Ai 19 di
Lui a Belgrât si è tignude une gnove riunion tra lis autoritâts de
Serbie e chês des comunitâts serbis dal Cossovo cun chê di sburtâ
la minorance a partecipâ aes elezions aministrativis che si tignaran
ai 3 di Novembar in dut il Cossovo. Ta chê ocasion di fat a varessin
di jessi elets ancje i rapresentants de gnove Associazion dai Comuns
Serps previodude dai acuardis sotscrits di Belgrât e Pristina sot de
mediazion de UE, un gnûf sogjet aministratîf indotât di une grande
autonomie che al cjape dentri i comuns a maiorance serbe dal Cossovo
a tacâ di chei de aree dulintor di Mitrovica (Kosovska Mitrovica,
Leposavić / Leposaviq, Zvečan / Zveçan e Zubin Potok). I serps
cossovans a àn però dite che a boicotaran il vôt e a àn metût sù
une Assemblee provisorie par autoguviernâsi. Il rispiet dai acuardis
internazionâi al è però decisîf pal percors di jentrade de Serbie
inte UE e duncje il guvier di Belgrât al cîr di sburtâ i serps dal
Cossovo a riviodi la lôr posizion. Ae fin de riunion la tension tra
lis parts si veve un pôc slizeride, cui rapresentants dal guvier
serp a sigurâ che no bandonaran mai i lôr conazionâi in Cossovo e
i delegâts de minorance a dî che prime des elezions dai 3 di
Novembar a son une vore di altris cuistions che a àn di jessi
decidudis.
Font:
Balkan Insight, 22/07/13
Nessun commento:
Posta un commento