02/05/15

Crimee: cidinade la radiotelevision tatare indipendente

Cul prin di Avrîl il canâl informatîf indipendent ATR, l’unic in Crimee a trasmeti ancje par tatar, al à vût di blocâ lis sôs emissions. Dopo de anession de Crimee ae Federazion russe, ducj i mieçs di comunicazion locâi a vevin di regjistrâsi alì des gnovis autoritâts dentri dal prin di Avrîl. La direzion de ATR e à presentât par trê voltis i documents che a coventavin par regjistrâsi, ma ogni volte lis autoritâts russis a àn cjatavin alc che nol leve e à boçavin la domande. Il cuart tentatîf nol à nancje vût rispueste e si è rivâts cussì ae scjadince fissade par regjistrâsi.
Cul canâl informatîf, che al ufrive une programazion al 60% par rus, al 35% par tatar e al 5% par ucrain, a àn vût di smeti lis trasmissions la television par fruts Lale e lis radios Meidan FM e Leader che a partegnin al stes grup editoriâl. Pe direzion dal grup si trate di une decision dute politiche cjapade par punî un mieç di informazion che plui di cualchi volte si veve mostrât critic cu lis autoritâts russis e che al deve spazi aes rivendicazions de comunitât tatare, che e rapresente il 13% de popolazion de penisule e che in buine part e jere contrarie ae anession de Crimee ae Federazion russe. Ta chescj mês lis fuarcis di polizie a àn metût in at diviersis azions par spaurî cheste comunitât, a àn arestât diviers militants tatars e a àn bandît i ultins doi presidents dal Parlament tatar pes lôr declarazions a pro dal dirit di autodeterminazion.
Font: The Guardian, 01/04/15; Kyiv Post, 01/04/15

Nessun commento: