Un
dai risultâts otignûts dal guvier di Madrid cul clamâ dongje
elezions autonomichis in Catalogne ai 21 di Dicembar al è di marcâ
lis divisions che si àn dentri des fuarcis politichis impegnadis pe
indipendence de Catalogne. Cun di fat, si ben che si è daûr a
lavorâ par definî dai ponts condividûts intal program, la aree
indipendentiste si presentarà aes elezions cun almancul trê listis
diferentis: di une bande al è il PDeCAT che al propon un secont
esecutîf vuidât di Carles Puigdemont e al cîr di dâ dongje
fuarcis ator de liste Junts per
Catalunya; o vin po ERC che e à
decidût di no continuâ la esperience di Junts
pel Sí ma di presentâsi par so cont;
e, par finî, e je la CUP che e manten la sô candidature autonome
ancje se vierte a altris sogjets de aree libertarie e radicâl dal
indipendentisim.
Sul
front judiziari intant, a Bruxelles, il judiç di prin grât
incjariât di esaminâ i ordins di arest internazionâi cuintri dal
president catalan Carles Puigdemont e di cuatri membris dal so
esecutîf (Lluís Puig, Clara Ponsatí, Toni Comín e Meritxell
Serret) al à fissât ai 4 di Dicembar la udience par scoltâ i
argoments de difese. La acuse e je invezit intervignude ai 17 di
Novembar par domandâ la esecuzion dai ordins di arest. Des acusis
motis de magjistrature spagnole, la procure belgjiche e à però za
scartât chê di “abûs” intant che, viodût che il codiç penâl
de Belgjiche nol calcole i reâts di “ribelion” e di “sedizion”,
e à proponût di convertîju intune acuse di “associazion di
funzionaris publics” cun finalitât ilegâl.
Font:
Ara,
15-20/11/17;
Naiz:, 15-20/11/17
Nessun commento:
Posta un commento