Bretagne: pat tra Regjon e guvier centrâl

Ai 13 di Dicembar il prin ministri francês Jean-Marc Ayrault al à sotscrit a Roazhon / Rennes il “Pat dal avignî pe Bretagne” che al previôt trasferiments straordenaris dal guvier centrâl par sù par jù 2 miliarts di euros inte dade 2014-2020. Risorsis che par metât a laran a pro dal setôr agroalimentâr breton che za di timp si cjate in cundizions di dificoltât. A obleâ il guvier di Parîs a chest pas a son stadis lis protestis popolârs che a àn scjassât la Bretagne intai ultins doi mês, nassudis par fâi cuintri a di une gnove tasse che e varès colpît in maniere fuarte propit il setôr agroalimentâr e i traspuarts di chest teritori. La proteste, batiade dai Bonnets Rouges par riclamâ un antîc riviel antifiscâl breton, si è però spostade simpri di plui di tematichis economichis specifichis a rivendicazions di autoguvier. I contignûts dal Pat a àn cussì contentât une part des categoriis economichis e politichis che a vevin poiât sul imprin la proteste, ma no chês che le àn cjapade in man tes ultimis setemanis.
Intal Consei regjonâl de Bretagne il Pat al è stât fat bon dome cuntune maiorance limitade formade di socialiscj e comuniscj, intant che a votâ cuintri, in plui dai conservadôrs de UMP, a son stâts i moviments nazionalitaris e de çampe alternative tant che UDB, Bretagne Écologie e Europe Écologie – Les Verts. Cuintri dal Pat si son declarâts ancje il Consei Culturâl de Bretagne e la atuâl direzion dai Bonnets Rouges che a lamentin la mancjance di rispuestis aes rivendicazions di autoguvier che a rivin de Bretagne. Intant de sô visite a Roazhon / Rennes, il prin ministri francês Ayrault al à però sigurât che chest Pat al è dome il principi di un percors che, chest an che al ven, al viodarà il Parlament di Parîs impegnât ancje suntune leç di decentrament che e incressarà lis competencis des Regjons e sul tentatîf di ratifiche de Cjarte europeane des lenghis regjonâls o minoritariis.

Font: Le Monde, 12 e 13/12/13