11/05/19

Stât spagnûl: politichis, sucès dai partîts catalans e bascs

Lis elezions politichis che si son tignudis ai 28 di Avrîl intal ream di Spagne a àn assegnât la maiorance relative al PSOE che cun cuasi il 29% dai consens al à otignût 123 dai 350 puescj disponibii tal Parlament di Madrid. Tes elezions dal 2016 al veve vût dome 85 elets. Il cressi dai socialiscj al à un spieli te colade dai popolârs (PP) che a son passâts di 137 a 66 deputâts. Te aree a diestre dal cuadri politic spagnûl si à vude di fat une redistribuzion dai vôts che e à premiât Ciudadanos (Cs) cun 57 elets (a ‘nt vevin 32) e i neofassiscj di Vox che a jentrin in Parlament pe prime volte cun 24 deputâts. A çampe invezit i socialiscj a àn recuperât pês a dam di Unidos Podemos lâts jù di 71 a 42 elets. Chestis elezions a àn segnât però ancje il miôr risultât di simpri tes politichis dai partîts sovraniscj catalans e bascs.

In Catalogne i partîts indipendentiscj a passin di 17 a 22 elets cun ERC che e va sù di 9 a 15 deputâts e Junts per Catalunya che e mande 7 dai siei a Madrid (là che a ‘nt veve 8). Tra i elets o cjatìn ancje cinc dai dirigjents indipendentiscj impresonâts: Oriol Junqueras e Raül Romeva par ERC (il secont al Senât), Jordi Sànchez, Jordi Turull e Josep Rull par JxCat. A completâ il cuadri dai elets in Catalogne o vin i 12 deputâts socialiscj (PSC), i 7 de En Comú Podem e i 7 des diestris: 5 di Cs, 1 dal PP e 1 di Vox. Par pôc nol rive a jentrâ in Parlament il gnûf Front Republicà che, cui siei passe 113 mil vôts, al va a infuartî la base eletorâl indipendentiste.
Par chel che al rivuarde il rest dai Paîs Catalans, inte Comunitât Valenziane i elets si dividin a miezis tra aree progressiste e diestris. Te prime o cjatìn i 10 deputâts dal PSOE, i 5 di Podemos-EUPV e chel di Compromís; a diestre o vin invezit 7 elets dal PP, 6 di Ciudadanos e 3 di Vox. Intes isulis Baleârs invezit a son stâts elets 3 deputâts dal PSOE, 2 di Podemos-EUIB, e un parom di Ciudadanos, PP e Vox.
Par chel al rivuarde il Paîs Basc, inte Comunitât Autonome Basche lis diestris no àn rivât a otignî nancje un deputât. Cun di fat, i partîts sovraniscj a àn sfiliât cuasi il 50% des preferencis cul PNV che al à vût 6 elets e i indipendentiscj di EH Bildu 4 (intal 2016 i prins a vevin otignût 5 elets e i seconts 2), intant che a çampe i socialiscj (PSE-EE) e la coalizion Podemos-IU-Equo-Berdeak a àn vût 4 deputâts parom. In Navare invezit lis diestris statalistis e regjonalistis unidis te liste Navarra Suma (NA+) a àn otignût 2 deputâts, compagn dal PSOE, intant che Podemos-IU-Equo-Batzarre al à vût un elet. Achì i nazionalitaris bascs a àn cjapât cuasi il 20% dai vôts ma, dividûts tra EH Bildu e Geroa Bai, no àn otignût nancje un deputât.
In Galizie a fâ di parons a son restâts socialiscj (PsdeG-PSOE) e popolârs (PP) cui prins che a àn vût 10 elets e i seconts 9. Chei altris cuatri puescj disponibii a son lâts 2 a Ciudadanos e 2 ae coalizion progressiste nazionalitarie formade di Podemos-EU-Mareas en Comú-Equo. Ancje chi, come in Navare, lis divisions no àn zovât al front nazionalitari cul BNG che, cundut dai siei passe 93 mil vôts, nol à vût nissun elet e En Marea che no je rivade nancje a 20 mil preferencis.
Par finî o ricuardìn che intal Parlament di Madrid a son stâts elets ancje 2 rapresentants de Coalición Canaria (CCa-PNC) e, pe prime volte, ancje 1 deputât dal Partido Regionalista de Cantabria.
Font: El País, 29/04/19; Naiz:, 29/04/19; VilaWeb, 29/04/19

Nessun commento: