Sardegne: tes aministrativis e cres la presince indipendentiste

Ai 30 e ai 31 di Mai in Sardegne si à votât par rignuvî lis vot aministrazions provinciâls e chês di diviers comuns de isule. In trê des provinciis sardis la vitorie e je lade ai candidâts dal centri çampe, in dôs a chei dal centri diestre. Par cognossi i vincidôrs di chês altris trê provinciis si varà invezit di spietâ il secont turni eletorâl. Par chel che al rivuarde il front autonomist, il PSd’AZ si à presentât cu la aleance di centri diestre cun risultâts che a van dal 4,36% de provincie dal Surcis – Iglesiente / Carbonia – Iglesias al 12,83% di chê di Nùgoro / Nuoro, là che al è il prin partît de coalizion. In spiete dal secont turni eletorâl, il partît sardist al à za siet conseîrs elets. I Rossomori, invezit, a àn sielzût di poiâ i candidâts dal centri çampe o de çampe cun risultâts che a van dal 0,40% di Aristanis / Oristano al 7,07% dal Campidanu / Medio Campidano e cun almancul doi conseîrs elets. In cuatri des vot provinciis sardis a corevin ancje candidâts de autoproclamade republiche di Malu Entu (une isulute pôc fûr de Sardegne) che in nissun câs a àn rivât a passâ l’un par cent dai vôts. A rapresentâ l’indipendentisim sart, invezit, al jere il moviment iRS (indipendentzia Repubrica de Sardigna) che intes provinciâls al à cjapât passe 32 mil vôts e al à cuasi triplicât lis percentuâls otignudis dai siei candidâts, passadis di une medie dal 1,48% intal 2005 al 3,86% di chest an. A cressi a son stâts ancje i elets intai conseis provinciâls che a son passâts di un a trê. Il moviment al è ben inlidrisât massime intes provinciis di Tàtari / Sassari (6,49% pal candidât president e 5,83% pe liste) e di Aristanis / Oristano (5,85% pal candidât president e 5,79% pe liste). Di segnalâ ancje la elezion dal prin sindic di iRS su la isule, si trate di Mario Satta intal comun di Pèifugas / Perfugas.

Font: L’Unione Sarda, 01/06/10; La Repubblica, 01/06/10; iRS, 02/06/10

Irlande: sisteme gnûf di finanziament pai progjets pal gaelic

Ta chestis zornadis, Foras na Gaeilge, l’organisim di riferiment pal gaelic irlandês, al à presentât il gnûf sisteme di finanziament dai progjets pal svilup di cheste lenghe. Al jere zaromai di cualchi mês che si veve tacât a lavorâi parsore cu la poie dal Consei Ministeriâl Nord Sud, che al fâs di coordenament tra la Republiche de Irlande e lis istituzions dal Nord de isule, e cu la colaborazion des organizazions ativis ta chest setôr. I progjets a fasaran riferiment a siet cjamps di intervent diferents, ven a dî: radios locâls; art; educazion; jutori pes fameis; setôr public; zovins; promozion e ricercje. Par ogni setôr a saran prontâts dai schemis di intervent cu lis prioritâts e cui fonts disponibii par chescj fins. Ogni an si proviodarà a di une revision dai schemis ancje su la fonde dai risultâts otignûts.

Font: Gaelport, 01/06/10

Paîs Catalans: ancje Sabadell al à votât su la indipendence

Ai 30 di Mai si à vût un gnûf apontament cu lis votazions popolârs su la indipendence de Catalogne. La consulte popolâr e à interessât la citât di Sabadell, la plui grande tra chês tocjadis fin cumò dal vôt. Suntune popolazion cun dirit di vôt di sù par jù 173 mil personis, a son stâts 23.870 chei che si son presentâts aes urnis metudis sù dai volontaris che a puartin indenant la campagne referendarie. Tra chei che a son lâts a votâ il 92,4% al à dite di sì ae indipendence de Catalogne. Cun cheste votazion si à passât il mieç milion di catalans che a àn partecipât al vôt su la indipendence.

Font: Avui, 31/05/10

Galizie: ricors cuintri dal decret sul “plurilinguisim” te scuele

Il principâl sindacât dai insegnants galizians, CIG-Ensino, al à confermât il ricors al tribunâl superiôr di justizie de Galizie cuintri dal decret sul ûs des lenghis inte scuele fat bon dal guvier galizian vuidât di Alberto Núñez Feijoo (PP). Il cussì clamât “decret sul plurilinguisim”, che al jentrarà in vore cul prossim an scolastic, al ven acusât dal sindacât, ma ancje des organizazions impegnadis pal galizian e dai partîts politics de oposizion, di jessi un atac cuintri de lenghe galiziane. Pai rapresentants sindacâi, il test al rapresente “il piês pas indaûr pe lenghe galiziane” e un “atentât” che al pant il dispresi che cheste aministrazion e mostre no dome pe lenghe, ma ancje pai insegnants.

Font: Vieiros Galiza Hoxe, 25/05/10

Gales: si slargje la domande di modificâ la leç sul galês

E va indenant la mobilitazion de Cymdeithas yr Iaith Gymraeg par modificâ il test de gnove leç su la lenghe galese. Pe associazion, che di agns e je in prime linie inte bataie pai dirits linguistics dai galês, la misure e je masse debule, no garantìs ae lenghe un status uficiâl e no da rispueste al avignî de television par galês S4C. Dut câs, la Cymdeithas no je la uniche a domandâ di tornâ a meti man al test: di resint un grup di avocats al à inviât une letare vierte là che al marche che il test fat indenant dal guvier galês, che al met adun laburiscj e nazionaliscj dal Plaid Cymru, al riscje di no vê un impat positîf su la politiche linguistiche e nol manten dutis lis promessis fatis in campagne eletorâl. A proponi dai cambiaments al test, dut câs, a son ancje dai membris de Assemblee nazionâl galese tant che Jonathan Edwards dal Plaid Cymru che al domande ai siei coleghis un sfuarç par miorâ il test almancul su trê ponts, o sei il status uficiâl dal galês, la indipendence dal comissari pe lenghe e l’aument dai dirits linguistics individuâi.

Font: Cymdeithas, 24/05/10

Ocitanie: seconde edizion dal Premi Ostana pes scrituris in lenghe mari

Ai 19 e ai 20 di Jugn si davuelzarà a Ostana, piçule comunitât de Ocitanie taliane, la seconde edizion dal Premi Ostana dedicât aes scrituris in lenghe mari. La iniziative e à chê di slargjâ la cognossince dai autôrs che a scrivin intune lenghe minorizade e di sburtâ l’ûs di chestis lenghis inte leterature e intes variis formis de comunicazion. La prime edizion dal premi si veve davuelte intal 2008 e e veve premiât il scritôr galizian Alfredo Conde e chel furlan Carlo Sgorlon. Ta cheste edizion il numar di sezions al è cressût di dôs a sîs: inte sezion internazionâl si à sielzût Witi Ihimaera (maori); ta chê dedicade aes comunitâts minorizadis dal stât talian il premi al è stât assegnât al scritôr sloven Boris Pahor; pe lenghe ocitane, invezit, la sielte e je colade su Ives Roqueta; te sezion des traduzions il premi al è lât a Arturo Viano; tra i zovins si à sielzût l’autôr messican Constantino Canales che al scrîf in lenghe huave; e, in fin, il premi speciâl al è stât dât al sart Gavino Ledda.

Font: Premi Ostana, 05/10

Il riç leterari 03 – Edorta Jimenez

Te tierce pontade de rubriche leterarie di Internazionalitari o tornìn intal Paîs Basc par fevelâ di Edorta Jimenez. Il tocut che si propon chi disot al è gjavât fûr dal romanç “Baleen berbaroa” publicât tal 1997 de cjase editore Txalaparta (publicât par talian tal 2003 cul titul “La voce delle balene” dal editôr Tranchida). Si trate di une conte lungje che si davuelç intal Paîs Basc vie pal secul XVI. La muart di un marinâr e sburte il zovin Sebastian a lâ plui a fonts ta chel che al pense che al sedi un sassinament. La sô ricercje lu puartarà a scuvierzi cetant di plui di chel che al varès pensât e a cjatâ fûr chê che e sarà la sô strade.

Al jere un satûl, di un len scûr preseôs che sul tapon al veve scrit il gno non cun letaris indoradis. Di aur a jerin ancje la clavute, la bochetute de clavarie e lis bertuelis daûr.

“Sù po om, vierzilu!”

Chel “sù po om” e jere la musiche dai agnui pes mês orelis. Plui che no dutis chês altris voltis che te mê vite mi vevin clamât “om”. O vierzei chel satûl. Par ducj i agnui dal Cîl e par ducj i diaui dal Unfier, ce che nol jere li dentri!

O tirai sù il tapon che tal so didentri al veve une sorte di sachete fodrade di sede turchine che, dentri vie, si lumave une bergamine. Cundut che chel che o viodevi al fos maraveôs tant che il Cîl, ce che al jere dentri al jere ancjemò plui biel dal arc di Sant Marc. I miei voi i rivarin sbrissant su la sede turchine.

“Sâr mestri, ce che al è?”

“Al è par te.”

A jerin ducj i imprescj che a coventin a di un pilote par imbastî une traviersade sigure: un compàs; un canocjâl, par svicinâ ce che al è lontan; une sfere armilâr par calcolâ i calendaris par cent agns cui lôr mês, i lôr dîs, lis lôr oris; une bussule; e, par finî, une clessidre che il so savalon blanc al slusive di fine purece.

“Gr… grazie une vore.” Cuasi no rivavi a dî peraule. “Us ai agrât une vore.”

“O soi jo che ti ai agrât.” Mi rispuindè tant che difûr si podevin sintî i pas di Martin.

Cuant che i disei “us ai agrât” mi visai che ducj chei che ju vevi sintûts a dî chel istès – Agirre, Luzien, barbe Juan e Zubiaur – a jerin dentri tune societât segrete. Mi vignì fintremai di pensâ che cul doprâ chês peraulis, sâr Zubiaur mi varès tignût par un membri di chê societât dome par vêlis sintudis sui miei lavris. Se e je vite ta chel altri mont al è di sperâ che si puedi jessi contents come che o ai stât jo ta chel moment. Se nol è cussì, alore miôr che no sedi!

Edorta Jimenez, nassût a Mundaka tal 1953, al à completât i siei studis universitariis cuntune lauree in filologjie basche. Al à publicât libris di poesie (cul pseudonim di Omar Nabarro), contis curtis e lungjis, e romançs, cun di plui al à ancje scrit senegjaturis par documentaris e par programs televisîfs e al à scrit par diviers cuotidians tant che Egin, Egunkaria e Gara e par rivistis. Doi dai siei romançs a son stâts publicâts ancje par talian: “Baleen berbaroa” (La voce delle balene, 2003, Tranchida) e “Azken fusila” (L’ultimo fucile, 2004, Tranchida). Par vê acès a plui informazions su chest scritôr e a diviersis des sôs oparis si pues lâ su cheste pagjine.

Paîs Basc: rapuart di Behatokia su la discriminazion linguistiche

Ai 20 di Mai la organizazion Behatokia e à presentât il so rapuart anuâl su lis violazions dai dirits linguistics patidis dai citadins bascs. Vie pal 2009, a son stâts plui di 1.400 i câs denunciâts a Behatokia, ven a stâi un numar plui alt di chel che si veve vût i agns prime. Chest al diven sei dal fat che lis aministrazions locâls a van dilunc a violâ i dirits linguistics, ma ancje che la cussience dai citadins bascs e je daûr a cressi ancje su chest front. La gnove diretore de organizazion, Garbiñe Petriati, su la fonde dai dâts cjapâts sù, e à spiegât che il guvier de Comunitât Autonome Basche nol à fat siei i conseis che i jerin stâts fats indenant par miorâ la situazion. In Navare, in buine sostance, la uniche lenghe de aministrazion e reste il castilian. Intal Paîs Basc francês, cundut de modifiche de Costituzion, la lenghe basche e reste fûr des istituzions.

Font: Gara, 21/05/10

Paîs Catalans: document dai gjornaliscj in difese dal Statût

Al à non “Il dileme spagnûl” il document sotscrit di 62 gjornaliscj catalans par denunciâ lis menacis che a pesin su la autonomie de Catalogne. Si trate di une sorte di manifest, viert ancje a altris adesions, che al invide lis istituzions spagnolis a rispietâ la voie di autoguvier dai catalans. “Se lis istituzions e i partîts politics no saran bogns di cjatâ une soluzion dignitose ae situazion che si cjatisi denant – si lei intal document – la realtât e oblearà i catalans a sielzi tra la involuzion e la secession”. I gjornaliscj che a àn sotscrit il test a disin che si cjatisi a vivi une situazion ecezionâl e che lis aspirazions di autoguvier dai catalans no puedin jessi limitadis doprant la Costituzion spagnole: duncje, se no si rive a dâ une rispueste a cheste volontât, i catalans si cjataran a vê di sielzi tra rinunciâ aes lôr aspirazions o ae Costituzion spagnole.

Font: Gara, 21/05/10

Paîs Catalans: il Parlament a pro dal ûs slargjât dal ocitan

La comission culture dal Parlament catalan, cul vôt dai partîts nazionaliscj e di chei di çampe, e à fate buine une risoluzion di poie al ûs sociâl de lenghe ocitane in ducj i siei teritoris. Intal document si ricuarde che l’ocitan al è uficiâl in Catalogne bielzà dal 2006 e si pant il desideri che cheste uficialitât si slargji pardut là che cheste lenghe e je fevelade. Si trate di un at politic di solidarietât che al vûl ancje rindi mert al percors di uficializazion dal ocitan inviât de citât di Tolose (Tolosa).

Font: Avui, 20/05/10

Galizie: fat bon tra lis protestis il decret sul ûs des lenghis

Ai 20 di Mai il guvier galizian vuidât dal popolâr Alberto Núñez Feijoo al à fat bon il decret sul ûs des lenghis inte scuele che al jentrarà in vore cul prossim an scolastic. Il test al à cjatât la oposizion di dutis lis organizazions impegnadis pal galizian, ma ancje dai sindacâts e dai partîts politics de oposizion. Socialiscj e nazionaliscj dal BNG a àn dite che la aprovazion dal decret e rapresente un atac cuintri de lenghe galiziane e che a intindin impugnâlu. Ancje i sindacâts principâi de Galizie a fevelin di incostituzionalitât dal test. Judizis inmò plui dûrs a rivin di organizazions tant che Queremos Galego, A Mesa pola Normalización Lingüística, Prolingua e Coordinadora de Equipas de Normalización e Dinamización Lingüística. Juste cualchi zornade prime, ai 17 di Mai, miârs di galizians si vevin dâts dongje pes stradis di Sant Jacum di Galizie (Santiago de Compostela) par difindi la lôr lenghe proprie e dî di no al progjet dal guvier in rispueste ae convocazion dal coordenament Queremos Galego. Si tratave de cuarte manifestazion di place inmaneade tal zîr di un an cuintri de politiche di limitazion dal ûs dal galizian metude in vore dal guvier dal PP.

Font: Vieiros Galiza Hoxe, 20-21 e 17-18/05/10

Sami: novitâts de revision de costituzion svedese

Il Parlament svedês al è daûr a lavorâ suntune revision de cjarte costituzionâl. Intal ultin stampon di revision i sami a vegnin citâts tant che popul e no plui tant che minorance etniche cemût che si podeve lei intes primis propuestis. Cheste definizion e varès di dâi plui fuarce ae comunitât sami svedese. Cun di fat, la cualifiche di popul e varès di garantî ai sami no dome la tutele dai dirits culturâi, ma ancje di chei politics e, duncje, ancje nivei di autonomie plui marcâts.

Font: Galdu, 20/05/10

Paîs Catalans: al va dilunc a cressi l’indipendentisim

Daûr di une inchieste publicade che al è pôc dal cuotidian La Vanguardia i catalans a pro de indipendence a son rivâts al 37% cuintri di un 41% che si declare contrari a cheste ipotesi. Il vantaç dai unioniscj sui indipendentiscj si à duncje sbassât al 4% cuant che intal Novembar dal 2008 al jere tor dal 14%. L’aument plui marcât dai favorevui ae indipendence – dal 22 al 35% – si lu à vût tra chei che par solit a votin socialist. Tra chei che a votin par chei altris partîts, invezit, la incressite e je mancul fuarte. La percentuâl plui alte di indipendentiscj (80%) si le cjate framieç di chei che a votin ERC. Tra chei che a votin CiU si è tor dal 40%, ma ancje tra chei che a votin pai popolârs si cjate un 10% di personis a pro de indipendence de Catalogne.

Font: Nationalia, 19/05/10

Ladinie: une femine prin “procurador” dal Comun General de Fascia

Ai 16 di Mai si son davueltis lis elezions aministrativis in passe 300 comuns dal Trentin e dal Sud Tirôl. Inte plui part dai comuns de provincie di Bolzan si à vût la vitorie di sindics poiâts de SVP. Chest partît al à ancje otignût cuatri sindics intai comuns ladins e si à mostrât fuart massime inte Val Gardene (Gherdëina). Ta chei altris comuns ladins a àn vinçût, inte plui part, des listis civichis. Il partît Ladins Dolomites si à presentât cul so simbul dome intal comun di Sëlva, là che al à cjapât il 23,9% dai vôts. Inte stesse zornade, pe prime volte, si à votât ancje pal Comun General de Fascia, la comunitât di valade che e cjape dentri dute la aree ladine de provincie di Trent. Tant che prin “procurador”, o sei president de comunitât, e je stade elete Cristina Donei.

Font: Provincie di Trent, 17/05/10

Irlande: progjet par une aree gaeliche a Dublin

La associazion irlandese Comhluadar, fondade intal 1993 par judâ lis fameis che a vuelin tirâ sù i lôr fruts par gaelic, e je daûr a cirî une aree abitative a Baile Átha Cliath / Dublin dulà meti adun une sorte di cuartîr là che il gaelic al sedi la lenghe di riferiment (Gaeltacht). Ancje cun chest fin, nol è tant che la associazion e à metût in pîts une cooperative imobiliâr. La zone dulà meti in vore il progjet no je stade inmò sielzude, ma si è daûr a cirî une aree ben servide dai servizis e dongje di une gaelscoil, o sei une scuele che e dopre l’irlandês tant che lenghe veicolâr. A son za cuindis lis fameis che si son fatis indenant par partecipâ ae iniziative e a rivin dutis de perifarie dublinese.

Font: Gaelport, 17/05/10

Paîs Basc: in miârs in place pe normalizazion dal euskara in Navare

A jerin almancul 15 mil lis personis che ai 15 di Mai a àn sfilât pes stradis di Iruñea / Pamplona par rivendicâ il dirit a vivi ad in plen par basc. La manifestazion, la plui grande a pro dal euskara che si vedi davuelte in Navare, e je stade clamade dongje di Kontseilua, o sei il consei dai organisims sociâi de lenghe basche. I manifestants a àn domandât al guvier de Navare une politiche linguistiche gnove che e permeti di doprâ l’euskara in maniere normâl e cence lis limitazions cumò in vore intes scuelis, intes aministrazions publichis e intai mieçs di comunicazion.

Font: Journal du Pays Basque, 15/04/10; Diario de Navarra, 16/04/10

Paîs Catalans: il catalan al cres ancje tes fameis di lenghe castiliane

Daûr des ultimis ricercjis sociolinguistichis davueltis de segretarie pai zovins e di chê pe politiche linguistiche dal guvier catalan a rivin dâts positîfs pe lenghe catalane. Di une bande si à un aument intal ûs dal catalan intes fameis zovinis che a àn tant che lenghe origjinarie il castilian. Intai ultins agns, di fat, ta chestis fameis i gjenitôrs che a doprin cui lôr fîs il catalan compagn o plui che no il castilian a son passâts dal 10 al 40 par cent. Di chê altre bande, la inchieste e mostre che tra i zovins si dopre di plui il catalan a scuele e intal marcjât dal lavôr, intant che il castilian al reste plui doprât intes situazions informâls.

Font: Nationalia, 12/05/10

Macedonie: proteste dai albanês inte capitâl

A jerin sù par jù 2 mil i albanês che ai 10 di Mai a àn partecipât inte capitâl macedone a di une manifestazion inmaneade di diviersis associazions di cheste minorance. La iniziative e veve chê di invidâ il guvier a blocâ i proviodiments judicâts discriminatoris tai confronts de comunitât albanese e di domandâ la liberazion di chei che a vegnin considerâts presonîrs politics. I albanês impresonâts a son acusâts di vê partecipât a azions armadis o di vê judât cui che lis à metudis in at. La manifestazion si è davuelte cence incidents.

Font: Balkan Insight, 10/05/1o

Asturiis: in place par domandâ la uficializazion dal asturian

Miârs di personis a àn partecipât pes stradis di Uviéu / Oviedo ae manifestazion clamade dongje de Zonte pe difese de lenghe asturiane par rivendicâ la uficialitât di cheste lenghe. La iniziative e à cjatât la poie di associazions, sindacâts e partîts, fale socialiscj e popolârs che a son contraris a ricognossi al asturian il status di lenghe uficiâl intal Statût di autonomie. Intant la Academie pe lenghe asturiane e la Universitât di Uviéu a àn fat savê che, za cun chest an, a metaran in pîts un centri di studis par asturian che al è stât batiât Universidá Asturiana de Branu.

Font: Món Divers, 10/05/1o

Rom: Portugal denunciât aes autoritâts europeanis

Il Comitât european pai dirits sociâi al à cjapade sù la denuncie fate indenant dal Centri european pai dirits dai rom (ERRC) cuintri dal Portugal par vie des politichis abitativis discriminatoriis che al metarès in vore tai confronts dai rom. La denuncie si poie su documents e testemoneancis tiradis sù intai ultins cinc agns. In particolâr si fevele di pidiments intal acès ae edilizie popolâr e ai servizis di fonde, di segregazion residenziâl des comunitâts rom e di altris violazions ai oblics previodûts de Cjarte sociâl europeane.

Font: ERRC, 07/05/10