Paîs Catalans: in miârs a Barcelone a pro de scuele catalane

Sabide ai 17 di Març miârs di personis a àn partecipât a Barcelone ae manifestazion clamade adun dal coordenament Som Escola e dal sindacât maioritari USTEC in difese dal sisteme scolastic a imersion in vore in Catalogne che, simpri plui dispès, si cjate sot atac de bande dal guvier spagnûl che lu acuse di discriminâ il castilian. Une tesi e une menace che e cjate cuintri ducj i partîts de Catalogne, fale lis dôs espressions de diestre spagnoliste, o sei Ciudadanos e PP. Ae manifestazion a àn partecipât invezit rapresentants di ducj chei altris partîts (dai indipendentiscj anticapitaliscj de CUP fintremai i sociâi democratics spagnoliscj dal PSC), des dôs organizazions principâls de militance catalaniste – Òmnium Cultural e ANC – e di cetancj sindacâts.

Font: EFE, 17/03/18

Paîs Basc: il 16% des pagjinis web par euskara

A son stâts presentâts ta chestis zornadis a Bilbo / Bilbao i dâts racuelts dal Osservatori PuntuEUS su la presince de lenghe basche su internet. In dut a son 26.663 i sîts web dal Paîs Basc che a àn contignûts par euskara, ven a dî il 16% dal totâl. Chei che a doprin il domini .eus a son invezit sù par jù 8.100. Tra chescj il 90% al dopre la lenghe basche e il 43% al parten a aziendis. Sul plan teritoriâl, il domini .eus al rapresente il 42% dai sîts internet de Gipuzkoa, il 31% de Bizkaia, l’11% de Araba, il 5% de Navare e il 2% dal Paîs Basc francês.

Font: EiTB, 16/03/18

Macedonie: leç sul albanês, gnûf no dal president

Il president de Macedonie, Gjorge Ivanov, al à decidût pe seconde volte di no firmâ la gnove leç su lis lenghis che il Parlament de Republiche balcaniche al à tornât a fâ buine ai 14 di Març dopo che Ivanov si veve refudât di firmâle une prime volte. Il proviodiment, che al è ae fonde dal acuardi di guvier tra il partît sociâl democratic e i moviments principâi de comunitât albanese, si propon di slargjâ la uficialitât dal albanês ancje tai comuns là che i membris di cheste comunitât a son mancul dal 20% de popolazion. Pal president macedon la leç no je juste e e va cuintri de Costituzion. La diestre nazionaliste, cumò ae oposizion, e à cirût di impedî che la leç e fos fate buine presentant uns 35 mil emendaments in aule e cun manifestazions di proteste fûr dal palaç dal Parlament. Dopo de seconde boçadure de bande dal president al è pussibil che par superâ il scuintri istituzionâl in at e vedi di intervignî cuntune sentence la cort costituzionâl.

Font: RFE/RL, 15/03/18

Paîs Catalans: plui risorsis ai ents locâi valenzians pal catalan

Il guvier de Comunitât Valenziane al à publicât i bants che a assegnin un milion e 120 mil euros ai ents locâi pe promozion de lenghe catalane. Si trate di risorsis che a son daûr a cressi in maniere significative dal 2015 incà. I fonts a coventin par puartâ indenant e par infuartî i sportei e chei altris uficis che a ufrissin servizis linguistics, ma ancje pe tabelonistiche e pe segnaletiche, par cors di formazion linguistiche pal personâl, par campagnis di promozion e di sensibilizazion sul catalan.

Font: València Extra, 14/03/18

Sápmi: lançât il Font pal Cine dai Popui Artics (AIFF)

Inte suaze de conference sul cine dai popui natîfs che si à tignude te prime metât di Març a Kautokeino, te tiere dai Sami (Sápmi), al à stât inviât il Font pal Cine dai Popui Artics (AIFF) che si propon di sostignî lis produzions e coproduzions cinematografichis e televisivis di cualitât che a cjapin dentri i popui natîfs des regjons artichis di Canadà, Federazion Russe, Finlande, Norvegje e Svezie, dal Alaska e de Groenlande. L’intindiment al è ancje di infuartî la colaborazion tra lis realtâts che a operin za ta chest setôr e di creâ gnovis oportunitâts di lavôr pai zovins des comunitâts nativis intal setôr dal cine, dal digjitâl e dai mieçs di comunicazion. A metilu sù a son stâts l’Istitût cinematografic sami internazionâl, il Font pai media dal Canadà, la Societât di svilup cinematografic dal Nunavut, la Associazion dai autôrs di cine de Groenlande e la organizazion russe Archy, intant che i prins finanziaments a rivin dal guvier norvegjês.

Font: The Independent Barents Observer, 14/03/18

Svezie: in piês la situazion de minorance finlandese

Di cualchi an incà a van dilunc a cressi ancje in Svezie la intolerance e i compuartaments agressîfs, ofensîfs e discriminatoris cuintri dai grups minoritaris. Il fenomen al somee leât al aument dai flus migratoris, ma al colpìs ancje lis minorancis nazionâls storichis dal paîs tant che i finlandês di Svezie (Sverigefinnar) che a rapresentin il 7% de popolazion totâl. Un rapuart jessût di resint al piture un cuadri avonde neri. Inte scuele a cressin i episodis di intolerance e fintremai di atac cuintri dai students e dai insegnants che a doprin il finlandês fûr dal orari di lezion de bande di altris students e ancje di altris professôrs. Dongje de incressite di episodis di cheste fate, il probleme plui grues al è chel de mancjance di percors educatîfs par finlandês. Dome par fâ un esempli, dai 6 mil fruts di Göteborg che a àn tant che prime lenghe il finlandês, dome 177 a àn la pussibilitât di ricevi une educazion ta cheste lenghe. Daûr dal rapuart al mancje personâl finlandês cualificât sei te scuele che in altris cjamps tant che la assistence. Un tant al diven par altri propite de mancjance di percors formatîfs adats e dal no rispiet des misuris di tutele e di promozion des lenghis minorizadis. L’unic cjamp là che invezit la situazion e somee lâ in miôr al è chel de presince de lenghe intai mieçs di comunicazion e la maniere che chescj ultins a fevelin de minorance.

Font: The Guardian, 13-14/03/18

Irlande: cundut de domande, no cressin lis scuelis gaelichis

Il 2018 al è stât proclamât an dal gaelic (Bliain na Gaeilge) ma, magari cussì no, nol puartarà buinis gnovis pal insegnament di cheste lenghe intes scuelis de Irlande. Des passe 3 mil scuelis primariis sparniçadis ator pal teritori de Republiche juste il 8,3% a àn il gaelic tant che lenghe veicolâr e in buine part si cjatin intes areis de isule là che l’irlandês al à ancjemò une presince significative (Gaeltacht). Inchiestis e ricercjis davueltis intai ultins agns a mostrin che cuasi un cuart dai gjenitôrs al volarès che i siei fîs a studiassin intune scuele cul gaelic come lenghe veicolâr (Gaelscoil), ma la domande e je masse alte rispiet ae ufierte. Dome par rispuindi ae domande atuâl a coventaressin inviadis almancul uns dusinte scuelis gaelichis intai prossims dîs agns. Chest percors, che par deventâ al à bisugne di timp, al varès di jessi compagnât de introduzion di classis a imersion almancul intun pocjis des scuelis cul inglês veicolâr, in maniere di garantî a dutis lis fameis che lu domandin un percors educatîf par gaelic pai lôr fruts. An Foras Pátrúnachta, la entitât che e gjestìs la plui part des scuelis gaelichis, e à duncje invidât cun fuarce la politiche irlandese a impegnâsi su chest front e à cjapâlu dentri intal progjet di svilup batiât Project Ireland 2040 che al fisse lis liniis di indreçament pai prossims vincj agns.

Font: Irish Times, 13/03/18

Paîs Catalans: rinviade la elezion dal president de Generalitat

Il president dal Parlament catalan, Roger Torrent, al à decidût di rinviâ la convocazion de assemblee in program lunis ai 12 di Març che e varès vût di puartâ ae elezion dal gnûf president de Generalitat. Un tant in spiete che il tribunâl suprem si esprimi sul ricors cuintri de decision dal judiç Pablo Llarena, che al à in man la inchieste sul indipendentisim catalan, di dineâ a Jordi Sànchez il permès par partecipâ ae riunion dal Parlament (un secont ricors al è pront invezit pal tribunâl european dai dirits umans di Strasburc). Sànchez, za president de ANC e cumò deputât di JxCat, si cjate di plui cuatri mês in preson preventive par vie dal so rûl intal procès di autodeterminazion de Catalogne. Su la elezion di Sànchez a gnûf president dal guvier catalan si vevin cjatâts dacuardi i doi partîts principâi dal front indipendentist – JxCat e ERC – dopo che il tribunâl costituzionâl spagnûl al veve declarât impussibile la elezion di Carles Puigdemont, cumò in esili in Belgjiche, almancul che nol tornàs in Catalogne e che – viodût il mandât di arest che al à sul cjâf – no i fos dât un permès judiziari par partecipâ.

Font: Ara, 09/03/18; Naiz:, 09/03/18

Letonie: pas indenant de leç cuintri des scuelis russis

Ai 8 di Març il Parlament de Letonie al à fate buine in seconde leture la propueste di leç che e met il leton tant che lenghe obligatorie in dutis lis scuelis dal paîs, ancje chês des minorancis (par solit privadis). La riforme si propon di meti il leton come lenghe veicolâr in dutis lis materiis principâls insegnadis intes scuelis bilengâls o a imersion dentri dal 2020. La misure e colpìs massime la comunitât di lenghe russe che e rapresente cuasi un cuart de popolazion. Daûr de propueste di leç, intes scuelis de minorance il rus al restarès come lenghe di insegnament pes oris di lenghe e leterature russe e pes materiis di aree storiche – umanistiche. Prime che la propueste e deventi leç e covente ancjemò une leture in Parlament e la firme dal president de Republiche, ma la iniziative e à za jevât la mobilitazion de comunitât russofone che e à imbastît protestis e mobilitazions di place.

Font: TASS, 09/03/18

Gales: politichis pe lenghe, scuintri su lis consultazions

Il guvier galês al à davuelt une consultazion publiche sul so progjet di riforme de legjislazion linguistiche. Lis rispuestis cjapadis sù a son stadis 504 che i si zontin altris 278 tiradis dongje cun trê campagnis diferentis de organizazion Cymdeithas yr Iaith che però i funzionaris dal guvier no àn calcolât te lôr totalitât ma dome come trê contribûts singui. Ta cheste maniere, e à protestât la organizazion pe lenghe, i risultâts de consultazion a son stâts strassomeâts a fuart. Daûr dai calcui dai funzionaris dal guvier, juste par fâ un esempli, une des propuestis di riforme plui impuartantis dal esecutîf galês – o sei di sostituî l’ufici dal comissari pe lenghe cuntun altri organisim – e cjatarès contraris o in dubi il 56% dai partecipants ae consultazion; invezit, se si tignìs cont di dutis lis rispuestis singulis, i contraris o in dubi a saressin plui dal 70% dal totâl. Rapresentants dal esecutîf a àn ametût che la proteste e à mani e che a tignaran cont dai indreçaments che a rivin des campagnis de Cymdeithas.

Font: BBC, 07/03/18

Irlande: Raidió Rí-Rá ancje in FM ma dome par dîs dîs

Par celebrâ i siei dîs agns di vite Raidió Rí-Rá, la emitente musicâl indreçade ai zovins che e dopre il gaelic irlandês in ducj i siei spazis fevelâts, si podarà scoltâle par dîs zornadis ancje in modulazion di frecuence tes areis di Baile Átha Cliath / Dublin, Corcaigh / Cork, Gaillimh / Galway e Luimneach / Limerick. Pe ocasion la programazion e sarà plene di musiche dal vîf e di ospits che si proponaran come condutôrs di ecezion. Par solit la maiorance dai presentadôrs de emitente e je formade di students che a rivin di diviersis scuelis de isule. Vie pal an Raidió Rí-Rá e inmanee ancje iniziativis cui students des primariis e des secondariis par fâur provâ in prime persone ce che al vûl dî fâ radio. Par cumò la emitente si pues scoltâle dome su Internet (www.rrr.ie) e cuntune app: cun cheste sperimentazion in modulazion di frecuence si permetarà duncje di dâ une cerce de radio a di un public plui larc.

Font: CnaG, 07/03/18

Irlande: il consei di Belfast al poie la leç pal gaelic

Il consei comunâl di Béal Feirste / Belfast al à fate buine une mozion presentade dal partît People Before Profit là che si domande al Parlament nordirlandês une leç organiche pe tutele e pe promozion de lenghe gaeliche irlandese. Dopo di une jentrade tignude di un rapresentant de organizazion pe lenghe Conradh na Gaeilge, si à inviade une discussion là che i conseîrs si son confrontâts a muse dure. I rapresentants dai partîts unioniscj a àn votât cuintri dal document ancje se cun motivazions diviersis, di cui che al à fevelât di meti i bêçs su cuistions judicadis plui impuartantis a cui che al acusave i aversaris di doprâ l’irlandês come une arme politiche par colpî la comunitât unioniste comprendûts chei tra di lôr che la lenghe le fevelin. Ae fin, dut câs, la mozion e je passade cun 34 vôts a pro e 22 contraris.

Font: Belfast Telegraph, 06/03/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Galizie / León: nuie fonts ai ents locâi dal Bierzo pal galizian

La Xunta, ven a dî il guvier de Galizie, e à dite di no al apel dal coletîf Fala Ceibe par incressi lis risorsis aministrativis, economichis e umanis dai ents locâi dal Bierzo in maniere di infuartî l’ûs de lenghe proprie ta chest teritori di lenghe galiziane cjapât dentri te comunitât di Castilie e León. Il teme al jere stât puartât ae atenzion dal Parlament dai rapresentants dal Partît Socialist (PSOE) e dal BNG, ma il Partît Popolâr (PP) che al à la maiorance te Assemblee galiziane al à boçât la iniziative limitantsi a confermâ lis misuris di jutori in vore in dì di vuê che si centrin sul insegnament intes scuelis.

Font: Diario de León, 04/03/18

Ocitanie: Consei Gjenerâl di Aran adun pal aranês

Ai 28 di Fevrâr il Consei Gjenerâl di Aran al à fate buine ae unanimitât une mozion a pro de promozion e de tutele dal aranês come lenghe proprie de Val di Aran, valade pirenaiche dal principât di Catalogne là che si fevele une varietât linguistiche ocitane. La iniziative e nas tant che proteste pe sentence dal tribunâl costituzionâl spagnûl che e scancele i articui de leç sul ocitan – fate buine dal Parlament catalan intal 2010 – che a calcolin l’aranês come lenghe di ûs preferenziâl des aministrazions locâls de Val di Aran. La decision dal tribunâl, che e rive a sîs agns de impugnazion de leç, si compagne a diviers atacs cuintri dal aranês rivâts dal guvier spagnûl e in particolâr dal ministri pe istruzion e pe culture, Íñigo Méndez de Vigo. Inte mozion si domande ancje al guvier catalan di sostignî gnovis misuris in stât di incressi l’ûs sociâl dal ocitan e si propon di meti in pîts une comission pal aranês. Par rispuindi ai atacs cuintri de lenghe proprie lis associazions de valade impegnadis pe lenghe a àn clamât dongje une manifestazion che si tignarà ai 24 di Març.

Font: Jornalet, 02/03/18

Corsiche: confront su autonomie e riforme de Costituzion

La delegade pai afârs cors dal guvier francês, Jaqueline Gourault, ai 27 di Fevrâr si à tornade a cjatâ cui rapresentants de Comunitât Teritoriâl de Corsiche e ur à confermât che la isule e sarà cjapade dentri te propueste di revision de Costituzion republicane che il president francês Emmanuel Macron al è daûr a imbastî. La ministre e à fat savê che la isule e jentrarà tal articul 72 che al fronte il dirit ae “diferenziazion”, ma che si varà ancje un articul di pueste che al varès di ricognossi ae Corsiche dai podês specifics, di definî po cuntune leç ordenarie. Chestis mendis ae Costituzion a laressin duncje a infuartî la autonomie de isule, ancje se par cognossi cualchi detai in plui in proposit si varà di spietâ la prossime taule di confront che e varès di davuelzisi te prime metât dal mês di Març. Si trate dut câs di une strade di rive sù dal moment che, se ancje Macron al rispietarà lis sôs promessis, par che la riforme de Costituzion e passi a coventin i vôts a pro di almancul trê cuints dai parlamentârs francês.

Chel istès, ai 8 di Març, par marcâ cun inmò plui fuarce la posizion des istituzions de isule, la Assemblee de Corsiche e à votât une propueste di articul di meti te Costituzion francese là che si esplicite la autonomie de isule e la devoluzion di diviersis competencis. Il test al è passât cun 48 vôts a pro su 63. A votâ cuintri dome lis diestris statalistis.

Font: Alta Frequenza, 28/02/18 e 09/03/18; Corsica Oggi, 28/02/18

Paîs Basc: prin pas pe gnove leç sul euskara de Navare

La presidence dal Parlament de Navare e i presidents dai grups parlamentârs a àn fatis buinis a maiorance lis normis istitutivis de comission speciâl che e à la incarghe di meti jù une gnove leç sul euskara in stât di superâ la division in trê areis linguistichis in vore fin cumò e di ricognossi il basc come lenghe uficiâl in dute la Navare. Il document al è stât fat bon dai rapresentants de maiorance nazionalitarie e progressiste (Geroa Bai, EH Bildu, Elkarrekin Podemos e Izquierda Ezkerra), intant che i àn votât cuintri i popolârs (PP), i socialiscj (PSN) e la diestre regjonaliste (UPN).

Font: Noticias de Navarra, 27/02/18

Paîs Basc: simpri plui euskara tal sport

In cressi la presince de lenghe basche ancje tal sport. Dôs lis gnovis rivadis sul finî di Fevrâr che a van ta cheste direzion. La prime e je la conferme, rivade dal diretôr gjenerâl dal Tour de France Christian Prudhomme, che l’euskara al sarà lenghe couficiâl dal zîr inte tape dai 28 di Lui che si davuelzarà tra lis localitâts di Senpere e Ezpeleta, intal Paîs Basc francês. Dilunc dai 31 chilometris di cheste tape dutis lis comunicazions e ducj i segnâi uficiâi dal Tour a saran ancje in lenghe basche. La seconde gnove e rive dal Osasuna – scuadre di Pamplone che e zuie tal massim campionât di balon dal stât spagnûl – là che la dirigjence de societât e à fat savê di vê lançât un gnûf canâl Twitter e une gnove pagjine Facebook di plante fûr par euskara. La lenghe basche e sarà po integrade in maniere progressive ancje tal sît uficiâl de scuadre e te comunicazion cui abonâts dal Osasuna.

Font: EiTB, 21 e 26/02/18

Scozie: plui risorsis pal insegnament plurilengâl

Il guvier scozês, par bocje dal ministri Jamie Hepburn, al à fat savê che al zontarà altris trê milions di sterlinis intal belanç des scuelis pal an 2018-2019 par infuartî l’insegnament plurilengâl che, dal 2013 incà, al à viodût invistiments par passe 27 milions. La Scozie e à di fat inviât il model linguistic 1+2 che al previôt che, za cul prin an di scuele, i fruts a tachin a studiâ une lenghe foreste intant che une seconde e je zontade tal cuint an des primariis. Chestis lenghis a àn di jessi studiadis almancul fintremai il tierç an des secondariis. Tra lis lenghis disponibilis, dongje di variis lenghis europeanis e dal cinês mandarin, si à ancje il gaelic scozês che, ta cheste maniere, al pues jessi studiât ancje fûr de aree tradizionâl là che al è fevelât.

Font: Sunday Post, 20/02/18

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.