15/02/18

Corsiche: rie di ‘no’ di Macron aes domandis dai cors

Inte suaze de sô visite in Corsiche, il president francês Emmanuel Macron al à rispuindût cuntune rie di ‘no’ aes rivendicazions puartadis indenant de maiorance nazionalitarie che e je al guvier de Coletivitât Teritoriâl uniche de isule.
Il president francês al à dite di no al cussì clamât “statût di resident” pensât par combati la speculazion edilizie par vie che, a so judizi, nol sarès la rispueste juste ai problemis imobiliârs de isule. Al à dite di no ancje ae couficialitât de lenghe corse parcè che in dut il teritori dal stât la uniche lenghe uficiâl e je e e à di restâ il francês. Macron al à fat une viertidure su la promozion dal bilinguisim ancje se, cemût che e à marcât ancje une part de stampe francese, un bilinguisim vêr nol sarà mai pussibil cence di un ricognossiment di uficialitât pal cors. La tierce cuistion di fonde ponude dal guvier cors, o sei la amnistie pai presonîrs politics, no je stade nancje nomenade intant dal discors uficiâl di Macron a conferme dal fat che no si le cjate te agjende politiche dal president francês. Al à invezit dite che e sarà incressude la presince di fuarcis di polizie su la isule. Par chel che al rivuarde la incressite dai nivei di autoguvier, Macron al à dite di jessi a pro dal citâ la Corsiche te Costituzion republicane ma nol à sclarît in ce forme e cun cuâi efiets pratics. Par finî, in mert ae autonomie fiscâl, al à dite che si pues pensâ a alc di specific pe isule ma dome sot forme di une pussibilitât pal guvier locâl di incressi lis tassis e no di mantignî in Corsiche lis tassis paiadis dai cors. Lis declarazions dal president francês a àn mandât in bestie i rapresentants dai moviments nazionalitaris che, cundut che a àn fat savê che a laran indenant a confrontâsi cu lis autoritâts di Parîs cuntun spirt di dialic, a àn piturât l’intervent di Macron di discors di stamp neocoloniâl. E se ai 3 di Fevrâr, prime de visite dal president francês, 20 mil personis si vevin dadis dongje a Ajaccio par sostignî lis domandis dal esecutîf cors, cumò lis associazions di students a proponin di dâi une prime rispueste ai ‘no’ di Macron cuntun siopar gjenerâl de isule.
Font: Alta Frequenza, 07-08/02/18; Le Monde, 07/02/18; Le Parisien, 08/02/18

Nessun commento: