Ai
8 di Lui a son stâts presentâts i risultâts de inchieste sui ûs
linguistics de popolazion puartade indenant dal Istitût di
Statistiche de Catalogne vie pal 2018. I dâts principâi a mostrin
che il 94,4% de popolazion al capìs il catalan, l’85,5% al è bon
di leilu, l’81,2% di fevelâlu e il 65,3% di scrivilu. Rispiet ae
inchieste precedente, che e rimonte al 2013, a son cressudis massime
lis capacitâts di scrivi (5%) e di lei (3%). Lis percentuâls a
tornin duncje sui nivei di prime de gruesse ondade migratorie che e
veve interessât la Catalogne tra il 2003 e il 2008. In dì di vuê,
un tierç de popolazion catalane al è nassût fûr de Catalogne.
Chel istès plui di trê cuarts de popolazion si cjatin a doprâ il
catalan ogni dì. Il catalan al è doprât dal 42% de popolazion che
no lu à come lenghe native. I setôrs là che il so ûs al cres di
plui a son chei dal cumierç e de sanitât. Il catalan al aumente
ancje tes cjacaradis cui compagns di vore, cui amîs e cui vicins.
Par
chel che al rivuarde invezit la Val di Aran, o sei la valade
pirenaiche che e à l’ocitan tant che lenghe proprie, l’83,3% de
popolazion al capìs l’aranês, il 73,5% al è bon di leilu, il 60%
di fevelâlu e il 45,8% di scrivilu. Si trate di dâts cressûts a
fuart intai ultins dîs agns, massime par chel che si riferìs al lei
e al scrivi. I risultâts positîfs des politichis linguistichis
metudis in at intai ultins agns a vegnin fûr soredut se si pense che
i zovins tra i 15 e i 29 agns a passin il 70% in dutis lis cuatri
abilitâts.
Font:
Generalitat de Catalunya,
08/07/19
Nessun commento:
Posta un commento