24/07/13

Cossovo: i serps a metin sù une Assemblee indipendente

Lis autoritâts cossovanis a àn comunicât che lis prossimis elezions aministrativis si tignaran ai 3 di Novembar. Intal comunicâ la gnove, la presidente Atifete Jahjaga, e à indreçât un invît particolâr ae popolazion dai cuatri comuns dal Cossovo setentrionâl a maiorance serbe par che e ledi a votâ. Cun di fat intal 2009 i citadins di Kosovska Mitrovica, Leposavić / Leposaviq, Zvečan / Zveçan e Zubin Potok a vevin boicotât lis elezions comunâls inmaneadis dal guvier di Pristina, par partecipâ invezit a elezions aministrativis separadis imbastidis cu la poie des autoritâts di Belgrât. L’acuardi cjatât che nol è tant dai doi paîs sot de mediazion de UE, là che ai cuatri comuns ur ven garantît un bon nivel di autonomie, nol à però rivât a mudâ la posizion de comunitât serbe dal Cossovo. Cussì ai 4 di Lui, a Zvečan, cu la partecipazion dai aministradôrs dai cuatri comuns e je stade metude sù la Assemblee provisorie dal Cossovo e de Metohija.
Intant de prime riunion, la Assemblee e à elet tant che president il sindic di Leposavić, Slavko Stevanović, e à fate buine une declarazion là che si proclame chest orghin tant che rapresentant legjitim de comunitât serbe cossovane e là che si ricognòs dome la Costituzion e lis leçs de Serbie. I membris de Assemblee a àn fat savê che no metaran in vore i acuardis sotscrits a Bruxelles jenfri Serbie e Cossovo e che no parteciparan aes elezions aministrativis dai 3 di Novembar. “No podìn acetâ che il presit par che la Serbie e jentri inte UE e sedi la pierdite di un toc dal so teritori e la integrazion sfuarçade intes istituzions di un stât no ricognossût” al à comentât il president de Assemblee Stevanović. La gnove no je stade però cjapade ben des autoritâts di Belgrât che a àn dite che chest compuartament al rindarà plui debule la posizion internazionâl de Serbie.
Intal framieç, il prin ministri vicjari serp, Aleksandar Vučić, si è cjatât cui rapresentants de comunitât albanese che e vîf inte Serbie meridionâl e che e rapresente la maiorance inte aree di Preševo / Presheva, Bujanovac e Medveđa. Il rapresentant dal guvier di Belgrât si è mostrât disponibil al rispiet plen dai dirits linguistics e nazionâi dai albanês, al decentrament di ciertis competencis, ae incressite dai risorsis pes misuris di caratar sociâl inte aree, ma al à ancje sclarît che no si varà nissune modifiche teritoriâl e nissune cession di sovranitât de bande de Serbie.
Font: Balkan Insight, 03/07/13; B92, 02-04/07/13

Nessun commento: