A partî di une investigazion di Citizen Lab, ai 18 di Avrîl il setemanâl The New Yorker al à publicât une inchieste titulade “Cemût che lis democraziis a spiin i lôr citadins” là che al ufrive elements une vore detaiâts sul spionaç par mieç dal programs Pegasus e Candiru di almancul une sessantine di rapresentants dal indipendentisim catalan, tra di lôr il president in cjarie (Pere Aragonès) e trê ex presidents dal guvier catalan (Carles Puigdemont, Quim Torra e Artur Mas), parlamentârs, eurodeputâts, dirigjents politics e dal associazionisim sociâl, imprenditôrs, gjornaliscj ma ancje familiârs e fintremai i lôr avocats. Tra i nons, ancje doi dirigjents dal moviment de çampe indipendentiste basche EH Bildu (Arnaldo Otegi e Jon Iñarritu). Il scandul – batiât Catalangate – al è daûr a menaçâ la tignude dal guvier di Madrid, che al stâ sù cu la poie fondamentâl dai partîts indipendentiscj catalans e bascs.
Il program Pegasus, al va cetant plui innà di une intercetazion telefoniche, e al permet di controlâ dutis lis comunicazions, i documents scambiâts, i contats des personis spiadis, dentri e fûr dai confins di stât. Par ce che si sa, al ven vendût dome a istituzions statâls e, duncje, daûr di chest spionaç si stime che a sedin i servizis segrets (CNI) e lis fuarcis di polizie spagnole, ancje se nol è clâr cui che al vedi autorizât l’acuist dal program e il so ûs. Fin cumò lis domandis di sclariment rivadis des fuarcis politichis vitimis di cheste operazion a àn cjatât dai rapresentants dal esecutîf di Madrid rispuestis autoassolutoriis, fumosis o fintremai provocatoriis (come tal câs de ministre pe difese, Margarita Robles). I unics impegns rivâts pal moment a son chei di frontâ il teme dentri de Comission parlamentâr sui segrets di stât (che lis sôs discussions a son però secretadis) e di une investigazion interne dentri dai servizis di inteligjence. Masse pôc però pal guvier catalan che al domande di cjatâ fûr i responsabii e clamâju a rispuindi par une operazion che no à nissune cuvierzidure legâl. Il Parlament european al à decidût di frontâ il teme sul prin tacâ dal mês di Mai ancje par vie che tra lis vitimis dal spionaç a son ancje trê dai siei membris. Su la vicende e je daûr a inviâsi une cuintriofensive legâl che e cjape dentri diviers stâts europeans, dal moment che lis azions di spionaç si son davueltis ancje fûr dal ream di Spagne e, par ce che si sa, cence de autorizazion des magjistraturis locâls e cu la pussibilitât di cjapâ dentri ancje citadins di chei stâts. Intant a Madrid i rapresentants di ERC, Junts per Catalunya, CUP, PDeCAT, EH Bildu, BNG, Más País e Compromís a àn domandât che su la cuistion a sedin sintûts in Parlament il president dal guvier spagnûl, i ministris dal interni e de difese, i diretôrs gjenerâi de guardia civil, de sigurece statâl, dai servizis segrets e dal gabinet de presidence dal guvier spagnûl.
Nessun commento:
Posta un commento