Il
guvier de Navare al à fat bon il prin plan strategjic de lenghe
basche. Il document si svilupe su siet cjamps di azion strategjics –
ven a dî ûs sociâl, fevelants gnûfs, servizis publics, status e
atrat, svilup economic, suaze linguistiche e agjenzie pe promozion de
lenghe (Euskarabidea)
– e al previôt sîs obietîfs gjenerâi, 29 obietîfs specifics e
190 misuris operativis. Tra i obietîfs principâi si àn la
incressite de ufierte di ativitâts par euskara
in maniere di infuartî il so ûs sociâl, miorâ la eficacie dai
intervents pai fruts e pai fantats ancje fûr de scuele, aumentâ la
presince de lenghe tai mieçs di comunicazion e tai imprescj
tecnologjics di ultime gjenerazion, favorî l’ûs dal basc intes
ativitâts economichis e tai servizis professionâi, slargjâ la
presince de lenghe tal paisaç e te vite sociâl. Par meti di vore
lis zions previodudis dal plan di chi al 2019 si stime che a
coventaran sù par jù 11 milions di euros.
Il
plan si propon di judâ la lenghe a fâ un salt indenant intun moment
là che la sô percezion e il so ûs framieç dai citadins a son daûr
a cressi. Cun di fat, i dâts de ultime ricercje sociolinguistiche
che a son stâts a pene presentâts a disin che 69 mil personis di 16
agns insù, o sei il 12,9% de popolazion de Navare, a son buinis di
fevelâ par euskara,
cuntun aument dal 3,4% intai ultins 25 agns. Chei che no son in stât
di fevelâlu ben ma che lu capissin a son il 10,3%, o sei il 5,7% in
plui dal 1991. La incressite di chei che a fevelin par basc e
interesse massime i zovins tra i 16 e i 24 agns là che l’aument al
sfilie il 16%.
Font:
Naiz:,
25/01/17;
EiTB, 25/01/17; Noticias de Navarra, 20/01/17
Nessun commento:
Posta un commento