâts, massime par chel che al tocje la salût e lis comunicazions leadis ae crisi in at”, cence dismenteâ l’ûs des lenghis propriis intai programs di insegnament a distance.

Font: PFPLL, 27/03/20

Bretagne: al lavôr pe indipendence cun Douar ha Frankiz

Al à non Douar ha Frankiz (Tiere e Libertât) il gnûf progjet che un grup di militants bretons al è daûr a imbastî cun chê di ufrî ai citadins de Bretagne une alternative indipendentiste, confederaliste, ecologjiste e feministe. Dopo di vêsi confrontâts cui simpatizants e vê metût jù lis primis liniis di fonde dal moviment, i ideadôrs de iniziative a son cumò impegnâts a slargjâ lis adesions e a tirâ sù altris contribûts par disvilupâ un program il plui condividût pussibil. Il prin obietîf par confrontâsi cu la rispueste dai citadins a saran lis elezions regjonâls dal 2021 là che il moviment si propon di zontâ la presince eletorâl aes iniziativis sociâls e di lote puartadis indenant sul teritori. L’intindiment al è chel di lavorâ par fâ sù la sovranitât bretone ancje di dentri des istituzions. I ativiscj di Douar ha Frankiz a rivin pe plui part di esperiencis militantis tant che Breizhistance e Breizh o Stourm.

Font: Agence Bretagne Presse, 26/03/20

Scozie: si infuartìs il sisteme di scuele in linie pal gaelic

A front de sierade des scuelis scozesis par vie de emergjence epidemiologjiche in at, si à sveltît l’inseriment di materiâi gnûfs su Giglets Gàidhlig, il progjet che al ufrìs percors di aprendiment multimediâl in linie pai students di gaelic. Si trate di un sisteme che al jere za doprât dal 90% dai istitûts scolastics a imersion cun passe 600 insegnants e 4.500 students iscrits. Il program al met a disposizion dai students cetantis risorsis didatichis in forme di test, ilustrazion, animazion, audio e video e al è rivât cumò a di un archivi di uns 100 volums e 68 audiolibris par gaelic. Cun di plui al permet di slizerî il lavôr dai insegnants no dome sul plan de preparazion dai materiâi, ma ancje te valutazion dai progrès fats dai students. Il sisteme al à cumò cressût lis misuris di assistence in linie par judâ professôrs, students e fameis intai percors di studi a distance.

Font: Bord na Gàidhlig, 26/03/20

Irlande: al esam dal public il pluripremiât «Arracht»

Cun Avrîl e tache la distribuzion di «Arracht» (il mostri) il cine in lenghe irlandese premiât in Març tant che miôr pelicule te edizion 2020 dal festival cinematografic internazionâl di Dublin (DIFF) dulà che al à otignût ancje il premi pal miôr atôr protagonist (Donal O Healai). Il film dal regjist Tom Sullivan al veve za otignût il premi dal public intal festival cinematografic di Glasgow (GFF) e critichis cetant positivis in altris rassegnis internazionâls. La storie e je ambientade tor dal 1845, tai agns de grande fam (An Gorta Mór) che tra muarts e espatriâts e à smiezât la popolazion de isule dant un colp mortâl ancje ae lenghe irlandese. Il film al fâs part dal progjet Cine4, metût adun de television publiche gaeliche TG4, di Screen Ireland e de autoritât irlandese pal audiovisîf par disvilupâ produzions cinematografichis origjinâls in lenghe irlandese e si insuaze tun percors di incressite de cualitât e de atenzion dal public pes produzions inte lenghe proprie de Irlande.

Font: Dublin Gazette, 10/03/20

Paîs Basc: proteste pai dirits dai presonîrs bascs in France

Par vie des limitazions leadis ae pandemie di coronavirus, lis trente iniziativis inmaneadis pai 8 di Avrîl dai Artesans pe pâs e di Bake Bidea intal Paîs Basc setentrionâl a àn vût di jessi scanceladis. La mobilitazion e jere stade imbastide par denunciâ lis politichis judiziariis e carcerariis repressivis metudis in at dal stât francês cuintri dai militants di ETA cundut che la organizazion no je plui in ativitât di un biel pieç e che il so disarmament al è rivât insom za trê agns indaûr. Il câs plui evident al è chel di Ion Kepa Parot, Jakes Esnal e Xistor Haranburu che propit ai prins di Avrîl a rivaran a trente agns di preson continuade si ben che, daûr de legjislazion francese, a podaressin jessi za di dîs agns in libertât condizionâl. Dutis lis domandis di acès aes misuris detentivis alternativis e ai sconts di pene che i trê presonîrs a varessin dirits a son stadis blocadis in maniere sistematiche dai publics ministeris. Viodût che lis manifestazions publichis a son saltadis, al è stât il stes coletîf dai militants bascs impresonâts a cjapâ la iniziative e al à invidât i citadins a scrivi tra i 25 di Març e i 8 di Avrîl une letare ae ministre pe justizie Nicole Belloubet e al president francês Emmanuel Macron par che a metin fin a cheste politiche repressive che e puarte dome dam ae gnove clime politiche e sociâl che si à inviade cu la fin de lote armade.

Font: Naiz:, 19/03/20

Scozie: nuie referendum su la indipendence tal 2020

Vie pal 2020 no si tignarà il gnûf referendum su la indipendence de Scozie. La conferme e je rivade dal stes guvier scozês intune comunicazion uficiâl inviade al esecutîf britanic là che si spieghe che chest an ducj i sfuarçs des istituzions scozesis si centraran inte lote cuintri de pandemie di coronavirus. Dutis lis formazions politichis rapresentadis intal Parlament scozês, ancje se cun acents diferents, a àn preseât cheste decision. Al è di dî che il guvier vuidât di Nicole Sturgeon si cjatave za tune posizion delicade, strent tra il dinei dal esecutîf britanic di poiâ un secont referendum e lis critichis dai moviments sociâi a pro de indipendence che lu calcolavin masse malsigûr intal imbastî la gnove consultazion.

Font: Naiz:, 18/03/20

Europe: reazions des comunitâts minorizadis al coronavirus

La pandemie di coronavirus no sparagne nissun lûc e nissune comunitât. Ancje lis nazionalitâts minorizadis europeanis a pain duncje i efiets di cheste situazion a partî de scancelazion di cetancj events in program, sedino di nature politiche, culturâl o linguistiche.

Stât spagnûl: critichis ONU sul rispiet dai dirits des minorancis

Lis istituzions spagnolis a àn vût une reazion rabiose denant dal rapuart presentât inta chestis zornadis dal relatôr speciâl de ONU su lis minorancis, Fernand de Varennes, su la fonde de visite fate vie pal 2019 intal stât spagnûl. Il document al met in evidence in particolâr la diference marcade che si à tra il ricognossiment formâl dal basc, dal catalan e dal galizian tant che lenghis couficiâls e la situazion che si à te realtât, massime tal sisteme judiziari e in part ancje ta chel educatîf. In Catalogne e tes isulis Baleârs si à po une incressite dai pidiments intal ûs de lenghe proprie in diviers servizis publics. De Varennes al segnale l’aument des leçs e dai pronunciaments judiziaris che a infuartissin la posizion dal castilian che, a so parê, a van fintremai cuintri de costituzion spagnole. Al cite in particolâr i atacs cuintri dal sisteme educatîf catalan, judicât invezit un model positîf sul plan internazionâl. No si pues acetâ – al zonte il relatôr de ONU – che e passi la idee che insegnâ tune lenghe minorizade al sedi alc di discriminatori, cuant che invezit al è juste il contrari. Cun riferiment al procès di autodeterminazion de Catalogne, De Varennes al à ricuardât l’aument preocupant ator pal stât spagnûl di atacs verbâi e ancje fisics anticatalans. Lis autoritâts statâls a àn contestât i contignûts dal rapuart dineant fintremai situazions – come chê de discriminazion des lenghis minorizadis inte justizie – che a son sostignudis di cetancj esemplis.

Font: VilaWeb, 16/03/20

Bulgarie: la EFA e domande di rispietâ i dirits dai macedons

La organizazion politiche internazionâl Aleance Libare Europeane (EFA, European Free Alliance) e à riclamât il guvier de Bulgarie par che al ricognossi e al rispieti i dirits de minorance macedone e par che i fasi cuintri a ogni tentatîf di limitâ la libertât di associazion. Cun di fat, i uficis dal ministeri de justizie a àn domandât al tribunâl regjonâl di Blagoevgrad di gjavâ de liste dai ents ricognossûts la Associazion civiche pe protezion dai dirits umans individuâi di fonde, organizazion leade ae minorance macedone che e jere stade regjistrade sul principi di chest an. Si trate dome dal ultin episodi denunciât dal partît Omo Iliden Pirin – moviment rapresentatîf de minorance macedone e membri de Aleance Libare Europeane – che al lamente lis discriminazions patidis e la violazion continuative dai dirits di cheste comunitât. La EFA e à ancje domandât ae Comission europeane di intervignî su lis istituzions de Bulgarie par che a rispietin i dirits des minorancis.

Font: EFA, 16/03/20

Paîs Catalans: l’OPLC al à decidût il plan di azions pal 2020

Ai 11 di Març si è dade adun la assemblee gjenerâl dal ufici public de lenghe catalane (OPLC) che al è nassût l’an passât par planificâ e meti in vore la politiche linguistiche te Catalogne dal Nord sot aministrazion francese. I sîs membris fondadôrs di cheste agjenzie a son il guvier francês, la regjon aministrative Ocitanie Pireneus – Mediterani, il dipartiment dai Pireneus Orientâi, il comun di Perpinyà / Perpignan, il sindacât intercomunâl pe promozion des lenghis ocitane e catalane (SIOCCAT) e la universitât “Perpignan Via Domitia”. La assemblee e à fat bon il plan di azions pal 2020, si è indotade di un belanç anuâl di 367 mil euros, e e à metût sù trê comission di lavôr tematichis che si ocuparan di aprendiment e trasmission, di ûs e difusion, e di comunicazion e cognossince.

Font: La Semaine du Rousillon, 14/03/20

Ucraine: trê modei scolastics diviers pes lenghis minorizadis

Il president ucrain Volodimir Zelenskij al à ratificât la leç di riforme dal sisteme educatîf fate buine dal Parlament che e previôt trê modei linguistics diferents pes diviersis minorancis che a vivin intal paîs. Il prin al è pensât pes comunitâts che no àn un stât daûr e che a son dislidrisadis dal lôr teritori origjinari, tant che i tatars de Crimee, e al previôt l’insegnament inte lôr lenghe native compagnât di un studi aprofondît dal ucrain. Il secont model al è invezit indreçât aes minorancis nazionâls che a fevelin une des lenghis de UE, tant che rumens e ongjarês (che, par numar, a rapresentin la seconde e la tierce minorance dal paîs), e al previôt un slargjament progressîf de presince de lenghe statâl che e partìs di cualchi ore tes primariis par rivâ almancul al 60% tes superiôrs. Il tierç model al vâl par chês altris minorancis (a partî di chê russofone) e dopo di une presince plui marcade de lenghe proprie tes primariis al previôt che tes secondariis l’ucrain al sedi doprât almancul pal 80% des oris di insegnament.

Font: Ukrainian News, 13/03/20

Paîs Basc: cun Aditu trascrizions automatichis par euskara

L’istitût sientific basc Elhuyar al à creât la plateforme informatiche Aditu (capî) che e permet la trascrizion automatiche di discors, conversazions e frasis par euskara e par castilian. Il ricognossiment dal fevelât al permet la trascrizion e la sottitulazion automatiche di audios e videos cun aplicazions pussibilis no dome tal setôr audiovisîf ma ancje tai mieçs di comunicazion, tai servizis ufierts des aministrazions publichis, tai mecanisims di assistence digjitâl e tal cjamp de acessibilitât pes personis cun disabilitâts. La plateforme, che par cumò e je disponibile a paiament, e ufrìs ancje une interface che, se al covente, e permet di comedâ a man lis trascrizions e i sottitui creâts di Aditu.

Font: EiTB, 12/03/20

Galizie: rapuart di A Mesa su la violazion dai dirits linguistics

Ai 12 di Març la organizazion galiziane A Mesa pola Normalización Lingüistica e à presentât il rapuart su lis segnalazions racueltis vie pal 2018 de Liña do Galego, il servizi creât par cjapâ sù lis denunciis su la violazion dai dirits linguistics. L’an passât lis segnalazions rivadis a son stadis 318, 15 in plui dal an prime. Il 45,28% des denunciis al diven dal compuartament des aministrazions publichis, cuasi un tierç a son riferidis al guvier de Comunitât autonome de Galizie. Chês altris segnalazions a tocjin pal 32,7% lis impresis gjestoris di servizis publics, pal 12,26% lis aziendis privadis e pal 9,75% i istitûts bancjaris. In ocasion de presentazion dal rapuart si à ancje riferît sui câs denunciâts intai agns stâts e che, propit in gracie de visibilitât dade aes segnalazions dai citadins, a son stâts comedâts daûr di ce che e previôt la normative. Intant de iniziative si à ancje ricuardât il rapuart definitîf presentât cualchi zornade prime dal relatôr speciâl de ONU su lis minorancis, Fernand de Varennes, là che si bat massime su la dibisugne di riviodi la cussì clamade leç sul plurilinguisim che e pidimente l’insegnament de lenghe proprie tes scuelis de Galizie.

Font: Galicia Confidencial, 12/03/20

ONU: in difese dal insegnament intes lenghis minorizadis

Intun rapuart presentât a Gjinevre ai 11 di Març, il consei dai dirits umans de ONU al riclame i stâts sui vantaçs che a divegnin dal insegnâ te lôr lenghe proprie ai fruts che a partegnin a comunitâts minorizadis. Sul lunc periodi l’insegnament inte lenghe de comunitât, dongje di chê statâl, al permet di miorâ i risultâts scolastics, di incressi i nivei di alfabetizazion e di fluence tes dôs lenghis, di sbassâ il numar dai zovins che a bandonin la scuele e di aumentâ la inclusion des fameis e de comunitât. Studiâ te lenghe proprie al jude ancje la autostime. Par cuintri, cuant che la lenghe de comunitât di partignince e ven lassade fûr dal insegnament, si costruìs un ambient che al favorìs la esclusion e la discriminazion. Une situazion, cheste ultime, che la ONU e calcole contrarie ai oblics leâts al rispiet ai dirits umans di fonde.

Font: EuropaPress, 12/03/20

Gales: ancje par galês i avîs in passe 170 stazions feroviariis

Dopo des segnalazions fatis indenant di diviersis realtâts impegnadis pai dirits linguistics, Transport for Wales (TfW) – la compagnie feroviarie cjapade in man plui di un an indaûr dal guvier dal Gales – e à fat savê che 171 des 222 stazions gjestidis de societât a son cumò indotadis di un sisteme di informazions audio ancje par galês. Al moment de acuisizion de compagnie, a pene un cuart des stazions a vevin un sisteme di comunicazion automatic in stât di doprâ in maniere corete ancje la lenghe proprie. Si à vût duncje di comprâ une tecnologjie adate che, dopo di jessi stade sperimentade sul finî dal an passât in cinc stazions e je stade cumò slargjade ancje te maiorance di chei altris scjâi gjestîts de compagnie. Dongje des informazions gjenerâls, il gnûf sisteme di avîs al permet di informâ in timp reâl i utents ancje sui cambiaments dal ultin moment.

Font: Railpro, 12/03/20

Cornualie: campagne par meti i cornics tal prossim censiment

Dick Cole, leader dal partît nazionalist cornic Mebyon Kernow, al à scrit al prin ministri, al ufici di gabinet e al ministeri dal interni dal guvier britanic par domandâ che tal censiment dal 2021 si previodi une vôs là che i citadins a puedin declarâsi di nazionalitât corniche, compagn di ce che al sucêt pai scozês, pai galês e pai irlandês dal Nord. Ta cheste maniere il guvier di Londre al darès un segnâl simbolic impuartant de sô volontât di rispietâ i impegns cjapâts cu la ratifiche de Convenzion cuadri pe protezion des minorancis nazionâls e di no fâ discriminazions cun chês altris comunitâts nazionâls che a formin il Ream Unît. Ai 4 di Març, fieste nazionâl de Cornualie, il prin ministri britanic al à dite un pâr di peraulis par cornic inte Cjamare dai Comuns ma – al dîs Cole – par mostrâ pardabon il rispiet par une comunitât a coventin ats concrets e invezit il guvier di Londre al à za mostrât di vê discriminât i cornics cuant che te gnove version dal passepuart al à cjapât dentri tescj par gaelic scozês, irlandês e galês ma no te lenghe proprie de Cornualie. Il rapresentant dal Mebyon Kernow al à invidât i citadins cornics a scrivi ancje lôr al guvier britanic par pretindi di vê ricognossude la lôr nazionalitât intal prossim censiment gjenerâl.

Font: Mebyon Kernow, 05/03/20