18/01/20

Lusazie: iniziativis par infuartî il serbian in radio e a scuele

A cressin lis emissions in lenghe serbiane su la radio MDR Sächsen. Cun Zenâr, di fat, lis oris cuotidianis inte lenghe proprie de Lusazie a passin di trê a cuatri e a cjapin dentri une des fassis orariis (chê che e va di 8 a 9 di buinore) plui scoltadis. La Domowina – organizazion di riferiment di cheste comunitât minorizade di lenghe slave che e vîf a cjaval tra i stâts dal Brandeburc e de Sassonie – e mostre la sô sodisfazion par chest risultât e e conferme il so impegn par rivâ ca di cualchi an a di une programazion dute par serbian par mieç dal sisteme DAB+.
Plui grivie, invezit, la situazion che e rivuarde l’insegnament. L’esecutîf e la Assemblee dal Brandeburc a àn concuardât su la dibisugne di infuartî la formazion dai insegnants e di incressi la produzion di materiâi didatics par serbian. Il probleme però al è che, cundut che il numar di fruts de Lusazie al cres, dal an scolastic 2012/2013 a chel 2019/2020 il numar dai nîts là che si dopre la lenghe proprie al è calât di trê unitâts, chel des primariis di une e chel des secondariis di une. In dì di vuê si stime che lis personis che a fevelin cheste lenghe a sedin sui 60 mil, doi tierçs di lôr in Sassonie e il rest intal Brandeburc.
Font: Sächsische.de, 07/01/20; Süddeutsche Zeitung, 07/01/20

Nessun commento: