07/06/13

Corsiche: tension alte dopo dal arest di zovins indipendentiscj

L’arest di un grup di militants de organizazion Ghjuventù Indipendentista al à tornât a alçâ la tension in Corsiche. Inte suaze di une inchieste par une schirie di atentâts fats vie pal 2012 a Corti / Corte, diviers membris de organizazion indipendentiste zovanîl a son stâts arestâts de polizie francese e intant che une part e je stade puartade a Bastia, altris cinc a son stâts trasferîts daurman sul continent. Cheste operazion e à puartât a di une cjolte di posizion une vore dure de bande di Ghjuventù Indipendentista che dopo vê domandât che i siei militants a vegnin liberâts daurman, e à fevelât di metodologjiis repressivis degnis di une justizie colonialiste e si è declarade pronte a tignî bot al rapuart di fuarce cul stât.
Dopo di une prime manifestazion di proteste che si è tignude ai 30 di Mai denant dal comissariât di Bastia, par diviersis gnots si àn vût scuintris une vore violents tra zovins indipendentiscj e polizie pes stradis de citât cun cualchi ferît e diviers dams. Ai 31 di Mai doi dai zovins fermâts a son stâts acusâts di reâts di terorisim e puartâts in presons de France continentâl, intant che ducj chei altris a son stâts liberâts. Ta cheste suaze di tension la visite su la isule dal ministri francês dal interni, Manuel Valls, e à saborât ancjemò di plui i spirts cui moviments Corsica Libera e Sulidarità che a àn invidât il guvier di Parîs a meti fin ae repression e a scoltâ invezit lis rivendicazions democratichis che a rivin de Corsiche.
Font: Corse Matin, 29-30/05/13; Le Monde, 30/05/13; Alta Frequenza, 01/06/13

Nessun commento: