28/03/13

Kurdistan: messaç di pâs dal PKK aes autoritâts turchis

In ocasion dal Newroz, la fieste plui impuartante de comunitât curde che e segne il principi dal an gnûf, denant di disinis di miârs di personis che si vevin dadis dongje a Amed / Diyarbakır, capitâl dal Kurdistan turc, al è stât let un messaç di Abdullah Öçalan, là che il leader dal PKK al fevele de partence di une gnove ete là che a fevelâ no saran plui lis armis, ma la politiche. Impresonât aromai di cutuardis agns intun centri di massime sigurece, ta chescj mês Öçalan al è stât impegnât in tratativis cui rapresentants dal guvier di Ankara par cjatâ une soluzion al conflit che, intai ultins trente agns, si calcole che al vedi causât passe 40 mil muarts.
Intal so messaç il rapresentant principâl dal PKK (Partît dai Lavoradôrs dal Kurdistan) al à comunicât la partence di une tregue tra il moviment armât curdi e l’esercit turc, e il ritîr dai milizians dal PKK intal Kurdistan irakian. La conferme de decision e je rivade ancje dal comandant militâr dal PKK, Murat Karayılan, che al à mostrât la disponibilitât a batisi pal Kurdistan ancje par viis pacifichis. Su la taule des tratativis a son ancje une riforme costituzionâl che e garantissi il ricognossiment dai curdis e dai lôr dirits linguistics, la liberazion di almancul une part dai presonîrs politics e une pression plui lizere sui militants curdis. Pal prin ministri turc Recep Tayyip Erdoğan, il messaç di Öçalan al è une vore positîf, ma cumò si trate di viodi se la tregue e sarà rispietade.
Font: BBC, 21/03/13; Le Monde, 21/03/13; Naiz:, 22/03/13

Nessun commento: