Cundut che nol è jentrât intal mert de cuistion limitantsi a sostignî che no jerin i elements par un ricors, il tribunâl suprem spagnûl al à confermât la sentence de cort superiôr di justizie de Catalogne che e impon un 25% di lezions par castilian intal sisteme scolastic catalan alterant cussì in maniere significative il model imersîf in vore te Comunitât. Dut al jere partît intal 2015 cuant che il ministeri pe educazion spagnûl – in chê volte tes mans dal PP – al veve fat ricors cuintri de leç catalane pe educazion. Intal 2020 la magjistrature i veve dât reson in prin grât causant un cuintriricors dal esecutîf catalan.
Denant de decision dal suprem, il ministri catalan pe educazion, Josep Gonzàlez-Cambray, al à sigurât che nol cambiarà nuie ancje parcè che si à un acuardi cul guvier spagnûl in cjarie par mantignî in vore il sisteme imersîf. No si pues acetâ – al à dite – che al sedi un judiç a fissâ in maniere arbitrarie la percentuâl di oris che a coventin par imparâ une lenghe spreçant lis sieltis dai esperts dal setôr. Si vûl creâ un probleme là che nol è – al à zontât – baste pensâ che in dute la Catalogne, dal 2005 incà, a son a pene 80 lis fameis che a àn domandât la scolarizazion par castilian. La decision dal tribunâl e à jevât la rispueste dure di cetantis organizazions pai dirits linguistics, a partî de Plataforma per la llengua che e à ricuardât che la sentence e rapresente une violazion de Cjarte europeane des lenghis regjonâls o minoritariis cemût che e je stade ratificade dal stât spagnûl, e che e va cuintri dal consens sociâl e politic in Catalogne là che plui dal 80% de popolazion al poie ad implen il model scolastic imersîf.
Nessun commento:
Posta un commento