Ai 16 di Avost, cu la partence des ativitâts intes scuelis de infanzie di Iruñea / Pamplona, si à sclarît il cuadri dal rapuart jenfri domande e ufierte par chel che al rivuarde il model linguistic. Dai dîs cuartîrs de capitâl de Navare, la presince curicolâr de lenghe basche si le cjate si cjate dome in cuatri intant che in altris doi e je disponibile dome pai plui picinins. Tes areis e tes fassis di etât là che l’euskara al è presint, i puescj disponibii ta cheste lenghe a son stâts il 39,9% a front di une domande dal 40,8%. In doi cuartîrs la domande di puescj par basc e à passât il 50% cundut che la ufierte e jere cetant plui basse. Tai cuartîrs là che la aministrazion comunâl (che e je tes mans di une coalizion di diestre stataliste e regjonaliste) no à previodût nancje un puest par euskara, no si à vût nancje la pussibilitât di verificâ l’interès dai gjenitôrs par cheste lenghe. Pes associazions che a operin pal basc i dâts a mostrin a clâr che la domande di euskara a scuele e je plui alte de ufierte: une ufierte che, par altri, e je scjarse e disecuilibrade rispiet ai cuartîrs citadins.
Nessun commento:
Posta un commento