Paîs Catalans: confermât il procès pai dirigjents indipendentiscj

Ai 25 di Otubar il tribunâl suprem spagnûl al à confermât la conclusion de istrutorie cuintri dai dirigjents indipendentiscj catalans e la decision di rinviâju ducj a procès. La date no je stade ancjemò fissade ma, cun dute probabilitât, la prime udience e varès di tignîsi sul prin tacâ di chest an che al ven. Ta chê ocasion a saran clamâts a rispuindi pai reâts di ribelion e di malversazion Oriol Junqueras (vicepresident destituît), Joaquim Forn (conseîr pal interni destituît), Jordi Turull (conseîr pe presidence destituît), Raül Romeva (conseîr pai forescj destituît), Josep Rull (conseîr pal teritori destituît) e Dolors Bassa (conseire pes politichis sociâls destituide); par ribelion Jordi Sànchez (ex president de ANC), Jordi Cuixart (president dal Òmnium Cultural) e Carme Forcadell (za presidente dal Parlament catalan); par disubidience e malversazion Meritxell Borràs (conseire pal guvier destituide), Carles Mundó (conseîr pe justizie destituît) e Santi Vila (conseîr pes ativitâts economichis destituît); e par disubidience Lluís Corominas (za membri de presidence dal Parlament), Lluís Guinó (za membri de presidence dal Parlament), Anna Simó (za membri de presidence dal Parlament), Ramona Barrufet (za membri de presidence dal Parlament), Joan Josep Nuet (za membri de presidence dal Parlament) e Mireia Boya (za deputade de CUP). Dal procediment invezit, almancul par cumò, a restin fûr i dirigjents indipendentiscj che si cjatin in esili.

Cualchi zornade dopo, ai 2 di Novembar, la procure gjenerâl e à presentât lis sôs domandis di condane. Par Junqueras, considerât il prin responsabil dal procès indipendentist, a vegnin domandâts 25 agns di preson e 25 di inabilitazion di ogni incarghe publiche. La pene domandade par Sànchez, Cuixart e Forcadell e je di 17 agns di preson e 17 di inabilitazion. Par Forn, Turull, Romeva, Rull e Bassa la domande e je di 16 agns di preson e 16 di inabilitazion. Par Borràs, Mundó e Vila si domandin 7 agns di preson, 16 di inabilitazion e 30 mil euros di multe. Par Corominas, Guinó, Simó, Barrufet, Nuet e Boya 30 mil euros di multe e 1 an e 8 mês di inabilitazion. Intun altri at, la procure e à domandât po 11 agns di preson pal ex comandant dai mossos d’esquadra (la polizie catalane), Josep Lluís Trapero, acusât di ribelion par no vê impedît il vôt referendari dal prin di Otubar e lis protestis cuintri des percuisizions dai uficis dal dipartiment des financis dal guvier catalan. Une pene di 11 agns di preson par ribelion e je po domandade ancje pal ex diretôr dai mossos, Pere Soler, e pal ex segretari gjenerâl dal dipartiment dal interni catalan, César Puig. La intendente de polizie catalane, Teresa Laplana, e ven invezit acusade di sedizion e par jê la pene domandade e je di 4 agns di preson.

Font: Naiz:, 25/10/18 e 02/11/18