Europe: la Comission Europeane no poie Minority SafePack

Ai 14 di Zenâr la Comission Europeane e à decidût che no cjaparà nissune iniziative par meti in vore lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union che a jerin stadis fatis indenant cu la iniziative citadine batiade Minority SafePack. Daûr de iniziative e jere la FUEN (Union Federâl des Nazionalitâts Europeanis) che, cu la poie di diviersis realtâts espression des comunitâts minorizadis, e veve savût tirâ sù passe un milion e 120 mil firmis certificadis, cjatant po il supuart di diviers orghins legjislatîfs tant che il Parlament federâl todesc, la Cjamare alte neerlandese, il Parlament de Ongjarie e diviersis Assembleis teritoriâls, dal Brandeburc ae Frisie, de Sassonie al Tirôl dal Sud. A sostignî la iniziative cuntune risoluzion che e veve cjatât la poie di plui di trê cuarts dai siei membris al jere stât intal Dicembar passât ancje il Parlament European.

Magari cussì no – al à comentât il president de FUEN, Loránt Vincze – la Comission Europeane, che e varès di promovi la democrazie, la dignitât e la justizie, e à voltât la schene a cuasi 50 milions di citadins europeans che a partegnin a minorancis linguistichis e nazionâls e che, dispès, a vivin su la lôr piel une situazion di disavualiance. Cun di plui, cu la sô decision, la Comission e va a gjavâi legjitimitât a di un imprest – la iniziative citadine europeane – che in buine sostance al è l’unic che al permet une partecipazion democratiche ative. Di là dal marum par cheste decision, Vincze al à segnalât cemût che la rêt internazionâl nassude par sburtâ la iniziative e sedi une ereditât cetant impuartante par fâ sù une Europe gnove, là che ducj i citadins a puedin gjoldi pardabon e ad in plen dai lôr dirits.

Font: FUEN, 14/01/21