Intal dopodimisdì dai 27 di Otubar il Parlament catalan - cun 70 vôts a pro, 10 cuintri e 2 blancs - al à fate buine la propueste di Junts pel Sí e de CUP che e previôt la nassite de «Republiche catalane tant che stât indipendent e
sovran, di dirit, democratic e sociâl». La votazion si à davuelte in forme segrete cu la partecipazion dai deputâts di Junts pel Sí, CUP, SíQueEsPot e dal indipendent Germà Gordó, intant che i deputâts socialiscj (PSC), popolârs (PP) e dal grup dai Ciutadans a vevin bandonât la aule. La risoluzion votade e fâs sô la declarazion di indipendence che e jere stade sotscrite dai doi partîts de maiorance ai 10 di Otubar. La forme dal vôt segret e je stade sielzude cun chê di evitâ azions penâls cuintri dai singui che a votavin pe indipendence. In forme palese, invezit, e je stade votade - cun 71 vôts a pro, 8 cuintri e 3 astignûts - la partence dal procès costituent de gnove Republiche. Chest at al impegne il guvier a meti in vore daurman dutis lis risorsis umanis, publichis e sociâls par dâi cuarp a di un «procès costituent democratic, fondât sui citadins, trasversâl, partecipatîf e vincolant che al varà di puartâ a meti jù e a aprovâ la Costituzion de Republiche». Juste fûr de aule dal Parlament si son dâts adun diviers centenârs di sindics catalans par dâi la lôr poie ae declarazion di indipendence. Chel stes a àn fat miârs di citadins che a àn po saludât cun gjonde la decision dal Parlament.
Pôc plui tart, il Senât spagnûl al à autorizât il guvier di Madrid a meti in vore cuintri des istituzions catalanis lis misuris decidudis a partî dal articul 155 de Costituzion spagnole. Si larà cussì a destituî il president dal guvier catalan, Carles Puigdemont, e dut il so esecutîf, a limitâ lis funzions dal Parlament catalan, e a cjapâ il control diret dai Mossos d'Esquadra. Il proviodiment al è stât votât cun 214 vôts a pro (PP, PSOE, Ciudadanos, UPN, Foro y Coalición Canaria) e 47 cuintri (Podemos, ERC, PDeCAT, PNV, EH Bildu, Compromís e Nueva Canarias). Il consei dai ministris spagnûl al è stât clamât adun za in serade par meti in at lis misuris autorizadis dal Senât.
La zornade prime e jere stade segnade di une clime di malsigurece, cuntun corisi daûr di gnovis che a mudavin dibot il cuadri de situazion. Di fat, cundut de poie maioritarie di Junts pel Sí e CUP ae declarazion unilaterâl di indipendence, il president Puigdemont al veve mostrât la intenzion di sierâ duarman la legjislature e di clamâ dongje gnovis elezions pûr di evitâ la metude in vore dal articul 155. Une volte capît che, ancje cun elezions anticipadis, l'articul 155 al sarès stât metût in vore distès, Puigdemont al veve decidût di lassâ pierdi chê strade par lassâ che al fos il Parlament catalan a decidi ce fâ.
Font:
TV3, 27/10/17;
VilaWeb, 27/10/17;
Ara, 27/10/17; Naiz:, 27/10/17
Nessun commento:
Posta un commento