Intune
conference stampe che si è tignude ai 28 di Jugn, i rapresentants de
Div Yezh, la associazion dai gjenitôrs impegnâts pal ûs dal breton
intal sisteme educatîf public, a àn fat il pont su la situazion dal
insegnament bilengâl intes scuelis publichis de Bretagne e a àn
segnalât i ponts critics che a varessin di jessi frontâts par
prins. In dì di vuê, intal sisteme scolastic public si àn 80
istitûts che a ufrissin une educazion bilengâl intes primariis e 26
intes secondariis, par un totâl di plui o mancul 6 mil arlêfs. Si
trate di une cifre che e va dilunc a cressi – tal 1991 i arlêfs a
jerin 545 e tal 2001 a jerin 2.650 – ma che e à di frontâ cetancj
pidiments.
Il numar di istitûts che a ufrissin un percors di studis
bilengâl nol rive a rispuindi ae domande sociâl, cun efiets plui
che evidents massime intes secondariis. Dome il 46% dai fruts che a
àn fat lis primariis bilengâls al va dilunc cun chest sisteme ancje
intes secondariis. Chest al dipent prin di dut dal numar masse bas di
istitûts superiôrs là che si dopre ancje il breton: cui che al vûl
continuâ cul insegnament bilengâl si cjate alore a vê di cirî
istitûts plui lontans cun distancis, timps e coscj che tancj no
rivin a frontâ. In altris câs i istitûts a son, ma no àn avonde
risorsis par garantî un percors scolastic par breton de stesse
cualitât di chel par francês o pûr a limitin la presince dal
breton dome par cierts percors setoriâi e no par ducj. I
rapresentants de Div Yezh a domandin duncje ae aministrazion
scolastiche di vierzi gnovis sezions bilengâls e di incressi il
numar di puescj a disposizion dai insegnants di e par breton di
maniere di vignî incuintri ae domande dal teritori. In ciertis
localitâts dut al sarès za a bon par partî cul prossim an
scolastic, pûr che e sedi ancje la volontât des autoritâts
politichis e scolastichis. In cierts câs – a ricuardin i membris
de associazion – a coventin dai intervents economics, legjislatîfs
o aministratîfs, ma in altris al bastarès doprâ il bon sens.
Font:
Agence Bretagne Presse, 28/06/12; Div Yezh, 28/06/12
Nessun commento:
Posta un commento