Ai 25 di Avost, inte suaze di une riunion inmaneade di Kevre Breizh – Coordenament Culturâl de Bretagne – e de Rêt Europeane pe Avualiance Linguistiche (European Language Equality Network) cu la partecipazion di rapresentants dal mont politic, associatîf e educatîf breton, si à concuardât une strategjie in comun par fâi cuintri de ofensive centraliste metude in at a Parîs che in plui de incostituzionalitât dal insegnament imersîf e à produsût di resint ancje la cussì clamade “leç cuintri dal separatisim” che in non de laicitât dal stât e menace ancje l’associazionisim des comunitâts minorizadis. In ocasion de partence dal gnûf an scolastic, si varà un incuintri tra une rapresentance de rêt des scuelis a imersion bretonis Diwan e il prin ministri francês Jean Castex. Si larà ancje a sierâ il gnûf contrat jenfri guvier statâl e regjonâl pe dade 2021 – 2027 che al interven ancje tal cjamp dal insegnament imersîf. Po, in Otubar, si tignarà une gnove mobilitazion di place coordenade tra dutis lis comunitâts minorizadis dal stât francês. Pal deputât breton Paul Molac e covente ancje une azion slargjade par puartâ il teme de modifiche costituzionâl a pro des lenghis minorizadis dentri de campagne pes prossimis presidenziâls.
Nessun commento:
Posta un commento