Il
president rumen Klaus Iohannis al à acusât i sociâi democratics
(PSD), o sei il principâl partît di oposizion, di lavorâ parsot
cul guvier di Budapest par consegnâ la Transilvanie ae Ongjarie. Un
tant al è sucedût dopo che une propueste di leç presentade de
Union Democratiche dai Ongjarês in Romanie (UDMR) su la autonomie
dal Székelyföld
e je passade in prime leture te Cjamare dai deputâts. Il
Székelyföld al
rapresente il teritori de Transilvanie là che la minorance ongjarese
e je ancjemò maioritarie. In realtât il test al è passât dome pal
fat che la legjislazion rumene e previôt che cuant che une propueste
di leç e reste in aule par plui di 45 dîs e ven aprovade in
automatic. Il PSD al à duncje vût zûc facil intal mostrâ di vê
votât cuintri de propueste in comission e a ribaltâ la acuse sui
liberâi nazionâi aleâts di Iohannis che no àn convocât il
Parlament in timp par podê votâ. I dirits e lis rivendicazions de
minorance ongjarese a tornin cussì al centri dal conflit politic
tant che vitimis principâls di un nazionalisim rumen simpri plui
agressîf. In maniere paradossâl, viodude la sô partignince ae
minorance todescje de Romanie, il president Iohannis al è un dai
prins a stiçâ lis sflamiadis xenofobichis cuintri des comunitâts
minorizadis dal paîs.
Font:
Balkan Insight,
29/04/20
Nessun commento:
Posta un commento