12/04/19

Corsiche: scuintri a muse dure tra Macron e il guvier de isule

Il percors dal cussì clamât “grant dibatiment” volût dal president francês, Emmanuel Macron, par provâ a rispuindi ae crisi politiche e sociâl che si à manifestade cu la proteste dai “gilets jaunes” (gjilês zâi) si à sierât ai 4 di Avrîl in Corsiche. Cheste ultime tape e je stade però la plui tribulade. Dopo che Macron al à refudât l’invît de Assemblee de Corsiche a confrontâsi cul guvier e cui conseîrs de isule, il president dal esecutîf cors Gilles Simeoni e chel dal Parlament locâl Jean-Guy Talamoni – espression de coalizion nazionalitarie Pè à Corsica – a àn inmaneât la operazion “Isula Morta”, une sorte di siopar gjenerâl di meti in at intant des oris di presince dal president francês su la isule.
Al apel a àn rispuindût i sindacâts CGT e STC e diviersis organizazions di students, cun efiets che si àn viodûts massime te universitât, tes scuelis superiôrs e tai traspuarts e cun manifestazions avonde partecipadis a Aiacciu / Ajaccio e a Bastia. Al incuintri cui sindics cors inmaneât di Macron intal borc di Cuzzà / Cozzano a àn rispuindût mancul de metât dai 360 aministradôrs locâi, intant che dut il percors fat dal president par rivâ tal lûc de riunion al è stât jemplât di bandieris corsis. In mert ae domande di autoguvier che za di agns e rive de isule, Macron al à rispuindût che no saran concedudis misuris di autonomie che a ledin plui innà di chês previodudis de Costituzion francese e al à confermât che no si ricognossarà la couficialitât de lenghe corse. E intant che – intun dialic a distance – Simeoni e Talamoni i ricuardavin che, in plui di vê refudât dutis lis propuestis di dialic rivadis de isule, cui siei “no” al boçave un progjet di riforme certificât cul vôt de maiorance dai cors, Macron al rispuindeve che nol jere spazi di tratative cun cui che nol veve condanât a clâr il sassinament dal prefet Claude Erignac intal 1998. Declarazion che e à lassât scaturîts cetancj di lôr no dome parcè che chel at di violence nol veve cjatât nissune poie dentri de famee politiche nazionaliste ma soredut par vie che, cul dineâ il dialic cun cheste motivazion, si bute sui cors di vuê la responsabilitât coletive e continuade di un fat di sanc capitât vincj agns indaûr e che i siei responsabii a son za stâts condanâts.
Font: CorseNetInfos, 04-06/04/19; Alta Frequenza, 04-05/04/19; Corse Matin, 04/04/19; Jornalet, 05/04/19

Nessun commento: