ELEN (European Language Equality Network), la Rêt Europeane pe Avualiance Linguistiche, e à presentât une denuncie formâl cuintri dal stât francês alì de ONU pe discriminazion metude in at cun continuitât intai confronts des lenghis minorizadis. La azion – si spieghe tal document – si poie su la violazion di diviers ponts previodûts de convenzion de ONU sui dirits dai minôrs e di chê europeane sui dirits umans ratificadis ancje de France. A stiçâ la denuncie e je stade la sentence de cort costituzionâl francese che e à boçât l’articul de leç organiche su la valorizazion e la promozion des lenghis minorizadis – la cussì clamade leç Molac – che al permeteve di puartâ il model a imersion dentri dal sisteme scolastic public. Cheste sentence – al à comentât il segretari di ELEN, Davyth Hicks –, in plui di lâ cuintri des miôr pratichis di insegnament des lenghis, e je dal dut discriminatorie e e je contrarie ai valôrs europeans di fonde. La denuncie e je stade sotscrite di une vincjine di organizazions membris de Rêt che a operin intal stât francês.
Nessun commento:
Posta un commento