Di
là dai contribûts impuartants puartâts des organizazions
nazionalitariis di diviersis comunitâts minorizadis che a àn
partecipât ae manifestazion, chest an a clamâ l’interès des
Ghjurnate Internazionale
di Corti a son stadis massime lis dinamichis internis dal panorame
nazionalitari cors. Se di une bande il guvier de Coletivitât
teritoriâl e il confront cul stât centrâl a mantegnin unide la
coalizion Pè a Corsica
formade dai nazionaliscj moderâts di Femu
a Corsica, dal PNC e dai
indipendentiscj di Corsica Libera,
di chê altre bande a restin lis divisions sul cemût frontâ lis
prossimis elezions aministrativis in program intal Març dal 2020.
I
indipendentiscj e, inmò di plui il PNC, a vuelin presentâsi cu la
stesse coalizion za tal prin turni eletorâl almancul tes citâts
principâls e tai comuns plui grues. Dentri di Femu
a Corsica invezit si volarès cori di
bessôi: une strade che però i aleâts a calcolin pericolose pal
messaç contraditori che al pues rivâ ai eletôrs. Cheste division
si à palesade ancje ae manifestazion di Corti là che Corsica
Libera e PNC a jerin rapresentâts dai
dirigjents plui impuartants, intant che Gilles Simeoni, president dal
esecutîf cors e referent di Femu a
Corsica, no si lu à viodût. Jean-Guy
Talamoni, president de Assemblee corse e leader di Corsica
Libera, al à vierzût su la
pussibilitât di une partecipazion separade tal prin turni ma, chel
istès, lis posizions tra lis fuarcis politichis nazionalitariis a
restin ancjemò avonde lontanis.
Font:
CorseNetInfos,
04/08/19
Nessun commento:
Posta un commento