Scozie: a cressin i fonts pe television par gaelic

MG Alba, la societât che e gjestìs la television digjitâl scozese in lenghe gaeliche BBC Alba, e à otignût un finanziament straordenari de bande dal guvier britanic. Si trate di un milion di sterlinis di doprâ intai prossims doi agns par svilupâ programs gnûfs pe rêt televisive. BBC Alba e je di fat daûr a rinovâ il so palinsest che al à i siei ponts di fuarce te informazion, dai programs par fruts e tai documentaris. La societât e je cumò impegnade te produzion di programs di intratigniment e di senegjâts. L’episodi pilote dal ultin, Bannan, al sarà presentât in Setembar al festival internazionâl dal cine di Edimburc. Notis positivis a rivin ancje dal Gales, là che Radio Cymru, il canâl radiofonic de BBC par galês, e je daûr a cressi il numar dai siei scoltadôrs. L’ultin scandai al fevele di une medie di 147 mil scoltadôrs par setemane.

Font: BBC, 19/08/14 e 31/07/14

Paîs catalans: un pas indenant pal vôt pe indipendence

Il Consei des garanziis statutariis, ancje se par une grampe di vôts, al è stimât legjitime la leç su lis consultazions popolârs dal Parlament catalan par vie che e rispiete sei il Statût di autonomie che la Costituzion spagnole. Il puartevôs de Generalitat (guvier catalan) al à duncje declarât che, viodût che cumò no son pidiments juridics valits, si larà indenant cul percors par clamâ dongje ai 9 di Novembar un referendum su la indipendence de Catalogne. L’intervent al à jevât lis reazions contrariis dai partîts spagnoliscj ma al à dât un sburt in plui pe gnove manifestazion in program ai 11 di Setembar a Barcelone cuant che, dilunc des stradis de capitâl catalane, si disegnarà un grant “V” uman di 11 chilometris: un gnûf riclam ae Vie catalane pe indipendence, ma ancje ae Volontât popolâr, al Vôt pe autodeterminazion e ae Vitorie referendarie.

Font: VilaWeb, 22/08/14; Naiz:, 22/08/14

Gales: il guvier al finanzie gnûfs centris pe lenghe

Il guvier dal Gales al à decidût di meti fûr un milion e 250 mil di sterlinis par che a sedin vierts gnûfs centris pe lenghe galese. I fonts a laran aes aministrazions locâls, ma ancje ai istitûts superiôrs e aes universitâts, par che a metin in pîts struturis che a judin lis personis a comunicâsi tra di lôr par galês o a incressi lis competencis ta cheste lenghe. In Jugn invezit il guvier al veve dât fûr un milion e 600 mil sterlinis par sburtâ l’ûs sociâl de lenghe sei intes impresis che intes comunitâts. In curt e varès di inviâsi ancje une campagne par promovi l’ûs cuotidian dal galês. Lis misuris, judicadis masse debulis des associazions impegnadis pe lenghe, a cirin di rispuindi ae diminuzion intal ûs dal galês che il censiment dal 2011 al veve palesât.

Font: BBC, 06/08/14

Paîs catalans: fonts par infuartî la lenghe de Generalitat

La Generalitat (guvier catalan) e à assegnât passe 700 mil euros pes iniziativis indreçadis a cressi la cognossince e la presince de lenghe catalane fûr dai confins de comunitât autonome. Il finanziament plui grues, ven a dî 400 mil euros, al è lât ae rêt des bressolas (scuelis di lenghe catalane) in vore inte Catalogne dal Nord sot aministrazion francese. Pôc mancul di 150 mil euros a son stâts dâts al istitût Ramon Llull pe sô azion di promozion linguistiche e culturâl intal Alguer, la uniche citât de Sardegne là che si fevele par catalan. Altris 110 mil euros a son stâts assegnâts ae Fundació Escola Valenciana che e lavore par slargjâ l’insegnament e l’ûs sociâl dal catalan inte Comunitât Autonome Valenziane. Al è invezit di 70 mil euros il finanziament pe Obra Cultural Balear che e promôf l’ûs de lenghe intes isulis Baleârs.

Font: Europa Press, 14/08/14

Stât francês: la riforme regjonâl no ten cont des minorancis

Al varès di sierâsi chest Autun cu la aprovazion definitive de bande de Assemblee e dal Senât il percors legjislatîf par riformâ il sisteme regjonâl de France. Il proviodiment, che in Lui al è stât fat bon in prime leture, al puarte di 22 a 13 il numar des regjons par mieç di unions che no tegnin in nissun cont la presince di comunitâts nazionâls minorizadis e lis diferencis linguistichis e culturâls che a segnin il stât francês. Se la Corsiche, cul fat di jessi une isule, e rive a salvâsi de riforme, la Alsazie e ven metude adun cun Lorene e Champagne inagant cussì la sô specificitât identitarie. La Ocitanie invezit e reste dividude in diviersis regjons che a son plui grandis di chês di prime, ma che no van daûr di nissun criteri storic o linguistic. Par bascs, catalans e flamants no si previôt nissune forme aministrative specifiche, intant che la Bretagne e manten i siei confins di vuê cence abadâ aes mobilitazions fatis intai ultins agns par tornâ a dâi dongje il dipartiment de Loire Atlantiche.

Font: Agence Bretagne Presse, 18-24/07/14

Paîs Basc: il guvier de CAB al jude l’euskara in Iparralde

Il guvier de Comunitât Autonome Basche al à metût 1,6 milions di euros pe cooperazion linguistiche. Plui in detai, 400 mil euros a coventaran par judâ l’euskara in Ipar Euskal Herria, la part dal Paîs Basc che si cjate intal stât francês. Une altre part dai jutoris economics e larà, par mieç di convenzions di pueste, ai sogjets principâi impegnâts par valorizâ la lenghe basche intes scuelis (Seaska, Ikas-bi, Biga Bai, Euskal Hazia) e in altris cjamps de vite sociâl (AEK, Euskal Irratiak, Bertsularien Lagunak, Uda Leku). Chei altris fonts, invezit, a finanziaran uns setante progjets specifics.

Font: Deia, 16/07/14

Slesie: passe cent mil personis a domandin la autonomie

Ai 12 di Lui 5 mil personis a àn sfilât pes stradis di Katowicy / Katowice par domandâ il ricognossiment de autonomie pe Slesie e dal status di minorance pe sô popolazion. La manifestazion e fâs part di une campagne, sburtade massime dal partît autonomist Ruch Autonomii Slaska, che e à za cjapât sù plui di 120 mil firmis par che il Parlament polac al ricognossi chestis dôs rivendicazions. Passade de Gjermanie ae Polonie cu la fin de seconde vuere mondiâl, la Slesie e manten carateristichis particolârs rispiet al rest dal stât che però no i ricognòs nissun status specific. Pal RAS il prin pas al è chel de autonomie pe Alte Slesie, là che il nivel di autocussience al è plui alt, par passâ po al stes status ancje pe Basse Slesie intune suaze di decentrament che al cjapi dentri dute la Polonie.

Font: European Free Alliance, 15/07/14

Corsiche: il FLNC al declare la fin de lote armade

“Un cicli si siere. Al è rivât il timp di passâ a di une fase gnove, chê de costruzion di une fuarce politiche par guviernâ la Corsiche e puartâle ae indipendence.” Al è un dai passaçs clâf dal document dât fûr ai 26 di Jugn dal FLNC par comunicâ la fin de sô ativitât armade tacade pôc mancul di cuarante agns indaûr. La organizazion armade e à decidût di inviâ un procès di disarmament e di jessude progressive de clandestinitât. Intal comunicât di cutuardis pagjinis il FLNC al fronte in detai la situazion de Corsiche e lis resons che lu àn puartât a cjapâ cheste decision unilaterâl. Intai ultins agns la clime e je cambiade e si son vierts spazis gnûfs pe azion politiche, intant che temis che a jerin patrimoni esclusîf de aree nazionalitarie a son stâts cjapâts sù ancje di altris fuarcis politichis de isule. Pal FLNC la lote pe autodeterminazion e à fat pas indenant e, cundut che il confront cul stât centrâl al reste une vore dûr, par puartâle indenant no je plui bisugne des armis.

Font: Alta Frequenza, 26/06/14; Gara, 04/07/14

Bretagne: gnove manifestazion a Nantes pe riunificazion

A jerin sù par jù 15 mil lis personis che sabide ai 28 di Jugn si son dadis dongje a Naoned / Nantes par rivendicâ il dirit ae riunificazion dal dipartiment de Loire Atlantiche cul rest de Bretagne storiche e par fâi cuintri al progjet di riorganizazion des autonomiis regjonâls imbastît dal guvier francês che nol ten in cont cheste volontât popolâr. Al è zaromai di agns che lis organizazions Bretagne Réunie e 44=BZH, che a àn inmaneât la manifestazion, a domandin che i citadins dal dipartiment, che cumò al dentri inte regjon dal Paîs de Loire, a puedin decidi cuntun referendum se mantignî l’implant aministratîf cumò in vore o ben dâsi dongje cul rest de Bretagne.

Font: Agence Bretagne Presse, 29/06/14

Paîs Basc: passe 100 milions ad an pal euskara

Ai 24 di Jugn il guvier de Comunitât Autonome Basche al à fate buine la Agjende Strategjiche dal Euskara 2014 – 2016 là che a son dentri lis liniis di intervent pal svilup de lenghe basche intai prossims agns e che e pues contâ suntune disponibilitât finanziarie di 335 milions di euros. La Agjende e fisse 168 azions che a pontin a vê – cemût che al à spiegât il president de Comunitât, Iñigo Urkullu – un “bilinguisim plui ecuilibrât, che al scurti la distance jenfri euskara e spagnûl e che si poi sul consens de societât”. Il guvier basc al ponte a no lassâ fûr nissun par rivâ a di une societât là che ducj a rivin a di un nivel minim di bilinguisim, in maniere di infuartî ancje la coesion sociâl. Si larà cussì a incressi la poie dai centris pal insegnament ai adults, a svilupâ programs di pueste pe integrazion linguistiche dai imigrâts, a infuartî la presince de lenghe intes citâts plui gruessis, a svilupâ modei di lavôr che a permetin aes aministrazions publichis di funzionâ in maniere normâl ancje par euskara e v.i. Par fâlu a saran invistîts passe un centenâr di milions di euros ad an intai prossims trê agns. Cifris che si zontin aes risorsis za previodudis pe lenghe basche dentri de scuele, de radiotelevision publiche (EiTB) e de polizie locâl (Ertzaintza).

Font: El Correo, 24/06/14

Paîs Basc e Paîs Catalans: in place pe autodeterminazion

Ai 8 di Jugn a son stâts passe 150 mil i bascs che a àn rispuindût al apel de organizazion Gure Esku Dago e si son dâts adun intune lungje cjadene umane pe autodeterminazion che e à scjavaçât il Paîs Basc par 123 chilometris, di Iruñea/Pamplona a Durango. La iniziative e à vût une partecipazion che e je lade di là di ce che si spietavisi al pont che in cualchi trate la cjadene umane e à vût di dopleâsi. La manifestazion si è davuelte intune clime di fieste e e à vût il so moment principâl tor misdì cuant che i partecipants si son dâts la man par formâ la cjadene umane che po e je stade mantignude par une miezore. In diviersis localitâts cjapadis dentri de iniziative i organizadôrs a àn let un messaç là che si domande che ai bascs ur vegni permetût di esercitâ in maniere libare il dirit di decidi il lôr avignî.

Paîs Catalans: tes Baleârs il 77% al sielç la scuele par catalan

Daûr di ce che e previôt la leç, intes isulis Baleârs a son i gjenitôrs che, intal moment che a iscrivin i lôr fîs ae scuele de infanzie, a àn di sielzi la prime lenghe di insegnament. I dâts pal an scolastic 2014-2015, a pene dâts fûr dal assessorât pe educazion des isulis, a mostrin che il 77% des fameis e à sielzût il model cul catalan tant che prime lenghe e dome il 22% al à decidût par chel cul spagnûl. Si trate di une percentuâl un tic plui basse rispiet a chê dal an passât, ma chel istès e mostre a clâr cuale che e je la preference des fameis des Baleârs, massime se si ten cont che intai ultins agns il guvier des isulis – che al è intes mans de diestre spagnoliste – al à puartât indenant atacs une vore dûrs cuintri dal insegnament par catalan.

Font: Diario de Ibiza, 31/05/14

Stât spagnûl: intes europeanis a cressin i elets sovraniscj

Intes elezions europeanis dal 2014 il numar plui alt di elets espression direte des nazionalitâts minorizadis si lu à vût intal ream di Spagne. Par superâ i pidiments leâts al numar une vore alt di vôts che al coventave par otignî dai eurodeputâts, la plui part dai partîts nazionalitaris si è dade dongje in cartei eletorâi che a cjapavin dentri formazions rapresentativis di nazionalitâts diferentis.

Il risultât miôr al è stât chel de Coalizion pe Europe (CEU), là che a jerin dentri i rapresentants dal nazionalisim moderât catalan e basc, che e à cjapât il 5,4% dai consens a nivel statâl e e à rivât a elei trê eurodeputâts: doi di CiU (Ramón Tremosa e Francesc de Paula Gambús) e une dal PNV (Izaskun Bilbao). Subite daûr e je rivade la coalizion de Çampe pal dirit di decidi (EPDD), metude adun de çampe indipendentiste catalane di ERC-NECat, che e à cjapât il 4% des preferencis e doi elets (Josep Maria Terricabras e Ernest Maragall). La coalizion I popui a decidin (LPD) che e meteve adun altris formazions sovranistis e à cjapât il 2,1% dai vôts e puartât ae elezion di Josu Juaristi di Bildu, partît de çampe indipendentiste basche, cul acuardi che tor de metât legjislature i lassarà il puest al prin dai no elets che al parten al Bloque Nacionalista Galego. Jordi Sebastià Talavera, de formazion sovraniste catalane Compromìs, al è stât elet invezit cu la coalizion Vierte europeane (PE) che a nivel statâl e à cjapât il 1,9% des preferencis. Inte coalizion de Çampe plurâl (IP), che e à cjapât il 10% dai vôts, a jerin dentri ancje candidâts di formazions nazionalitaris: doi di lôr a son stâts elets, ven a dî Ernest Urtasun Domenech di Iniciativa per Catalunya Verds e Maria Lidia Senra dal moviment galizian A Nova.

Stât francês: nissun nazionalitari elet intes europeanis

Intal stât francês lis elezions europeanis a àn viodût la afermazion tant che prin partît de estreme diestre dal Front National che e à vût un cuart dai vôts e 24 dai 74 eurodeputâts a disposizion de France. Al secont puest si è plaçade la diestre moderade de Union pour un Mouvement Populaire (UMP) cul 20,8% des preferencis e 20 elets, in pierdite rispiet aes elezions dal 2009 compagn dai socialiscj (PS) che a àn vût di contentâsi dal 14% dai vôts e di 13 eurodeputâts. Tra lis formazions nazionalitariis che si presentavin aes europeanis nissune e à rivât a cjapâ avonde vôts par elei cualchidun dai siei candidâts, fale intal câs de Union pour les Outre-Mers, coalizion di partîts dai teritoris dal stât francês che si cjatin in altris continents, che e à concuistât un eurodeputât. Tra i partîts francês chel plui sensibil aes tematichis nazionalitariis al è dal sigûr Europe Écologie che e à vût il 8,9% dai vôts e 6 elets. Cundut dal passe 21% di vôts cjapâts in Corsiche, no je à fate a jessi confermât François Alfonsi, dal Partidu di a Nazione Corsa, che la volte stade al jere stât elet propit in gracie de aleance cun Europe Écologie. Di segnalâ ancje il 7,5% dai consens cjapâts in Bretagne de liste Nous te ferons Europe, vuidade dal indipendentist breton Christian Troadec e poiade dal Parti Breton, di Breizh Europe, dal Mouvement Bretagne Progrès e di une part dal moviment dai Bonnets Rouges. E coreve par so cont invezit la Union Démocratique Bretonne che e à cjapât sù par jù il 2% dai vôts.

Font: elections2014.eu; Alta Frequenza, 26/05/14; Agence Bretagne Presse, 26-27/05/14

Ream Unît: confermâts i 4 europarlamentârs nazionalitaris

Intal Ream Unît lis elezions europeanis a son stadis segnadis dal sucès dal United Kingdom Independence Party, moviment politic che al à cjapât sù il malcontent britanic intai confronts des politichis de Union Europeane e cun pôc mancul dal 27% dai vôts al à elet 24 eurodeputâts.

In Scozie invezit il partît plui votât al reste il SNP che cul 28,9% des preferencis al à confermât i siei doi rapresentants intal Parlament di Strasburc. Chei altris cuatri eurodeputâts scozês a rivin doi dal partît laburist (25,9%) e un parom dal partît conservadôr (17,2%) e dal UKIP (10,4%). I Verts, che in Scozie a son a pro de indipendence, cul 8% dai vôts a mancjin di pôc la elezion di un lôr candidât.

In Gales invezit i Laburiscj a tornin al prin puest cun passe il 28% dai consens, di pôc denant dal UKIP che al à vût il 27,5% des preferencis. Al tierç puest si son plaçâts i Conservadôrs cul 17,4% di vôts e al cuart i nazionalitaris dal Plaid Cymru cul 15,2%. A son chestis formazions a otignî i cuatri europarlamentârs che il Gales al à a disposizion. Cundut di une piçule flession, duncje, il Plaid Cymru al conferme il so rapresentant a Strasburc.

Situazion un grum divierse in Cornualie, dal moment che cheste piçule nazion celtiche e je cjapade dentri inte circoscrizion eletorâl britaniche dal Sud Ovest là che e devente une minorance. Viodût che rivâ a mandâ un so rapresentant in Europe al sarès stât impussibil il partît nazionalitari Mebyon Kernow al à decidût di no partecipâ al vôt.

In Irlande dal Nord il Sinn Féin al reste il partît plui votât cul 25,5% des preferencis. In gracie di chest risultât la formazion republicane irlandese e varà ancjemò une volte un so rapresentant intal Parlament european. Chei altris doi puescj disponibii inte circoscrizion a son lâts invezit ai doi principâi partîts unioniscj o sei il Democratic Unionist Party, che al à cjapât il 20,9% dai vôts, e l’Ulster Unionist Party che al è stât sielzût dal 13,3% dai eletôrs. Pôc daûr, cul 13% dai consens, si è plaçât il Social Democratic and Labour Party, riferiment de comunitât nazionaliste irlandese moderade.

Font: elections2014.eu; BBC, 26-27/05/14; Mebyon Kernow, 26/05/14

Irlande: salt indenant dal Sinn Féin inte Republiche

Se in Irlande dal Nord il Sinn Féin al conferme lis sôs posizions, inte Republiche irlandese al fâs un salt indenant e cul so 17% di vôts al rive a concuistâ trê eurodeputâts, cuant che intal 2009 no ‘ndi veve nancje un. Cheste volte a jessi penalizât dal sisteme eletorâl in vore te Republiche a son stâts i moderâts dal Fianna Fáil che, cundut dal 22% des preferencis, a àn vût di contentâsi di doi elets. Plui o mancul stesse percentuâl di vôts, ma cuatri eurodeputâts, pai conservadôrs dal Fine Gael. I Laburiscj irlandês a pierdin invezit il lôr rapresentant a Strasburc a vantaç dai Verts.

Font: elections2014.eu

Belgjiche: sucès de Gnove Aleance Flamande

Inte Belgjiche ancje il vôt pes europeanis al è organizât daûr des trê comunitâts principâls che a componin il paîs, ven a dî i flamants, i valons e la minorance di lenghe todescje che e vîf inte part orientâl dal stât.

Intes Flandris i plui votâts a son stâts i sovraniscj de Gnove Aleance Flamande (N-VA) che cul 16,4% dai vôts su scjale statâl e 4 eurodeputâts elets a son passâts denant dai liberâi democratics (Open VLD) e dai cristians democratics (CD&V) che a àn vût il prin trê e il secont doi elets. Chei altris trê puescj di eurodeputâts inte aree flamande sai son dividûts i Socialiscj (SP.A), i Verts (Groen!) e la estreme diestre indipendentiste dal Vlaams Belang.

In Valonie i socialiscj a restin i plui votâts e a confermin i trê eurodeputâts che za a vevin. Ur ven subite daûr il Mouvement Réformateur che al passe di doi a trê elets. Avonde plui indaûr o cjatìn invezit i ambientaliscj dal Ecolo e il Centre Démocrate Humaniste che a cjapin un eurodeputât parom.

Te circoscrizion di lenghe todescje l’unic puest a disposizion al è lât ancjemò une volte al candidât dal Partît Cristian Sociâl (CSP).

Font: elections2014.eu; Naiz:, 25/05/14

Un elet svedês in Finlande, une rom in Svezie

In Finlande l’unic partît in corse pes elezions europeanis che al rapresentave une comunitât di minorance al jere il Svenska Folkpartiet i Finland (SFP) che al à otignût il 6,7% des preferencis e un eurodeputât. Nissune rapresentance, invezit, pe comunitât sami che, par chel che al rivuarde i stâts membris de Union Europeane, e vîf ancje in Svezie. Tra l’altri, propit ta chest ultin paîs, e merete segnalade la elezion di Soraya Post, dal moviment Feministiskt Initiativ, che e je ancje une ativiste di prin plan de comunitât rom.

Font: elections2014.eu; YLE, 26/05/14; Finland Times, 26/05/14; Sverigesradio, 26/05/14

Intai paîs baltics elets trê eurodeputâts di minorance

Par chel che al rivuarde lis republichis baltichis, in Lituanie il partît Azion Eletorâl dai Polacs in Lituanie (LLRA / AWPL: Lietuvos lenkų rinkimų akcija / Akcja Wyborcza Polaków na Litwie), ancje in gracie de aleance cuntune formazion rapresentative de minorance russe, al à cjapât plui dal 8% des preferencis e elet un dai siei candidâts intal Parlament european.

In Letonie invezit l’unic moviment rapresentatîf di une minorance a otignî un eurodeputât al è stât la Union dai Rus de Letonie (LKs: Latvijas Krievu savienība). E à otignût il 6,4% dai vôts e permetût la conferme di Tatjana Ždanoka, za eurodeputade a Strasburc intal 2004 e intal 2009. Union dai Rus de Letonie al è il non gnûf cjapât dal ex Partît pai Dirits Umans intune Letonie Unide (PCTVL: Par cilvēka tiesībām vienotā Latvijā).

In Estonie, là che la minorance plui gruesse e je chê russe, nissune formazion rapresentative di cheste comunitât e à vût risultâts significatîfs. Al è però di segnalâ che intal Partît di Centri de Estonie (KE: Eesti Keskerakond), che al à cjapât passe il 22% des preferencis, la uniche europarlamentâr elete e je Yana Toom che e parten propit ae minorance russe.

Font: elections2014.eu; The Lithuania Tribune, 26/05/14; Leta, 26/05/14; News.err.ee, 25/05/14

Slovachie: elets doi eurodeputâts de minorance ongjarese

In Slovachie, là che i plui votâts a son stâts ancjemò une volte i socialdemocratics dal SMER cul 24% des preferencis e 4 rapresentants intal Parlament european, a son stâts elets ancje doi rapresentants de minorance ongjarese. Ancje intal 2009 la comunitât magjare de Slovachie e veve elet doi deputâts a Strasburc, ma cheste volte i elets a rivin di doi partîts diviers, ven a dî il Partît de Coalizion Ongjarese (MKP / SMK: Magyar Közösség Pártja / Strana maďarskej koalície), che al à otignût il 6,5% dai vôts, e il moviment Most-Híd che al à cjapât il 5,8% des preferencis. In Slovachie, compagn che inte Republiche ceche e in Ongjarie, e vîf ancje une gruesse comunitât rom che dut câs, ancje cuant che e si propon cun partîts di stamp etnic, no rive a vê risultâts eletorâi significatîfs.

Font: elections2014.eu