In Galizie
invezit lis elezions dai 21 di Otubar a àn lassât il guvier de
comunitât autonome tes mans dal PP che al à otignût il 45,72% des
preferencis. Rispiet aes elezions dal 2009 la diestre spagnoliste e à
pierdût vôts, ma e je cressude come numar di elets che di 38 a son
passâts a 41. Il president dal guvier galizian in scjadince, Alberto
Núñez Feijóo, al podarà duncje contâ suntune maiorance assolude
in Parlament ancjemò plui fuarte di chê che lu veve poiât te
legjislature stade.
Plui che di un sucès dai Popolârs, chest
risultât al diven dai risultâts negatîfs dai Socialiscj, de
division in trê blocs dal nazionalisim galizian e di un malcontent
che al à puartât a di un aument des astensions e des schedis
blancjis o anuladis (plui dal 5%). Il PSdeG al è passât dal 31% dal
2009 al 20,53% di chestis elezions passant di 25 a 18 elets. Il
partît di riferiment dal nazionalisim galizian, ven a dî il Bloque
Nacionalista Galego (BNG), al è passât dal 16% al 10,16% dai vôts
e di 12 a 7 parlamentârs. Compromiso por Galicia (CxG), une
formazion nassude di cualchi mês par racuei i vôts dal nazionalisim
galizian plui moderât, e je rivade sì e no al un par cent dai vôts
cence rivâ a elei nissun rapresentant in Parlament. Intal front
nazionalist, la formazion vincidore e je stade Alternativa Galega de
Esquerda (AGE): un sogjet politic gnûf che al meteve adun Anova
Irmandade Nacionalista, nassude di une division dentri dal Bloque, cu
la çampe radicâl rapresentade di Esquerda Unida e cun altris piçui
grups di aree nazionalitarie. La gnove formazion politiche e je
duncje la vere novitât di chestis elezions e la stampe spagnole le à
za batiade la Syriza galiziane. Cui siei passe 200 mil vôts (o sei
il 13,99%) e i 9 deputâts e devente la tierce fuarce politiche de
Galizie, superant ancje il Bloque. Il so om di ponte, Xosé Manuel
Beiras, non storic dal nazionalisim galizian, al à za anticipât
bataie dentri e fûr dal Parlament sigûr che la sconfite dal PP e
rivarà de combinazion tra lotis sociâls e une oposizion dure in
Aule.
Font:
Galicia Hoxe, 21-22/10/12; El Pais, 21-22/10/12
Nessun commento:
Posta un commento