Il
Grup Unificât de Çampe Europeane (GUE UEL) e chel dai Verts –
Aleance Libare Europeane (Greens
- EFA) a àn domandât cun fuarce aes istituzions comunitariis di
intervignî par condizionâ ogni rapuart cu la Turchie al rispiet dai
oblics internazionâi sul plan dai dirits civîi e di chei umans, e a
àn manifestât la lôr solidarietât al Partît Democratic dai Popui
(HDP), moviment che al racuei une part significative dai vôts de
comunitât curde e dai progressiscj turcs. Une posizion similâr e je
rivade ancje dal grup de Aleance Progressiste dai Socialiscj e dai
Democratics dal Parlament European. Ai 26 di Avrîl, di fat, si à
viert a Ankara un procès penâl cuintri di 108 curdis che tal 2014 a
vevin manifestât in solidarietât cui lôr conazionâi impegnâts a
difindi la citât di Kobanê dal assedi dal Stât Islamic.
La
mobilitazion, clamade adun dal HDP ancje par denunciâ lis
complicitâts turchis intal assedi, e veve interessât buine part dal
Kurdistan setentrionâl sot aministrazion turche in plui des citâts
di Ankara e Istanbul. Propit inta chestis ultimis la polizie e jere
intervignude in maniere violente par dispierdi i manifestants e si
veve lassade daûr 37 muarts. Subite dopo i deputâts dal HDP a vevin
domandât une comission di inchieste parlamentâr par indagâ su chei
fats che e jere stade però dineade. A siet agns di distance, in
maniere paradossâl, a son i deputâts e i dirigjents dal HDP a finî
sot procès cu la acuse di vê menaçât la integritât dal stât e
di jessi responsabii par chei muarts. Intal framieç la cort
costituzionâl turche e à inviât un procediment che al podarès
puartâ a meti fûr leç il HDP e a gjavâi i dirits politics a uns
sietcent dai siei rapresentants principâi. Cun chestis azions
judiziariis lis istituzions turchis a pontin a scancelâ i ultins
spazis democratics di oposizion dentri dal paîs.
Font:
GUE-UEL,
26/04/21;
Greens-EFA, 26/04/21;
Jornalet, 28/04/21
Nessun commento:
Posta un commento