Irlande: sucès dal Sinn Féin tal Nord, ma il DUP al bloche dut

Al è un risultât storic chel des elezions pal Parlament de Irlande dal Nord che si son tignudis ai 5 di Mai. Cun di fat, pe prime volte di cuant che si àn istituzions autonomis pes sîs conteis irlandesis sot aministrazion britaniche, un partît nazionalist irlandês al è prin par vôts e deputâts elets. Cul 29% des preferencis, in cressi dal 1,1% rispiet aes elezions stadis, il Sinn Féin al à vût elets 27 parlamentârs. Il DUP, invezit, al è restât prin tra i partîts unioniscj, ma al à pierdût cuasi il 7% dai consens sbrissant jù al 21,3% e a 25 elets (3 in mancul di chei che al veve). Daûr si son plaçâts, cul 13,5% dai vôts (+4,5%) e 17 deputâts (+9), l’Alliance Party – partît che no si ricognòs ni come unionist e nancje come nazionalist – e, cul 11,2% dai consens (-2,9%) e 9 elets (-1), i unioniscj dal UUP. A completâ il cuadri dal elets a son 8 deputâts dal SDLP (nazionaliscj moderâts), 1 de Traditional Unionist Voice, 1 di People Before Profit (çampe radicâl) e 2 indipendents.

Par funzionâ, dut câs, lis istituzions nordirlandesis si poin suntun sisteme di incarghis condividudis tra il prin dai partîts de aree unioniste e il prin di chê nazionaliste. Su la fonde dai risultâts dai 5 di Mai, a vuidâ la Irlande dal Nord come prime ministre e varès duncje di jessi Michelle O’Neill dal Sinn Féin compagnade di un prin ministri vicjari nomenât dal DUP. Intes legjislaturis stadis, cuant che par solit a rivavin seconts, i republicans a vevin simpri rispietât chest sisteme di guvier compartît. I unioniscj invezit a àn declarât subite che no lu fasaran almancul che no si riviodi il cussì clamât protocol pe Irlande dal Nord che al regole i rapuarts doganâi cu la Union Europeane e, in primis, cu la Republiche di Irlande dopo de jessude dal Ream Unît de UE. La posizion dal DUP si à concretizade ai 13 di Mai, zornade di insediament de gnove Assemblee nordirlandese, cul impedî la elezion dal ufici di presidence dal Parlament che duncje nol pues funzionâ in maniere regolâr. Guvier e Assemblee – a àn dite chês altris fuarcis politichis – a son blocâts e tignûts in ostaç di un partît pai siei interès particolârs. La uniche fuarce politiche a no condanâ in mût esplicit cheste posizion e je la TUV (come a dî che, in doi, no rapresentin nancje il 30% dai votants).

Font: BBC, 06-13/05/22