Paîs Catalans: Correllengua 2020 par cuatri dîs a Sitges

Nassude tal 1993 intes isulis Baleârs daûr dal model de Korrika basche, Correllengua e à po cjapât dentri ducj i Paîs Catalans e chest an, rivade ae sô vincjecuatresime edizion, e à vût di davuelzisi tune maniere dal dut strassomeade par vie de pandemie. La manifestazion si à tignude a Sitges dai 30 di Setembar ai 3 di Otubar e e je stade dedicade al poete Josep Carner i Puig-Oriol tal cincuantesim de sô muart. Il messaç centrâl di cheste edizion al è stât che «fevelâ par catalan al è invidâ e invidâ al è convivi” cun chê di rivendicâ il catalan di une prospetive sociâl e meti in evidence il so potenziâl di coesion.

Font: Generalitat de Catalunya, 30/09/20

Scozie: manifest pe sorevivence des comunitâts gaelichis

Daûr di une ricercje de universitât des Highlands e des Isulis intal zîr di pôcs agns l’ûs sociâl e la trasmission dal gaelic a rivaran al colàs ancje ta chês comunitâts là che ancjemò si lu dopre in maniere cuotidiane te vite di ogni dì. A front di cheste prospetive il coletîf Misneachd al à publicât un manifest indreçât a ducj i partîts politics là che a proponin une serie di misuris par invertî chest procès intes isulis ocidentâls de Scozie là che il gaelic al è ancjemò lenghe di comunitât. Par fâi cuintri ae sostituzion de popolazion native cun int vignude di fûr si domande une strategjie ocupazionâl che e valorizi il gaelic, une politiche abitative che e judi la popolazion locâl, limitazions al possès di secondis cjasis e une tasse sul turisim. Si invide po il guvier a finanziâ in maniere suficiente il Consei des isulis ocidentâls par che al puedi garantî ducj i servizis che a coventin aes comunitâts locâls. Sul plan educatîf si propon un curriculum specific basât su la identitât gaeliche des isulis e la sostituzion dal inglês cul gaelic come lenghe veicolâr intes scuelis, cun di plui si invide il guvier a finanziâ un an di imersion intes isulis par chei che si specializin in lenghe gaeliche tes universitâts.

Font: Herald Scotland, 30/09/20

Corsiche: prin nazionalist cors elet al Senât

E cres la presince nazionalitarie corse a Parîs e cumò, dopo dai trê deputâts elets inte Assemblee statâl, pe prime volte si à un rapresentant de coalizion Femu a Corsica tal Senât francês. Si trate di Paulu Santu Parigi, elet cul 58,8% dai consens inte circoscrizion de Corsiche setentrionâl in ocasion des elezions che a àn rignuvît metât dai puescj de cjamare alte francese. Parigi al varès di dâsi adun intal grup dai Verts là che al sarà ancje Daniel Salmon, elet in Bretagne cuntune liste ecologjiste-autonomiste (EELV-UDB).

Font: Jornalet, 29/09/20

Paîs Catalans: confermade la inabilitazion pal president Torra

Il guvier catalan si ricjate ancjemò une volte cence president par vie di un intervent des autoritâts judiziariis spagnolis. Ai 28 di Setembar, di fat, il tribunâl suprem spagnûl al à confermade la sentence che e inabilite di ogni incarghe publiche par un an e mieç il president dal guvier catalan (Generalitat), Quim Torra. La sentence, che e devente cumò esecutive, e jere stade decidude dal tribunâl superiôr di justizie de Catalogne pal reât di disubidience. A Torra i vignive contestade la decision di no ritirâ i strissons di solidarietât cui presonîrs politics e lis bandieris indipendentistis (esteladas) dai edificis publics dal guvier catalan intant de ultime campagne eletorâl. La zonte eletorâl centrâl di Madrid i veve ordenât di fâlu parcè che a so parê si tratave di simbui di partît e no di une azion politiche pai dirits umans. La conferme de sentence e à discjadenât cetantis manifestazion di proteste ator pe Catalogne. Il president dal Parlament catalan, Roger Torrent, al à fat savê che, se no si varà nissun candidât che al gjolt di une poie maioritarie dentri de Assemblee – come che al somearès –, si larà a clamâ gnovis elezions pai 14 di Fevrâr dal 2021.

Font: VilaWeb, 28/09/20 e 02/10/2020; Naiz:, 28/09/20

Gales: presentât il rapuart de comission su la indipendence

Ai 25 di Setembar la comission galese su la indipendence e à fat cognossi il rapuart che e à disvilupât su cheste tematiche. La comission e calcole che la indipendence e je l’obietîf che il Gales al varès di proponisi di otignî, ancje parcè che e sarès la uniche maniere par infuartî la proprie economie che cumò e je dal dut condizionade des decisions e des dibisugnis di Londre. Chel istès intal rapuart si sugjerìs al guvier galês di procedi cuntun referendum esploratîf che al permeti ai citadins di esprimisi su lis diviersis opzions costituzionâls su la taule. Dongje de indipendence, par esempli, si podarès resonâ suntune riforme radicâl che e mudàs il Ream Unît intun stât federâl o ben suntun Gales che al aderìs ae aree di libar scambi de Union Europeane par regolâ po in maniere autonome i siei pats economics cu la Ingletiere. La consultazion esplorative e varès duncje di permeti di selezionâ la ipotesi che i galês a àn miôr in maniere che e sedi chê po la alternative al status quo di proponi intun referendum là che i citadins a varan di rispuindi in maniere secje di sì o di no.

Font: Nation Cymru, 25/09/20

Sardegne: pas indenant pes lenghis minorizadis a scuele

Ai 25 di Setembar il guvier regjonâl de Sardegne al à publicât l’avîs public pal insegnament e l’ûs veicolâr des lenghis propriis inte scuele e tal specific dal sart, dal catalan dal Alguer / Alghero e des varietâts galurese, sassarese e tabarchine. Il bant al met a disposizion pôc mancul di un milion di euros su dôs liniis di intervent batiadis Insulas e Frailes, la prime dedicade al ûs e al insegnament des lenghis in orari curicolâr (660 mil euros) e la seconde ai laboratoris didatics extracuricolârs (sù par jù 284 mil euros). Lis risorsis a son a disposizion des scuelis de infanzie, di chês primariis e di chês secondariis de isule. Te stesse zornade si à metût sù ancje il bant pal catalic dai laboratoris didatics intes lenghis minorizadis. Un pâr di setemanis prime, invezit, al jere jessût l’avîs pe costituzion de liste regjonâl dai insegnants di lenghe sarde e catalane. Si trate di azions che, intune cu la delibare dal esecutîf regjonâl che e fisse lis liniis di indreçament sul ûs e sul insegnament des lenghis propriis, a permetin di struturâ miôr e di infuartî la presince di chestis lenghis intes scuelis de Sardegne.

Font: RAS, 25/09/20

Cechie: riclam dal Consei de Europe sul romani a scuele

La Cjarte europeane des lenghis regjonâls o minoritariis e je operative te Republiche Ceche dal 2007 incà. Tal moment de sô ratifiche a son stadis segnaladis come lenghis di tutelâ cravuat de Moravie, polac, romani, slovac e todesc. Intal so ultin rapuart sul rispiet de Cjarte, il Consei de Europe al à segnalât cemût che te documentazion prontade dal guvier di Praghe al sedi sparît ogni riferiment ae lenghe slovache. L’organisim european al domande ancje aes istituzions cechis di sbassâ il soiâr dal 10% de popolazion che al parten a di une minorance come criteri par meti fûr segnaletiche bilengâl. Il dât plui critic però al è chel che si riferìs ae presince dal romani a scuele. Cun di fat, se la lenghe de comunitât rom e cjate une cierte atenzion te universitât e je invezit dal dut insuficiente tes scuelis primariis e secondariis e assente te scuele de infanzie. Tra i elements positîfs si àn invezit la ufierte dal insegnament de lenghe todescje in diviersis scuelis de aree storiche di presince di cheste comunitât e lis iniziativis par promovi il cravuat de Moravie.

Font: Romea.cz, 25/09/20

Asturiis: mobilitazion par une RTPA plui asturiane

Al à non “Par une RTPA al servizi de culture asturiane” il document firmât di passe un centenâr tra scritôrs, musiciscj, atôrs, editôrs, artiscj e operadôrs culturâi asturians. L’invît che a indrecin ae radiotelevision publiche des Asturiis al è di deventâ il lûc là che si valorizin i contignûts culturâls e musicâi origjinâi di cheste comunitât, a tacâ di chei fats par asturian o tal galizian che si fevele te part plui ocidentâl dal paîs. Ae RTPA si domande di valorizâ e di popolarizâ lis creazions artistichis e culturâls espression de comunitât locâl, no dome par garantî un dirit coletîf, no dome par promovi lis lenghis propriis ma ancje par sostignî la industrie culturâl asturiane. La radiotelevision publiche, za par leç, e varès di zuiâ une funzion centrâl inte promozion de culture e des lenghis dal teritori. La realtât e je invezit une vore divierse al pont che, in dì di vuê, nol esist nancje un program specific dedicât ae musiche o ae leterature par asturian.

Font: Nortes, 24/09/20

Paîs Basc: viertis lis adesions pe seconde edizion di Euskaraldia

Ai 24 di Setembar si son viertis lis iscrizions pes personis che a vuelin partecipâ ae seconde edizion di Euskaraldia, la iniziative che si propon di sburtâ l’ûs sociâl de lenghe basche e che si davuelzarà dai 20 di Novembar ai 4 di Dicembar di chest an. I organizadôrs a sperin che si mantegni la diversitât di adesions che si veve vude vie pal 2018 intant de prime edizion de iniziative e a pontin a coinvolzi lis categoriis che a jerin stadin sotrapresentadis inta chê ocasion, ven a dî i zovins tra i 16 e i 30 agns e i oms. E ven confermade la pussibilitât di aderî come ahobizi, ven a dî personis che dilunc vie de iniziative si impegnin a fevelâ simpri par basc cun ducj chei che lu capissin, o pûr come belarriprest, o sei chei che a àn dome une cognossince passive de lenghe ma a vuelin che si ur feveli par euskara. Une des novitâts di cheste edizion a son invezit i arigune o sei spazis pensâts par favorî la conversazion par basc dentri di impresis, buteghis e istituzions: a vuê a ‘nd è stâts za metûts sù plui di 13 mil. Par chel che al rivuarde lis localitâts, chês che a àn za aderît a son 412, in cressi duncje rispiet ae edizion stade.

Font: EiTB, 24/09/20

Paîs Catalans: celebrâts i 15 agns dal domini .cat

Ai 16 di Setembar la fondazion PuntCAT e à celebrât i 15 agns de nassite dal domini .cat che, juste ta chê stesse zornade dal 2005, al veve vût il vie libare dal organisim internazionâl che al autorize e al controle i dominis web (ICANN). Chel catalan al è stât il prin domini assegnât a di une comunitât linguistiche e nazionâl minorizade. Ta chescj 15 agns a son stâts regjistrâts passe 108 mil sîts cun chest domini.

Font: Generalitat de Catalunya, 18/09/20

Galizie: propueste par un canâl par galizian pai fruts

A Mesa pola Normalización Lingüistica e à comunicât che e presentarà une propueste no di leç di iniziative popolâr intal Parlament de Galizie cul obietîf di impegnâ il guvier de comunitât autonome a cjapâ dutis lis misuris che a coventin par che la radiotelevision publiche galiziane (CRTVG) e meti sù un canâl in lenghe proprie dut dedicât a fruts e fantats. La situazion e je lade in piês an dopo an e, in dì di vuê, la programazion par galizian dedicade ai plui zovins e je a pene il 4,6% dal totâl. Par che la iniziative e puedi concretizâsi al covente cumò sostignî la propueste cuntune racuelte di firmis che e impegnarà tai prossims mês A Mesa e altris coletîfs che a poin cheste bataie. Une prove gjenerâl in chest sens e je stade fate in rêt là che in a pene cuatri dîs la organizazion e à tirât sù 8 mil adesions.

Font: A Mesa, 17/09/20

Cornualie: di Londre nuie bêçs pe lenghe corniche tal 2020

Par tacâ a dâi sostance ai impegns cjapâts cul inseriment de comunitât corniche tra chês tuteladis par mieç de Convenzion cuadri pe protezion des minorancis nazionâls, vie pal 2019 il guvier britanic al veve assegnât al Consei de Cornualie 200 mil sterlinis: 150 mil par promovi la cognossince e l’ûs de lenghe proprie e 50 mil par azions di promozion culturâl. Chest an, invezit, nol rivarà nancje un franc. La conferme si le cjate te rispueste mandade al president dal Consei de Cornualie, Julian German, dal ministeri pal guvier locâl e pes comunitâts. Cun di fat, se di une bande l’esecutîf britanic al sigure il so impegn par sostignî e promovi il cornic, di chê altre bande al fâs savê che chest an no saran trasferîts al Consei de Cornualie fonts par cheste finalitât. Te stesse letare si conferme po che al sarà il guvier di Londre e no lis autoritâts locâls a rapresentâ la Cornualie intal consei britanic – irlandês des lenghis minoritariis e nativis.

Font: Cornish Stuff, 16/09/20

Gales: secondis cjasis plaie ancje pe lenghe

Il consei comunâl di Nefyn al à domandât al guvier galês di inviâ une gnove politiche par chel che si riferìs aes secondis cjasis e, plui tal detai, di previodi che cui che al vûl comprâ une cjase pes vacancis o par trasformâle tun AirBnB al vedi bisugne de autorizazion des autoritâts locâls su la fonde di une planificazion specifiche pe edilizie residenziâl e che, tal câs che al vegni autorizât, al vedi di paiâ tassis plui altis. Cun di plui si domande ancje di garantî la prioritât di acuist pe int dal puest. Chest comun, compagn di altris localitâts galesis, si ricjate di fat a vê di frontâ un aument simpri plui fuart de domande di cjasis di comprâ e dal lôr presit. Tra lis consecuencis di cheste situazion si à che la int dal puest e massime i zovins no son plui in stât di frontâ il cost par cjolisi une cjase e a son obleâts a lâ vie. Ta cheste maniere i paîs a pierdin a man a man la int che e je nassude e cressude alì par lassâi il puest a int di fûr che e ven alì se e ve ben juste par pôcs mês ad an. Un tant al rapresente un colp cetant dûr ancje sul plan linguistic e areis là che il galês al è ancjemò la prime lenghe a riscjin di deventâ simpri plui anglofonis e di pierdi la lôr identitât. Pes aministrazions locâls il guvier galês nol dediche avonde atenzion a cheste situazion e lu invidin a intervignî cun urgjence par fermâ cheste plaie che e va cuintri ancje dai progjets di difese e di incressite de lenghe proprie che, a peraulis, l’esecutîf al dîs di vê.

Font: Nation Cymru, 16/09/20

Paîs Catalans: RTVE Catalunya e doplee lis oris par catalan

La sede catalane de radiotelevision publiche spagnole, RTVE Catalunya, e à presentât la gnove stagjon 2020-2021 che e mostre diviersis novitâts rispiet al an passât. Une di chestis e je che lis oris di emission par catalan si doplearan. Cun di fat, se l’an passât si vevin 24 oris par setemane di contignûts in lenghe proprie, chest an lis oris setemanâls par catalan a saran 48. La maiorance des trasmissions in lenghe catalane a saran centradis su 6 oris in dì dividudis in trê fassis orariis diferentis.

Font: Generalitat de Catalunya, 15/09/20

Corsiche: iniziative par impuartâ il model scolastic basc

Tra i 12 e i 14 di Setembar une delegazion di professôrs e aministradôrs locâi cors e à visitât il Paîs Basc setentrionâl (Ipar Euskal Herria) par studiâ plui di dongje il sisteme des scuelis imersivis par euskara gjestidis de federazion Seaska. Si trate de rêt che e ten adun une cuarantine di istitûts scolastics che a van de scuele de infanzie fintremai lis secondariis là che l’insegnament al è fat in lenghe basche. Dal 1994 incà, chestis ikastolas a son stadis ricognossudis come scuelis parificadis. Chest al vûl dî che, ancje se si trate di struturis privadis gjestidis in gjenar des associazions dai gjenitôrs, i professôrs a son paiâts dal stât centrâl e lis struturis a son metudis a disposizion o paiadis des aministrazions locâls. In dì di vuê, a cjapin dentri plui o mancul il 10% dai students dal Paîs Basc setentrionâl. A front de riforme Blanquer e di altris atacs al insegnament des e tes lenghis minorizadis dentri dal stât francês, in Corsiche si à decidût di provâ a rispuindi inviant un model scolastic come chel basc. Il prin pas al varès di jessi fat chest an che al ven cu la partence di dôs scuelis de infanzie a imersion, une a Bastia e chê altre a Biguglia.

Font: CorseNetInfos, 15/09/20

Ocitanie: altris dâts de ultime inchieste sociolinguistiche

Ancjemò tal Jugn di chest an l’Ufici Public de Lenghe Ocitane (ÒPLO) al veve presentât i risultâts plui impuartants di une inchieste sociolinguistiche che e veve cjapât dentri i teritoris di lenghe ocitane des regjons aministrativis de Gnove Aquitanie e de Ocitanie, tal stât francês, e de Val di Aran, intal stât spagnûl. In plui dai ûs linguistics, la inchieste e veve indagât ancje il rapuart de int cu la lenghe proprie. Il dât plui significatîf al jere che il 92% dai intervistâts si declarave a pro di politichis par valorizâ l’ocitan. La inchieste e va dut câs indenant a ufrî dâts interessants che a varessin ancje di coventâ par planificâ lis politichis linguistichis. Par esempli, se e je vere che tai ultins agns si stime une diminuzion tor dal 4% intes personis che a fevelin par ocitan, di chê altre bande e je cressude la volontât dai gjenitôrs e dai nonos di trasmeti la lenghe. E se e je vere che l’ocitan al reste fevelât massime in ambient familiâr, si à po viodût che l’element culturâl, massime chel de musiche e dai bai popolârs, al da un contribût impuartant a svicinâ la int ae lenghe e che lis rêts sociâls par ocitan a son simpri plui frecuentadis. La inchieste e ufrìs ancje un spieli dal aprendiment dal ocitan a scuele, là che si passe dal 49% di fruts che a àn vude cheste pussibilitât intal dipartiment dai Alts Pireneus al 1% di chei de Cruesa / Creuse.

Font: Le Populaire du Centre, 15/09/20

Galizie/León: iniziativis pai dirits linguistics intal Bierzo

La domande dal coletîf culturâl Fala Ceibe di mendâ il regolament gjenerâl dal consei provinciâl dal Bierzo – aree di lenghe galiziane che si cjate te comunitât di Castilie e León – par dâi al galizian un status di couficialitât e je stade cjapade sù ancje de Coalición por El Bierzo (CB). Il moviment politic al à fat indenant une petizion par che tal regolament si previodi in maniere esplicite il bilinguisim aministratîf. Il statût de comunitât di Castilie e León e la normative locâl a ricognossin za la lenghe galiziane e a previodin misuris di tutele ma, tai fats, si è ben lontans di une paritât tra galizian e castilian. Cheste iniziative e à stiçât la Unión dal Pueblo Leonés (UPL-Bierzo) a proponi une modifiche al regolament che e previodi ancje la difese de lenghe asturiane leonese che e je fevelade te part orientâl dal teritori provinciâl.

Font: León Noticias, 11/09/20; La Nueva Crónica, 18/09/20

Paîs Basc: a Baiona cuintri dai atacs ae scuele basche

Il dinei dal distret scolastic teritoriâl di vierzi une classe basche a imersion alì de scuele publiche di Hiriburu / Saint-Pierre-d’Irube e je stade la ultime gote che e à discjadenât la proteste des realtâts impegnadis inte promozion de lenghe proprie tal Paîs Basc sot aministrazion francese (Ipar Euskal Herria). La decision e à puartât a interogâsi ancje sul avignî des 38 classis imersivis za in vore, ancje parcè che la ofensive cuintri dal euskara a scuele si palese in diviersis manieris. Baste pensâ, par esempli, che dai 15 gnûfs professôrs che a àn completade la formazion par basc 11 a son stâts assegnâts a catedris par francês. Par protestâ cuintri di chescj atacs ae lenghe basche inte educazion, la organizazion Euskal Konfederazioa – che e met adun lis realtâts che a operin pal insegnament dal basc a scuele – e à decidût une zornade di mobilitazion pai 10 di Otubar a Baiona / Bayonne. In particolâr, ta chê zornade, e je stade programade une cjadene umane che e scjavaçarà une part de citât.

Font: Sud Ouest, 10/09/20

Paîs Catalans: a València jutoris pal catalan tal cumierç

Il comun di València al à decidût di intervignî in maniere ative par promovi la lenghe proprie tes ativitâts comerciâls de citât. Par chest al à publicât un bant che al met a disposizion un totâl di 50 mil euros. Si trate di risorsis che a laran aes buteghis, ai locâi e a chês altris ativitâts comerciâls citadinis che a dopraran il catalan (te sô varietât valenziane) inte tabelonistiche interne e esterne, te publicitât, tal materiâl promozionâl, tai sîts internet, tes etichetis, tai menûs e vie indenant.

Font: El Periòdic, 09/09/20

Ream Unît: Europe critiche sul rispiet dai dirits linguistics

L’ultin rapuart dal Consei de Europe sul rispiet de cjarte europeane des lenghis regjonâls o minoritariis de bande dal Ream Unît al palese no pôcs ponts critics. La situazion plui penze e je chê leade ae Irlande dal Nord là che zaromai di agns si spiete une leç organiche di tutele dal gaelic irlandês che, par altri, e jere part ancje dai acuardis di pâs dal Vinars Sant. Il document al segnale ancje la inazion dal esecutîf britanic in mert ae promozion dal cornic e al invide Londre a trasferî competencis e risorsis pe politiche linguistiche al guvier locâl. Par chel che al rivuarde il galês, i setôrs là che si invide a intervignî cun plui fuarce a son chei de sanitât, de assistence, de educazion privade e dal guvier locâl. In mert al gaelic scozês si invide invezit a intervignî massime su lis radios e lis televisions comerciâls. Tra lis notis positivis, invezit, si à lis politichis metudis in at des autoritâts locâls pe varietât gaeliche fevelade ti isule di Man.

Font: The Guardian, 08/09/20