A van
dilunc a cressi i dubis e lis protestis su la gnove leç pal
Gaeltacht, o sei lis areis de Irlande là che la lenghe gaeliche e à
ancjemò une presince significative. Il test prontât dal guvier
irlandês al è cumò al esam des dôs ramis dal Parlament. Si trate
dal prin mudament de leç sul Gaeltacht dal 1956 incà e plui di
cualchidun al acuse il guvier di jessi intervignût plui par taiâ
lis spesis, che no par adatâ la legjislazion ae situazion diferente
che la lenghe gaeliche si cjate a vê in dì di vuê. Altris a
fevelin invezit di riduzion de democrazie dal moment che il test al
previôt che i membris de Údarás na Gaeltachta, la agjenzie di
svilup dai teritoris che a fasin part dal Gaeltacht, no saran plui
elets de int, ma nomenâts dal guvier e dai ents locâi.
Il ministeri
pes areis gaelichis, Dinny McGinley, al spieghe che lis politichis
pal gaelic a saran plui dongje de int viodût che il Gaeltacht al
sarà dividût in 19 areis di planificazion linguistiche in maniere
di svilupâ intervents plui specifics daûr des esigjencis diviersis
di ogni teritori; cui che nol metarà adun i plans di politiche
linguistiche si cjatarà invezit fûr dal Gaeltacht. Une des
critichis fatis indenant si riferìs però propit al probleme des
areis di cjapâ dentri o lassâ fûr des circoscrizions gaelichis. Cu
la gnove leç al sarà escludût cui che nol prepare i plans
linguistics, ma la cuistion e je che dal 1956 a vuê tantis des areis
là che il gaelic al veve une presince significative a son aromai
cuasi dal dut anglofonis. Daûr di une ricercje fate ancjemò tal
2007 al ven fûr che des 95 mil personis che a vivin dentri des
circoscrizions gaelichis, 50 mil si cjatin in areis che non àn plui
lis carateristichis linguistichis par stâ dentri dal Gaeltacht.
Chescj e altris problemis a son stâts segnalâts di politics,
esperts e associazions che a domandin di scoltâ i sogjets
interessâts al teme e di riviodi il test par superâ i ponts
critics, ma pal moment il guvier irlandês nol da segnâi di volê
cambiâ direzion.
Font:
Gaelport, 20-30/06/12 e 01-07/07/12
Nessun commento:
Posta un commento