07/07/16

Stât spagnûl: il PP si infuartìs tes elezions gjenerâls

Intal stât spagnûl lis elezions politichis dai 26 di Jugn no àn cambiât plui di tant il cuadri complessîf che al jere jessût dal vôt dai 20 di Dicembar dal 2015, o sei la fin dal bipartitisim che si veve formât dopo de colade dal franchisim e un fruçonament dal vôt che al rint dificil formâ un guvier. Chel istès lis gnovis elezions a àn puartât cualchi novitât. Il PP, in plui di restâ la formazion plui votade, al infuartìs la sô posizion e al passe di 123 a 137 elets. Il PSOE si manten al secont puest, ma al va jù di 90 a 85 deputâts. No si à duncje il sorpàs a çampe di Unidos Podemos che, cundut de aleance jenfri Podemos e Izquierda Unida, al à di “contentâsi” di 45 elets. In calâ la formazion conservadore Ciudadanos che e passe di 40 a 32 deputâts.
Par chel che al rivuarde i partîts espression di nazionalitâts minorizadis, la plui part dai elets e rive de Catalogne là i indipendentiscj di ERC a confermin i lôr 9 deputâts e chei di Convergència Democratica de Catalunya (CDC) i 8 che a vevin cjapât intal 2015 cu la coalizion Democràcia i Llibertat. I vegnin daûr i bascs là che i nazionaliscj moderâts dal PNV a passin di 6 a 5 deputâts, intant che i indipendentiscj di EH Bildu a confermin i lôr 2 parlamentârs. In diviersis comunitâts autonomis però Podemos si presentave adun cun moviments nazionalitaris: al è il câs de Catalogne là che cul non di En Comú Podem al à confermât i siei 12 elets; dal Paîs Valenzian (Compromís-Podem-EUPV) là che al à mantignût 9 deputâts; e de Galizie là che cu la sigle En Marea (Podemos-En Marea-A Nova-EU) al è passât 6 a 5 elets. A sierâ il cuadri o vin po il deputât elet de Coalición Canaria-Partido Nacionalista Canario.
Font: El País, 27/06/16; Naiz:, 27/06/16; VilaWeb, 27/06/16

Nessun commento: