08/10/18

Paîs Catalans: mobilitazions e tensions pal inovâl dal 1-O

A un an di distance dal referendum su la indipendence e des violencis poliziâls che lu àn compagnât, a son stadis cetantis lis azions e lis manifestazions che si son davueltis il prin di Otubar ator pe Catalogne. La buinore e je stade segnade des interuzions di stradis e feroviis metudis in at, massime a Barcelone e a Girona, dai Comitâts di Difese de Republiche (CDR) e dal siopar proclamât de plateforme des Universitâts pe Republiche che e à puartât in place miârs di students. La manifestazion plui gruesse si le à vude però intal tart dopodimisdì a Barcelone là che plui di cent mil personis a àn sfilât di Plaça de Catalunya al parc là che si cjate il Parlament par stiçâ i deputâts a rispietâ il mandât popolâr jessût dal vôt referendari dal an prime.
Dopo de fin de manifestazion si àn vûts però ancje doi moments di tension, un propit alì dal Parlament e un altri denant de sede centrâl de polizie spagnole a Barcelone. In ducj e doi i câs, la polizie catalane (mossos d’esquadra) e à cjariât i manifestants che si jerin svicinâts ai doi edificis. Intant, sul plan politic, il front indipendentist si mostre avonde dividût su lis stradis di cjapâ: si va di cui, tant che la CUP (e, a nivel teritoriâl, i CDR), al sburte par un percors di roture che al procedi su la strade unilaterâl de indipendence a cui che, tant che ERC, e volarès un secont referendum, cheste volte però concuardât cul stât centrâl. Opzion, cheste ultime, scartade cence apel dal guvier spagnûl. Chestis divisions a metin a risi la stesse tignude dal guvier catalan.
Font: Ara, 01-05/10/18; VilaWeb, 01-05/10/18; Naiz:, 01-05/10/18

Nessun commento: