Ai 8 di
Jugn a son stâts passe 150 mil i bascs che a àn rispuindût al apel
de organizazion Gure Esku Dago e si son dâts adun intune lungje
cjadene umane pe autodeterminazion che e à scjavaçât il Paîs Basc
par 123 chilometris, di Iruñea/Pamplona a Durango. La iniziative e à
vût une partecipazion che e je lade di là di ce che si spietavisi
al pont che in cualchi trate la cjadene umane e à vût di dopleâsi.
La manifestazion si è davuelte intune clime di fieste e e à vût il
so moment principâl tor misdì cuant che i partecipants si son dâts
la man par formâ la cjadene umane che po e je stade mantignude par
une miezore. In diviersis localitâts cjapadis dentri de iniziative i
organizadôrs a àn let un messaç là che si domande che ai bascs ur
vegni permetût di esercitâ in maniere libare il dirit di decidi il
lôr avignî.
Inte stesse
zornade, il dirit ae autodeterminazion al è stât al centri ancje di
une iniziative inmaneade dal Òmnium Cultural. Tor misdì 71
“castellers” (cjistiei di personis) si son jevâts ator pe
Catalogne, intes citâts plui impuartantis de Europe (Berlin,
Bruxelles, Gjinevre, Lisbone, Londre, Parîs e Rome) e fintremai
intes Americhis (Montréal in Québec e Santiago in Cile) par
sensibilizâ la opinion publiche internazionâl sul referendum pe
indipendence catalane dai 9 di Novembar che lis istituzions spagnolis
a vuelin proibî. Un “casteller” al è stât tirât sù ancje a
Iruñea cun chê di leâ la rivendicazion catalane cun chê basche.
Font:
Naiz:, 08/06/14; VilaWeb; 08-09/06/14; Jornalet, 09/06/14
Nessun commento:
Posta un commento