Uns 1.700 personis a àn partecipât in maniere ative ae zornade di lote no violente inmaneade sabide ai 23 di Lui dai coletîfs Bake Bidea e Artisans de la paix intal Paîs Basc dal Nord sot aministrazion francese (Ipar Euskal Herria) par domandâ al guvier di Parîs di meti fin ae politiche carcerarie punitive cuintri dai presonîrs bascs. A stiçâ inmò di plui la proteste e je stade la boçadure de bande de avocadure di stât de domande di libertât condizionâl fate indenant di Jakes Esnal e Ion Kepa Parot, impresonâts aromai di 32 agns e che za di timp a varessin vût dirit a misuris cautelârs alternativis.
Cuintri dal cidin e de inazion dal stât francês e
cundut de proibizion di manifestâ rivade de prefeture la vilie de
iniziative, i doi coletîfs a àn metût in at une sorte di siopar de
circolazion intal Paîs Basc dal Nord che al è tacât tor vot e
mieze di buinore cul bloc dal aeropuart di Miarritze / Biarritz là
che, par liberâ la piste, e je intervignude la polizie francese. I
agjents a son intervignûts ancje a Bokale / Boucau là che e jere
stade ocupade la ferovie, blocant il trafic par diviersis oris. A
patî di plui al è stât però il trafic su gome par vie di une
cuindisine di blocs dilunc de viabilitât principâl dal Paîs Basc
dal Nord. Intant de mobilitazion, la polizie francese – che e je
intervignude ancje cu la poie di agjents rivâts de Spagne – e à
arestât 26 personis. I organizadôrs a àn gjavât i blocs stradâi
tor 4 dopodimisdì par imbastî une manifestazion a Baiona / Bayonne
là che a àn domandât la liberazion dai militants fermâts. La
iniziative e à cjatât la poie o la solidarietât di diviersis
aministrazions locâls e istituzions dal Paîs Basc dal Nord.
Font: Mediabask, 23/07/22; Naiz:, 23/07/22; Sud Ouest France, 23/07/22
Nessun commento:
Posta un commento