Vie pal mês di Avrîl il cuotidian basc Gara, cence nissune poie istituzionâl e cul jutori de int, al à rivât a completâ il paiament dai 3 milions di euros di debit “ereditâts” di Egin. Intal 1998, inte suaze de sô ofensive cuintri de çampe indipendentiste basche acusade di jessi leade a ETA, il judiç Batasar Garzón al veve ordenât di sierâ Egin, il cuotidian di riferiment pe part nazionalitarie de societât basche, e di arestâ i siei dirigjents.
Tal 2009 la cort supreme
spagnole e veve declarât ilegâl cheste sierade, tal framieç però
il gjornâl al jere restât sierât, cence plui jentradis, cui siei
conts e i siei bens secuestrâts, cui siei dipendents cence lavôr e
cence la pussibilitât di paiâ tassis, lavoradôrs e fornidôrs. Il
stes Garzón, cinc agns dopo di vê fat sierâ il gjornâl, al veve
assegnât i debits madressûts cussì di Egin
al cuotidian Gara
che intant al jere deventât il riferiment informatîf pe çampe
indipendentiste basche: une decision justificade cul concet
incredibil di “sucession ideologjiche di imprese”. Il contenziôs
si veve strissinât a dilunc ma ae fin Gara al è stât obleât a
paiâi ae previdence sociâl statâl 3 milions di euros in trê agns:
une cifre che e riscjave di fâ sierâ, cheste volte par faliment, il
cuotidian basc che al à 120 dipendents e un indot di altris 200
lavoradôrs. Dut câs cun grues sacrificis finanziaris e soredut
cuntune poie popolâr straordenarie rivade par mieç di events di
racuelte di fonts e di 10 mil abonaments gnûfs, il debit al è stât
saldât par timp e cumò, come che al è ricuardât il diretôr Iñaki
Soto, si pues in fin cjalâ indenant.
Font: Naiz:, 26/04/21; MediaBask, 27/04/21; Jornalet, 28/04/21
Nessun commento:
Posta un commento